ភ្នំពេញ៖ យោងតាមការនិយាយរបស់ លោកស្រី ម៉ែន ច័ន្ទសុកុល ប្រធាននាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូនតាមរយៈបណ្តាញសង្គម Telegram មុននេះបន្តិចបានឲ្យដឹងថា ក្រសួងសាធារណការ និងដឹកជញ្ជូនបានប្រកាសពន្យាពេលផ្ទេរកម្មសិទ្ធយានយន្ត ដោយរកម្ចាស់ដើមមិនឃើញ រហូតដល់ថ្ងៃទី៣០ ខែកញ្ញា ឆ្នាំ ២០២០។
យ៉ាងណាមិញលោកស្រីបានសរសេរថា ដោយមើលឃើញថា បងប្អូនជាច្រើនមកធ្វើការផ្ទេរកម្មសិទ្ធិដោយរកម្ចាស់ដើមមិនឃើញ ដូចនេះសម្រេចពន្យាពេលអនុវត្តនីតិវិធីនេះ រហូតដល់ថ្ងៃទី៣០ ខែកញ្ញា ឆ្នាំ២០២០ (នាយកដ្ឋានកំពុងរៀបចំសេចក្តីជូនដំណឹងផ្លូវការ ដើម្បីធ្វើការផ្សព្វផ្សាយ)។ ដូចនេះ សូមឯកឧត្តម លោក លោកស្រី នៅតែបន្តទទួលនូវពាក្យស្នើសុំផ្ទេរកម្មសិទ្ធិយានយន្តពីបងប្អូនប្រជាពលរដ្ឋ ដោយអនុវត្តតាមនីតិវិធីរកម្ចាស់ដើមមិនឃើញ។
កាលពីពេលថ្មីៗនេះក្រសួងសាធារណការ និងដឹកជញ្ជូន ក៏បានធ្វើការបញ្ជាក់ពីសេចក្តីណែនាំ ការផ្ទេរកម្មសិទ្ធិយានយន្ត ដែលរកម្ចាស់ដើមមិនឃើញ ដល់បងប្អូនប្រជាពលរដ្ឋដែលកំពុងកាន់កាប់យានយន្ត ទិញលក់តៗគ្នារកម្ចាស់ដើមមិនឃើញ ត្រូវដាក់ពាក្យស្នើសុំផ្ទេរកម្មសិទ្ធិយានយន្ត ឱ្យបានមុនថ្ងៃទី ៣០ ខែ មិថុនា ឆ្នាំ ២០២០ ខាងមុខនេះ ប៉ុន្តែពេលនេះបានពន្យាដល់ថ្ងៃទី៣០ ខែកញ្ញា ឆ្នាំ ២០២០វិញហើយ ៕
