ប្រព័ន្ធផ្សព្វផ្សាយរដ្ឋកូរ៉េខាងជើងនៅថ្ងៃពុធនេះបានបង្ហាញមេដឹកនាំកូរ៉េខាងជើងលោក គីម ជុងអ៊ុន នៅក្នុងកិច្ចប្រជុំគណៈកម្មាធិការកំពូលមួយដោយលោកបានចេញការព្រមានអំពីជំងឺឆ្លង Covid-19 និងព្យុះទីហ្វុងដែលកំពុងកើតមាន បន្ទាប់ពីមានការសង្ស័យជាអន្តរជាតិអំពីស្ថានភាពសុខភាពរបស់គាត់ ។ នេះបើយោងតាមប្រភពពីទីភ្នាក់ងារសារព័ត៌មាន Bangkok Post ដែលបានដកស្រង់ចេញផ្សាយនៅថ្ងៃទី២៦ ខែសីហា ឆ្នាំ២០២០ នេះ ។
ការអត្ថាធិប្បាយរបស់លោក គីម ជុងអ៊ុន កើតឡើងចំពេលមានការជជែកវែកញែកអំពីស្ថានភាពសុខភាពរបស់លោកបន្ទាប់ពីទីភ្នាក់ងារចារកម្មរបស់ប្រទេសកូរ៉េខាងត្បូងបាននិយាយថា លោកបានផ្ទេរសិទ្ធិអំណាចមួយចំនួនទៅឱ្យប្អូនស្រីរបស់លោកគឺលោកស្រី គីម យ៉ូជុង ដើម្បីបន្ធូរបន្ថយភាពតានតឹងផ្នែកអភិបាលកិច្ចរបស់លោក ។
អតីតជំនួយការរបស់ប្រធានាធិបតីកូរ៉េខាងត្បូងលោក Kim Dae-jung ថែមទាំងបាននិយាយនៅលើហ្វេសប៊ុកផងដែរថា លោកគិតថា មេដឹកនាំកូរ៉េខាងជើងគឺសន្លប់ទោះបីជាមិនមានភស្តុតាងជាក់ស្តែងក៏ដោយ ។
ទីភ្នាក់ងារសារព័ត៌មាន KCNA បានរាយការណ៍ថា លោក គីម ជុងអ៊ុន បានបង្ហាញវត្តមានធ្វើជាអធិបតីក្នុងកិច្ចប្រជុំនៃគណៈកម្មាធិការកំពូលមួយកាលពីថ្ងៃអង្គារដោយពុំមានបញ្ហាអ្វីទាំងអស់ ៕
ប្រភព ៖ Bangkok Post , ដោយ ៖ សំណាង
