រាជធានីភ្នំពេញ៖ នាព្រឹកថ្ងៃទី៦ ខែមីនា ឆ្នាំ២០២០ អ្នកស្រីវេជ្ជបណ្ឌិត ឱ វ៉ាន់ឌីន អ្នកនាំពាក្យក្រសួងសុខាភិបាល បានឲ្យដឹងថា អាជ្ញាធរកម្ពុជា កំពុងស្វែងរកម្ចាស់កង់បីម្នាក់ ដែលធ្លាប់ដឹកបុរសជនជាតិជប៉ុនផ្ទុកវីរុស COVID-19។ តាមការបញ្ជាក់របស់អ្នកស្រី ធ្វើឡើងក្នុងកិច្ចប្រជុំជាមួយក្រុមគ្រូពេទ្យនៅមន្ទីរពេទ្យបង្អែកខេត្តសៀមរាប ជុំវិញករណីបុរសជនជាតិជប៉ុននោះ។
នៅក្នុងនៅកិច្ចប្រជុំជាមួយគ្រូពេទ្យអ្នកស្រី បានថ្លែងថា អាជ្ញាធរ នឹងមើលកាមេរ៉ាសុវត្ថិភាពតាមផ្លូវនានា ដែលថតជាប់ម្ចាស់កង់បី ដឹកបុរសជនជាតិជប៉ុននោះ។ ក្នុងកិច្ចប្រជុំ អ្នកស្រី លើកឡើងថា បុរសជនជាតិជប៉ុននោះ បានជិះកង់បីទៅពិនិត្យសុខភាពនៅមន្ទីរពេទ្យឯកជនមួយ ក្នុងខេត្តសៀមរាប។
យោងតាមដំណើររឿងដែលម្ចាស់មន្ទីរពេទ្យឯកជន បានរៀបរាប់ឲ្យដឹថា ពេលពិនិត្យ បុរសជប៉ុននោះ ក្តៅខ្លួនលើពី៣៧អង្សាសេ និង ក្អក។ គាត់ បន្តថា គាត់ ហាក់ដូចជាសង្ស័យដែរថា បុរសជប៉ុននោះ ឆ្លងវីរុស COVID-19 ម្ល៉ោះហើយទើបទាក់ទងទៅមន្ទីរពេទ្យបង្អែកខេត្តសៀមរាប ដើម្បីឲ្យយកបុរសជប៉ុននោះ ទៅពិនិត្យនិងព្យាបាលបន្ត តែដោយសារខាងមន្ទីរបង្អែកខេត្តសៀមរាប មិនលើកទូរស័ព្ទគាត់ ក៏សម្រេចអនុញ្ញាតឲ្យបុរសជប៉ុននោះ ចាកចេញពីមន្ទីរពេទ្យរបស់ខ្លួន។
អ្នកស្រី ឱ វ៉ាន់ឌីន បន្ទោសម្ចាស់មន្ទីរពេទ្យឯកជននោះថា មានការធ្វេសប្រហែល ដោយមិនព្រមរក្សាបុរសជប៉ុននោះទុកនៅកន្លែងខ្លួនសិន និងមិនទាក់ទងទៅកាន់ក្រសួងសុខាភិបាល ឬមិនព្យាយាមទាក់ទងទៅមន្ទីរពេទ្យបង្អែកខេត្តសៀមរាប តែបែរជាឲ្យគាត់ចាកចេញទៅវិញ។ អ្នកស្រី សង្កត់ធ្ងន់ថា ម្ចាស់មន្ទីរពេទ្យបង្អែកនោះ អាចប្រឈមនឹងផ្លូវច្បាប់។
គួររំលឹកដែរថា ព័ត៌មានពីក្រសួងសុខាភិបាល ជើងហោះហើរលេខ VN814 របស់ក្រុមហ៊ុនអាកាសចរណ៍វៀតណាម ពីសៀមរាប(កម្ពុជា) ទៅទីក្រុងហូជីមិញ នៅថ្ងៃទី៣ ខែមីនា មានអ្នកដំណើរចំនួន៦៧នាក់ និងសមាជិកនាវិក៦នាក់ ។ ក្នុងចំណោមអ្នកដំណើរទាំងអស់ ជនជាតិជប៉ុនម្នាក់អង្គុយនៅលើកៅអីលេខ ៣៣D បន្ទាប់មកផ្ទេរតាមជើងហោះហើរ VN340 ទៅណាហ្គូយ៉ា ប្រទេសជប៉ុន អ្នកដំណើររូបនេះ ត្រូវបានគេបញ្ជាក់ថា វិជ្ជមានសម្រាប់វីរុសកូវីដ-១៩ នៅពេលមកដល់ប្រទេសជប៉ុន ។
បច្ចុប្បន្ន ពលរដ្ឋខ្មែរ៤នាក់ (ស្រី២នាក់) ត្រូវបានដាក់ឲ្យរស់នៅក្នុងបន្ទប់ដាច់ដោយឡែកពីគេ ដើម្បីពិនិត្យសុខភាព បន្ទាប់ពីស្រាវជ្រាវដឹងថា ពួកគេ បានធ្វើការនិងមានទំនាក់ទំនងដោយផ្ទាល់ជាមួយបុរសជប៉ុននោះ ខណៈ៤០នាក់ទៀត (មិនបញ្ជាក់ជនជាតិ) មានទំនាក់ទំនងដោយប្រយោល ហើយត្រូវបានតាមដានសុខភាព ទោះជាមិនដាក់ឲ្យស្ថិតក្នុងបន្ទប់ដោយឡែកក្តី ៕
