ទីក្រុងសេអ៊ូល ៖ ប្រទេសកូរ៉េខាងត្បូងបានបញ្ជាឱ្យវេជ្ជបណ្ឌិតនៅតំបន់សេអ៊ូលវិលត្រឡប់មកធ្វើការវិញនៅថ្ងៃពុធ ទី២៦ ខែសីហា នេះខណៈពួកគេបានចាប់ផ្តើមធ្វើកូដកម្មរយៈពេល៣ថ្ងៃដើម្បីប្រឆាំងនឹងសំណើរបស់រដ្ឋាភិបាលជាច្រើនក្នុងនោះមានមួយដើម្បីជំរុញចំនួនវេជ្ជបណ្ឌិត និងដោះស្រាយវិបត្តិសុខភាពនៃជំងឺ Covid-19 ដែលកំពុងប្រឈមមុខ ។ នេះបើយោងតាមប្រភពពីទីភ្នាក់ងារសារព័ត៌មាន Channel News Asia ដែលបានចេញផ្សាយនៅថ្ងៃទី២៦ ខែសីហា ឆ្នាំ២០២០ នេះ ។
កូដកម្មរបស់ក្រុមវេជ្ជបណ្ឌិតនេះបានកើតឡើងនៅពេលដែលប្រទេសកូរ៉េខាងត្បូងប្រយុទ្ធប្រឆាំងនឹងការផ្ទុះឡើងនៃមេរោគឆ្លង Covid-19 ដោយមានករណីថ្មីចំនួន៣២០ករណីត្រូវបានគេរាយការណ៍នៅក្នុងរយៈពេល២៤ម៉ោង ។
ទីភ្នាក់ងារសារព័ត៌មានយ៉ុនហាប់បានរាយការណ៍ថា ការដើរចេញមិនព្រមធ្វើការរបស់ក្រុមវេជ្ជបណ្ឌិតបានបង្ខំឱ្យមន្ទីរពេទ្យទូទៅធំៗចំនួន៥របស់កូរ៉េខាងត្បូងកំណត់ម៉ោងនិងពន្យារពេលនៃការវះកាត់ ។ កាលពីដើមសប្តាហ៍ក្រុមវេជ្ជបណ្ឌិតបានឈានដល់កិច្ចព្រមព្រៀងជាមួយរដ្ឋាភិបាលដើម្បីបន្តដោះស្រាយអ្នកជំងឺដែលមានផ្ទុកមេរោគនេះប៉ុន្តែមិនបានរកឃើញការសម្របសម្រួលលើបញ្ហានេះនោះទេ ។
រដ្ឋមន្ត្រីក្រសួងសុខាភិបាលលោក Park Neung-hoo បាននិយាយនៅក្នុងសន្និសីទកាសែតមួយថា ៖«ឥឡូវនេះរដ្ឋាភិបាលគ្មានជំរើសអ្វីក្រៅពីចាត់វិធានការតាមច្បាប់ចាំបាច់ដូចជាបទបញ្ជាដើម្បីបើកអាជីវកម្ម ដើម្បីមិនធ្វើឱ្យមានការប៉ះពាល់ការរស់នៅ និងសុវត្ថិភាពរបស់ពលរដ្ឋ ។ យើងជំរុញឱ្យសិក្ខាកាម និងគ្រូពេទ្យទាំងអស់ត្រឡប់មកធ្វើការវិញជាបន្ទាន់» ៕
ប្រភព ៖ Channel News Asia , ដោយ ៖ សំណាង
