សាវម៉ាវជាប្រភេទដើមឈើហូបផ្លែ សមស្របនឹងតំបន់ទាំង ឡាយដែលមានអាកាសធាតុក្តៅ ហើយសើម ចូលចិត្តដីស្អិត ល្បាយដីខ្សាច់លាយដីឥដ្ឋ ស្រទាប់ដាំដុះក្រាស់ សម្បូរសារធាតុបំប៉ននិងជ្រាបទឹកល្អ។ ដើម សាវម៉ាវ ដាំនៅដើមរដូវវស្សាគឺល្អបំផុត (ខ្ទង់ពីខែ មេសា ដល់ ខែ មិថុនា)។
១- ការជ្រើសរើសពូជ៖
បច្ចុប្បន្នមានពូជដើម សាវម៉ាវ យ៉ាងច្រើនដូចជា៖ ដើមសាវម៉ាវ Java ដើមសាវម៉ាវមៀន សាវម៉ាវស្ករ…។ ពង្រីកពូជសាវម៉ាវដោយគ្រាប់ ដោយសាកមែកឬដាំដោយបំបៅ។
២- ការរៀបចំដី៖
ដើមសាវម៉ាវត្រូវបានដាំនៅលើរង។ រងមានទទឹងពី ៧ – ១០ ម៉ែត្រ កម្ពស់របស់រងអាស្រ័យទៅតាមកំរិតកម្ពស់នៃតំបន់នីមួយៗ។ ប្រសិនបើដីទ្រុឌទាបគឺត្រូវពូនដីជាពំនូកនៅពេលដាំ។ ដីពំនូកនោះត្រូវបានច្របល់នឹងជីលាមកសត្វដែលផុយរលួយឬជីត្រីនិងជីស៊ុបពែរ ហ្វូសហ្វាត ០,៣ គីឡូក្រាម។
៣- របៀបដាំ៖
ដាក់ដើមសាវម៉ាវទៅក្នុងរណ្ដៅនៅចំកណ្តាលពំនូកដែលពូនឡើង រួចលុបដីអោយស្មើនឹងមុខនៃថង់កូនពូជ កុំបង្ហាប់ដីណែនពេកនឹងធ្វើអោយដាច់ឫសដើម។ ចន្លោះល្អបំផុតពីដើមមួយទៅដើមមួយ គឺ ៦ម x ៨ម ឬ ពី ៦ម x ៦ម ។ ក្រោយពេលដាំ ត្រូវស្រោចទឹកអោយជោកសព្វ បាំងអោយត្រជាក់និងដាំដើមឈើរាំងខ្យល់អោយ ចម្ការ សាវម៉ាវ ។ បោះជន្លង់ ចងភ្ជាប់ដើមសាវម៉ាវទើបដាំដើម្បីចៀសវាងកុំអោយដួលរលំ។
៤- ជំរះស្មៅ រក្សាសំណើមអោយគល់ ដាក់បន្ថែមដីអោយពំនូកជុំវិញគល់៖
ជំរះស្មៅជារឿយៗ គួបផ្សំនឹងការដាក់ចំបើង ឬស្លឹកចេកនៅគល់ដើម្បីរក្សាសំណើមអោយដើម។ ក្រោយពេលដាំបាន៦ខែ ពូនដីបន្ថែមអោយពំនូកនៅជុំវិញគល់។ ជារៀងរាល់ឆ្នាំត្រូវពូនពំនូកនេះអោយធំទូលាយជាង។
៥- ស្រោចស្រព៖
ចាំបាច់ត្រូវផ្គត់ផ្គង់ទឹកគ្រប់គ្រាន់អោយដើមក្នុងតំណាក់កាលដើមនៅតូច ដើមកំពុងចេញស្លឹក ចេញផ្កាចេញផ្លែនិងពេលដែលផ្លែរីកលូតលាស់។ ជៀសវាងកុំទុកអោយលិច ដក់ទឹកនៅក្នុងចំការវានឹងបណ្ដាលអោយសាវម៉ាវរលួយឫស។
៦– កាត់មែក៖
បង្កើតស្រទាប់ម្លប់ពេលកូនឈើនៅតូច។ ក្រោយពេលប្រមូលផលរួចកាត់ចោលមែកទាំងឡាយណាដែលបានផ្តល់ផ្លែរួច មែកដែលមិនផ្ដល់ផ្លែ មែកដែលត្រូវរងជម្ងឺ…។
៧ -ដាក់ជី៖
សាវម៉ាវគឺប្រភេទឈើត្រូវការអ៊ុយរ៉េនិងប៉ូតាស្យូមយ៉ាងច្រើន។ ឆ្នាំដំបូងដាក់ជីអ៊ុយរ៉េ ០,២ គឺឡូក្រាមនិង ជីប៉ូតាស្យូមក្លរួ (KCL) ០,១ គីឡូក្រាម សំរាប់ឈើមួយដើម ចែកចេញជាពីរលើក។ ឆ្នាំទី ១ និងឆ្នាំទី ២៖ ដាក់ជី អ៊ុយរ៉េពី ០,៣ – ០,៤ គីឡូក្រាម និងជីប៉ូតាស្យូមក្លរួ (KCL) ០,៣ គីឡូក្រាម សំរាប់ឈើមួយដើម។ ក្រៅពីនេះ ប្រើប្រាស់ប្រភេទជីទាំងឡាយបាញ់តាមស្លឹក ដើម្បីផ្គត់ផ្គង់មីក្រូសារធាតុនានា នៅបណ្ដាដំណាក់កាលក្រោយ ពេលកាត់មែកនិងដាក់ផ្លែ ៕
