ដំណាំននោងជ្រុង គឺជាប្រភេទដំណាំដែលប្រជាកសិករខ្មែរនិយមដាំដុះ ដោយសារតែវាមានការទទួលការគាំទ្រខ្ពស់នៅលើទីផ្សារ ចំណាយដើមទុនតិច ថែមទាំងជាដំណាំងាយនឹងទទួលបានផលលឿនដោយត្រឹមរយៈពេល៤ខែយើងអាចប្រមូលផលវាបាន។
បើតាមបងប្អូនបានដឹងកន្លងមក ននោងជ្រុងយើងត្រូវដាំវាដោយធ្វើទ្រើងឲ្យវាវារឡើង ក៏ប៉ុន្តែក្នុងថ្ងៃនេះយើងនឹងណែនាំពីរបៀបដាំននោងជ្រុងនៅក្នុងផើង ដូចខាងក្រោម៖
១/. ការរៀបចំដាំដុះ ៖
– រៀបចំដី ដែលមានជីជាតិ មានលាយល្បាយជីកំប៉ុស្ត ឬជីលាមកសត្វគោ ក្របីស្ងួត
– ផើងដំណាំ ដែលមានទំហំធំល្មម
– គ្រាប់ពូជននោងជ្រុង
– ចំបើង
– កំណាត់ឫស្សី ដើម្បីធ្វើជាទ្រើង
២/. ការដាំដុះ ៖
– លាងសម្អាតផើងដំណាំ ហើយហាលឱ្យស្ងួត ដើម្បីសម្លាប់មេរោគ
– ចាក់ដីចូលផើងដំណាំ ឬធុងស្នោ
– យកគ្រាប់ពូជននោងជ្រុង ទៅផ្អាប់ទុករយៈពេល២យប់ មុនយកទៅបណ្តុះ
– យកគ្រាប់ទាំងនោះ ទៅដាក់ពង្រាយក្នុងកំណាត់ស្បៃជក់ទឹក ហើយរុំគ្រាប់ឱ្យហាប់ល្អ
– ស្រោចទឹកជារៀងរាល់ថ្ងៃ ដើម្បីឱ្យស្បៃសើមរហូត
– ត្រូវរៀបចំដាំដុះកូនននោងនៅពេលល្ងាចទើបល្អ
– ជ្រើសរើសគ្រាប់ដែលបែកមាត់ចាប ដាក់កប់បណ្តុះក្នុងផើងដំណាំ ដោយកប់ក្នុងជម្រៅកន្លះថ្នាំងដៃ (ចំនួនកូនននោងដែលដាំដុះនៅក្នុងផើងដំណាំ គួរតម្រូវតាមភាពជាក់ស្តែងនៃទំហំផើង)
– ត្រូវស្រោចទឹកជារៀងរាល់ពេលព្រឹក ឬល្ងាចឱ្យជោគ (មិនត្រូវទុកឱ្យដីស្ងួតទេ ព្រោះវានឹងធ្វើឱ្យគ្រាប់ដុះមិនបានល្អ)
– នៅពេលកូនននោងធំប្រមាណកន្លះចំអាម ត្រូវយកចំបើងមកគ្របគល់ដើម្បីរក្សាសំណើមដី
– រក្សាទុកផើងដំណាំកូនននោង នៅទីតាំងដែលមានពន្លៃថ្ងៃគ្រប់គ្រាន់
– យកកំណាត់ឫស្សីមកធ្វើទ្រើងដើម្បីឱ្យននោងវាតោង
៣/. ការថែទាំ ៖
– គួរបន្ថែមជីគោក និងជីទឹក ចូលផើងដំណាំ ដើម្បីរក្សាផលដំណាំ
– ត្រូវស្រោចទឹកឱ្យបានទៀងទាត់ ២ដងក្នុងមួយថ្ងៃ (ព្រឹក និងល្ងាច)
– មិនត្រូវឱ្យដីស្ងួតដាច់ខាត ពិសេសនៅពេលបន្ទាប់ពីកូនននោងចាប់ផ្តើមលូតលាស់ ព្រោះកូនននោងត្រូវការទឹក និងជី ជាចាំបាច់ដើម្បីលូតលាស់
– នៅពេលននោងធំ ចេញផ្កា ត្រូវបន្តស្រោចទឹកឱ្យបានទៀងទាត់ ព្រោះវានឹងជួយឱ្យននោងផ្តល់ផលផ្លែផ្កាបានល្អ
– ត្រូវរក្សាសំណើមដីជានិច្ច តែកុំជោគជាំ ។ បើដីស្ងួតខ្លាំង នឹងធ្វើឱ្យននោងអន់ដើម តែបើដីជោគខ្លាំង នឹងធ្វើឱ្យដើមរលួយឫស និងងាយងាប់ដើម ។
– សម្អាតស្មៅ ចេញពីគល់ដំណាំបើមាន ដើម្បីកម្ចាត់សំបុកសត្វចង្រៃ ៕