ផ្លែប៉ាស្យុង(Passion) គឺជាផ្លែឈើមួយប្រភេទដែលមានសក្ដានុពលល្អទាំងនៅក្នុងស្រុក នឹងនៅក្រៅស្រុក ផ្លែនេះដែរត្រូវបានគេពេញនិយមទទួលទានជាទីបំផុត វាមិនត្រឹមតែមានរសជាតិឆ្ងាញ់ប៉ុណ្ណោះទេ ថែមទាំងមានអត្ថប្រយោជន៏យ៉ាងច្រើនដល់សុខភាពទៀតផង។
១/. ការប្រើប្រាស់ពូជស្រស់សម្រាប់ដាំដុះ
– ក្នុងការបណ្ដុះគ្រាប់ត្រូវជ្រើសរើសផ្លែដែលទុំល្អ
– ការប្រើប្រាស់គ្រាប់ពូជស្រស់មានដំណុះគ្រាប់លឿន
– ចំណែកគ្រាប់ស្ងួតដំណុះគ្រាប់ ចំណាយរយៈពេលវែងរហូតដល់រាប់ខែ ។
២/. ការរៀបចំថ្នាលបណ្ដុះកូន
– រៀបចំដាក់ដីក្នុងផើង ឬក្នុងថ្នាលបណ្ដុះកូន ដោយដាក់ជីកំប៉ុស្តកំរាស់ ៩០សង់ទីម៉ែត្រ
– ដាក់គ្រាប់ពូជចូល (កុំឲ្យគ្រាប់គរលើគ្នា)
– រោយជីកំប៉ុស្តពីលើស្ដើងៗ
– ស្រោចទឹកឲ្យជោគ តែកុំឲ្យជាំទឹកគ្រាប់នឹងរលួយខូចអស់ ។
– ស្រោចទឹកជាប្រចាំកាលណាយើងឃើញផ្ទៃខាងលើស្ងួត ។
៣/. ការស្ទូងកូន
– ក្រោយពីសាបគ្រាប់បាន១សប្ដាហ៍កូននឹងចេញពន្លក (ស្លឹក២ដំបូង)
– អាចដកកូនបំបែកមកដាំក្នុងថង់ ថូ ឬក្នុងរណ្ដៅ នៅពេលកូនប៉ាស្យុងមានស្លឹក ៤ទៅ៦សន្លឹក ឬអាយុបាន២សប្ដាហ៍ ទៅ១ខែ
– ចំពោះថង់ ថូ ឬរណ្ដៅត្រូវរៀបចំដីដែលមានជីកំប៉ុស្ត និងស្លឹករុក្ខជាតិស្ងួតលាយជាមួយ ។
៤/. ការរៀបចំរបង ឬទ្រើងសំរាប់វល្លិតោង
– ធ្វើនៅកន្លែងដែលមានពន្លឺថ្ងៃគ្រប់គ្រាន់ អាចរៀបជារបងធ្វើពីឈើងាប់ ឬជាលួសសរសៃ ដើម្បីអោយវល្លិវាតោងបានល្អ។
– ចំពោះទ្រើងវិញ យកល្អធ្វើពីសរសៃលួសប្រទាក់ជារាងចតុកោណកែងទំហំប្រមាណ ១-២តឹក
– កំពស់ទ្រើងខ្ពស់លម្មចន្លោះពី ១-៤ម (ទាបពេកខ្វះពន្លឺ និងពិបាកប្រមូលផល និងខ្ពស់ពេក ពិបាកធ្វើទ្រើង និងពិបាកប្រមូលផល) ។
៥/. ស្រោចទឹក និងដាក់ជី
– ធ្វើការស្រោចទឹក និងដាក់ជីសំខាន់ណាស់នៅពេលចាប់ផ្ដើមដាំដំបូង និងពេលរុក្ខជាតិមុន ចាប់ផ្ដើមផ្កា ។
– ការដាក់ជីត្រូវកាប់ជំរៅ១តឹក ជារង្វង់ជុំវិញដើមប្រើជីកំប៉ុស្តដាក់ចូល ដោយដាក់ចំងាយ ១.៥តឹក ទៅ២តឹកពីគល់រុក្ខជាតិ
– ស្រោចទឹកអោយជោគ ។
៦/. ការតាក់តែងមែក
– ការតាក់តែងមែក គឺកុំអោយមែករុក្ខជាតិដុំស៊ុបទ្រុបពេក ជាទូទៅអាចតាក់តែងមែក ឬវល្លិ បាននៅពេលវាមានអាយុកាល ២-៣ឆ្នាំទៅ
– វល្លិដែលតាក់តែង ឬកាត់ចោល ចំពោះវល្លិដែលចាស់វិញ វល្លិដែលមានជំងឺ ឬវល្លិដែលដុះ ណែនពេក ។
៧/. ការប្រមូលផល
– អាចប្រមូលផលបាននៅពេលដាំបានអាយុ ៦-៨ខែ ។
– ចំពោះអាយុកាលរបស់រុក្ខជាតិនេះអាចអាយុពី៥-៧ឆ្នាំតាមការថែទាំ ។
– ផ្លែដែលទុំល្អអាចប្រមូលផលបានគឺពណ៌ស្វាយក្រហម ឬសំបកផ្លែរាងជ្រួញបន្តិច ៕
