បរទេស៖ ក្រោមការតាមដានមើលផ្ទាល់របស់ប្រធានាធិបតីអាមេរិក ក្រុមហ៊ុនអវកាសឯកជនSpaceX បានបាញ់បង្ហោះ ដោយជោគជ័យ យានអវកាស ដែលដឹកអវកាសយានិកអាមេរិក២រូបទៅកាន់ស្ថានីយ៍អវកាសអន្តរជាតិ កាលពីថ្ងៃសៅរ៍។ នេះជាមោទនភាពជាតិមួយខ្ពស់ សម្រាប់អាមេរិក ដែលអាចបញ្ជូនអវកាសយានិក ដោយខ្លួនឯង ពីទឹកដីអាមេរិក និងដោយក្រុមហ៊ុនឯកជនអាមេរិកាំង។
ការបាញ់បង្ហោះដោយជោគជ័យ យានអវកាស របស់ក្រុមហ៊ុនSpaceX ដើម្បីដឹកអវកាសយានិកអាមេរិក ទៅកាន់ស្ថានីយ៍អវកាសអន្តរជាតិ កាលពីថ្ងៃសៅរ៍ គឺជាព្រឹត្តិការណ៍ប្រវត្តិសាស្រ្តមួយសម្រាប់អាមេរិក ព្រោះថា ជិតមួយទសវត្សរ៍មកនេះ អាមេរិកខកខាន មិនដែលបញ្ជូនអវកាសយានិកដោយខ្លួនឯង ចេញពីទឹកដីអាមេរិកនោះទេ។
ថ្លែងនៅក្រោយពិធីបាញ់បង្ហោះយានអវកាស លោកប្រធានាធិបតីអាមេរិក សន្យាថា នឹងបញ្ជូន អវកាសយានិកអាមេរិកឲ្យត្រលប់ទៅបោះទីតាំងអចិន្ត្រៃយ៍ នៅឋានព្រះចន្ទ។ សម្រាប់លោកដូណាល់ត្រាំ អវកាសយានិកស្រ្តីដំបូងគេ ដែលទៅជាន់ឋានព្រះចន្ទ នៅឆ្នាំ ២០២៤ គឺជាជនជាតិអាមេរិកាំង។ ហើយអ្នកដែលទៅដល់ភពអង្គារមុនគេ ក៏ជាជនជាតិអាមេរិកាំងដែរ។
ទីភ្នាក់ងារណាសា ដែលបានផ្សាយបន្តផ្ទាល់ការបាញ់បង្ហោះ រ៉ុកកែតដឹកយានអវកាស របស់ក្រុមហ៊ុនSpaceX ចេញពីមជ្ឈមណ្ឌលអវកាសកេណេឌី បានអះអាងថា មានមនុស្សប្រមាណ១០លាននាក់តាមដានមើលផ្ទាល់ ព្រឹត្តិការណ៍បាញ់បង្ហោះរបស់ក្រុមហ៊ុនSpaceX។ សម្រាប់ប្រធានណាសា លោក Jim Bridenstineថ្ងៃបង្ហោះរ៉ុកកែត របស់ក្រុមហ៊ុនSpaceX គឺជាថ្ងៃអស្ចារ្យសម្រាប់ណាសា ក្រុមហ៊ុន SpaceX និងសម្រាប់ប្រជាជនអាមេរិកាំងទាំងអស់។
នៅថ្ងៃសៅរ៍ បន្ទាប់ពីរារែកដោយសារបញ្ហាអាកាសធាតុ អគ្គនាយកទីភ្នាក់ងារណាសា នៅទីបំផុត ផ្តល់ភ្លើងខៀវ ឲ្យក្រុមហ៊ុនSpaceX បាញ់បង្ហោះយានអវកាស Crew Dragon ដើម្បីដឹកអវកាសយានិក អាមេរិកាំង ពីរូប គឺលោក Douglas Hurley និងRobert Behnken ទៅកាន់ស្ថានីយ៍អវកាសអន្តរជាតិ។
នៅរយៈពេលតែ១០នាទី រ៉ុកកែតFalcon 9 របស់ក្រុមហ៊ុនSpaceX របស់មហាសេដ្ឋី Elon Musk បានបញ្ជូនយានអវកាស Crew Dragon ទៅដល់កំពស់ ២០០គីឡូម៉ែត្រ ពីផែនដី ជាមួយនឹងល្បឿន ២៧០០០គីឡូម៉ែត្រ ក្នុងមួយម៉ោង ពោលគឺលឿនជាងល្បឿនសំឡេងដល់ទៅ២០ដង។ ២០នាទី ក្រោយចាកចេញពីផែនដី យានអវកាសCrew Dragon បានចូលទៅក្នុងគន្លងតារាវិថី ដោយសុវត្ថិភាព។ នៅក្នុងគន្លងតារាវិថី អវកាសយានិកអាមេរិកាំងទាំងពីររូបត្រូវគ្រប់គ្រង បញ្ជាម៉ាស៊ីន ដោយខ្លួនឯង និងត្រូវចំណាយពេល ១៩ម៉ោង មុននឹងអាចទៅតភ្ជាប់យាន ជាមួយស្ថានីយ៍អវកាស នៅថ្ងៃអាទិត្យ។ នៅក្នុងសារសំឡេងមកកាន់ផែនដីអវកាសយានិកDouglas Hurley បានសំដែងការអបអរ សម្រាប់ដំណើរដឹកមនុស្ស របស់រ៉ុកកែត Falcon 9។
ជាមួយនឹងបច្ចេកវិទ្យាទំនើប ចុងក្រោយ ក្រុមហ៊ុនSpaceX ជាអ្នកដំបូងគេដែលចេះច្នៃប្រឌិត ធ្វើឲ្យបំណែក ទី១របស់រ៉ុកកែត អាចត្រលប់មកចុះចត លើផែនដីវិញ ដើម្បីគេយកទៅប្រើសាជាថ្មី ដោយមិនធ្លាក់ ខូចចោល ដូចបេសកកម្មអវកាសរបស់ប្រទេសផ្សេងៗ។ តាំងពីឆ្នាំ ២០១០ ទីភ្នាក់ងារអវកាសណាសា បានចុះកិច្ចសន្យា ជាមួយ ក្រុមហ៊ុនSpaceX របស់មហាសេដ្ឋី Elon Musk ក្នុងទឹកប្រាក់ ៣ពាន់ ១០០លានដុល្លារ សម្រាប់សង់ ផលិតសាកល្បង យានអវកាស Dragon ដើម្បី គោលដៅនៅថ្ងៃអនាគត គឺដំណើរដឹកអវកាសយានិកអាមេរិកាំង ទៅមក ៦ជើង រវាងផែនដី និងស្ថានីយ៍អវកាសអន្តរជាតិ។
តាមទីភ្នាក់ងារណាសា ការបាញ់បង្ហោះលើកនេះ គឺជាការបាញ់បង្ហោះសាកល្បង និងមិនទាន់ចប់នៅឡើយទេ។ ប៉ុន្តែ ប្រសិនបើយានដឹកអវកាសយានិក Dragon អាចត្រលប់មកចុះចតលើផែនដីវិញ ដោយសុវត្ថិភាព នៅប៉ុន្មានខែខាងមុខ (ប្រហែលខែសីហា) ជាមួយនឹងអវកាសយានិកទាំងពីររូប នោះណាសា នឹងផ្តល់អាជ្ញាប័ណ្ណ និងជួលយានCrew Dragon របស់ក្រុមហ៊ុនSpaceX សម្រាប់ធ្វើជាយានតាក់ស៊ី ដឹកមនុស្ស៤នាក់ ទៅកាន់ស្ថានីយ៍អវកាស ជាទៀងទាត់
សម្រាប់ណាសា វាជាបដិវត្តន៍ដ៏ធំមួយ ព្រោះថា ក្រុមហ៊ុនSpaceX បានជួយឲ្យអាមេរិកអាចបញ្ជូន អវកាសយានិក ដោយខ្លួនឯង ពីទឹកដីអាមេរិក និងក្នុងតម្លៃថោក ជាងកម្មវិធីមុនៗរបស់ណាសា។ ទីភ្នាក់ងារណាសាបាននិយាយរួចហើយពីគម្រោងធ្វើពាណិជ្ជកម្ម ជាមួយ ក្រុមហ៊ុនSpaceX ដើម្បី បញ្ជូនយានអវកាស ដឹកមនុស្ស ទៅក្នុងទីអវកាស។ ប្រធានាធិបតីអាមេរិក ដែលបានតាមដានផ្ទាល់ព្រឹត្តិការណ៍បាញ់បង្ហោះយានអវកាសចេញពីរដ្ឋFlorida បានបញ្ជាក់ថា ពាណិជ្ជកម្មអវកាស គឺជាឧស្សាហកម្មមួយសំខាន់ ទៅថ្ងៃអនាគត៕
