បរទេស៖ ប្រទេសចិន បាននិយាយថា ខ្លួនកំពុងបញ្ចូនគ្រូបង្វឹកក្បាច់គុនចំនួន២០នាក់ទៅកាន់បន្ទាត់ព្រំដែនឥណ្ឌា-ចិន ដើម្បីបណ្តុះបណ្តាលកម្លាំងទ័ពទាហានរបស់ខ្លួនដែលកំពុងតែឈរជើងការពារព្រំដែន។ នេះបើយោងការចុះផ្សាយរបស់សារព័ត៌មាន BBC កាលពីថ្ងៃទី២៧ ខែមិថុនា ឆ្នាំ២០២០។
មិនមានហេតុផលផ្លូវការណាមួយសម្រាប់ការសម្រេចចិត្តនេះទេ ប៉ុន្តែវាកើតឡើងបន្ទាប់ពីកងទ័ពឥណ្ឌាយ៉ាងតិច២០នាក់ ត្រូវបានសម្លាប់នៅក្នុងការប៉ះទង្គិចគ្នាជាមួយកងកម្លាំងទាហានចិន នៅនៅព្រំដែនជាប់ជម្លោះ ត្រង់តំបន់ឡាដាក លើជួរភ្នំហេមពាន្ដ។
យោងតាមកិច្ចព្រមព្រៀងដែលមានតាំងពីឆ្នាំ១៩៩៦ គឺគ្មានភាគីណាមួយមានសិទ្ធិកាន់កាំភ្លើង ឬគ្រឿងផ្ទុះនៅក្នុងតំបន់នោះទេ។ ជាមួយគ្នានេះដែរ ចិនបានចោទទាហានឥណ្ឌាថាជាអ្នកនាំរឿង ដោយបានឆ្លងព្រំដែនជាប់ជម្លោះដល់ទៅពីរដង នៅថ្ងៃទី១៥មិថុនា និងបានផ្គើនទាហានចិនមុន ទើបបង្កឱ្យមានការប៉ះទង្គិចគ្នាយ៉ាងហិង្សា។ ប៉ុន្តែចិនមិនបានបញ្ចេញព័ត៌មានណាមួយអំពីការស្លាប់ និងរបួសរបស់ទាហានខ្លួននោះទេ ខណៈឥណ្ឌានិយាយថាទាហានរបស់ខ្លួន៧៦នាក់បានរងរបួស និង២០នាក់ទៀតបានបាត់បង់ជីវិត។
ទូរទស្សន៍រដ្ឋ CCTV បាននិយាយថា គ្រូបង្វឹកក្បាច់គុនចំនួន២០ នាក់មកពីក្លឹប Enbo Fight ដែលមានមូលដ្ឋាននៅរដ្ឋធានីឡាសាបើ បានត្រៀមខ្លួនជាស្រេចក្នុងការបង្ហាត់ក្បាច់គុណដល់កងទ័ពចិន ដើម្បីទប់ទល់ជាមួយកងទ័ពឥណ្ឌា ដោយគ្មានល័ក្ខខណ្ឌក្នុងការប្រើអាវុធផ្ទុះ។
សូមបញ្ជាក់ថា ឥណ្ឌានិងចិន មានជម្លោះព្រំដែន តាមបណ្តោយជួរភ្នំហេមពាន្ត ដោះស្រាយមិនចេញតាំងពីយូរមកហើយ។ ការប៉ះទង្គិចគ្នាដោយហិង្សា តែងកើតឡើងជាញឹកញយ និងកាន់តែធ្ងន់ធ្ងរនារយៈពេលប៉ុន្មានឆ្នាំចុងក្រោយនេះ។ ប៉ុន្តែគិតចាប់តាំងពីឆ្នាំ១៩៧៥មក ចិននិងឥណ្ឌាពុំដែលមានករណីប្រើអាវុធ ឬគ្រាប់កាំភ្លើងផ្ទុះដាក់គ្នាទេ នៅព្រំដែនទេ។ ជម្លោះព្រំដែន រវាងមហាអំណាចជាប្រទេសជិតខាងគ្នា លើកចុងក្រោយបផុតប្រព្រឹត្តទៅនៅឆ្នាំ១៩៦៧ ក្នុងទម្រង់ជាសង្គ្រាមប្រដាប់អាវុធមួយឆាបដែលទាហានឥណ្ឌាប្រយុទ្ធចាញ់ទាហានចិន ៕