ដំណាំគូលែន មានដើមកំណើតមកពីភាគខាងត្បូងប្រទេសចិន តៃវ៉ាន និងអាស៊ីអាគ្នេយ៏ ជាប្រភេទផ្លែឈើហូបផ្លែ ដែលមានរសជាតិផ្អែមឆ្ងាញ់ ហើយវាត្រូវគេពេញនិយមបរិភោគបំផុតមិនថាក្នុងប្រទេស ឬក៏កៅ្រប្រទេស។ បងប្អូនប្រាកដជាឆ្ងល់ហើយតើគូលែនគេដាំដូចម្ដេច? ហើយដាំយ៉ាងម៉េចទើបទទួលបានទិន្នផលច្រើន? ខាងក្រោមនេះជាបច្ចេកទេសក្នុងការដាំគូលែនដោយបែងចែកច្រើនទៅតាមដំណាក់កាលនីមួយៗ៖
១. ការរៀបចំរណ្តៅ ៖
– ត្រូវជីករណ្តៅ៦តឹកបួនជ្រុង និងជម្រៅ៦តឹក
– រោយកំបោរស ប្រមាណ២ស្លាបព្រាបាយក្នុងរណ្តៅ
– ត្រូវដាក់ផេះ ឬអង្កាម កំប្លោក ចំបើងពុក អាចម៍មាន់ ឬអាចម៍ជ្រូក ឬអាចម៍គោ មួយស្រទាប់កម្រាស់១តឹក រួចដាក់ដីពីលើ១តឹក ធ្វើយ៉ាងនេះ រហូតទាល់តែពេញរណ្តៅ
– ត្រូវទុករណ្តៅ រៀបចំហើយ ក្នុងរយៈពេល២ ទៅ៣សប្តាហ៍
– ចម្ងាយពីរណ្តៅមួយទៅរណ្តៅមួយ មានប្រវែង៨ម៉ែត្រ។
២. ការដាំដុះ ៖
– កូនគូលែន ត្រូវរក្សាផ្សាំទុក១សប្តាហ៍ មុនដាំ
– ផ្អាកស្រោចទឹក២ថ្ងៃមុនដាំ ដើម្បីកុំឱ្យបែកដី និងឫស
– មុនដាំត្រូវជញ្ជូនកូនគូលែនដាក់ក្បែររណ្តៅទាំងអស់
– ត្រូវបកថង់ចេញ ធ្វើយ៉ាងណាកុំឱ្យបែកដី
– កប់កូនគូលែនក្នុងរណ្តៅ ដោយធ្វើយ៉ាងណាឱ្យដីកន្ទោងកូនគូលែន ស្មើមាត់រណ្តៅរួចយកមែកឈើ ដោតក្បែររណ្តៅចងទប់ជាមួយកូនគូលែន
– លប់ដីបន្តិចម្តងៗ ដោយសង្កត់ថ្នមៗ ហាមសង្កត់លើដីកន្ទោងកូនគូលែន ដែលបណ្តាលឱ្យដាច់ឫស។
៣. ការថែទាំ និងដាក់ជី
– ខែវស្សា ត្រូវពូនគល់ ការពារទឹកជាំ នៅគល់បណ្តាលឱ្យរលួយឫស
– នៅដើមរដូវប្រាំង គួរដាក់ជីបំប៉នដោយប្រើជីអាចម៍មាន់ ឬអាចម៍ជ្រូក ឬអាចម៍គោ លាយជាមួយអង្កាមពុក ចំបើង ឬកំប្លោករលួយកាយកប់ក្នុងដីធ្វើជាកំពែង
– ប្រសិនបើកូនគូលែន មានសត្វល្អិតស៊ីត្រួយ ត្រូវប្រើថ្នាំសម្លាប់សត្វល្អិត (ណាតូ)។
៤. ការស្រោចទឹក ៖
– កូនគូលែនអាយុតិចជាង២ឆ្នាំ ត្រូវស្រោចទឹក១ដង ក្នុង១សប្តាហ៍ នៅរដូវប្រាំង
– យើងត្រូវស្រោចទឹកតែម្តងគត់ នៅពេលវាកំពុងផ្កា។
៥. ការកាត់តែងមែក ៖
– ត្រូវកាត់ត្រួយចុងចេញនៅឆ្នាំទីមួយ
– ត្រូវកាត់មែក មិនសូវល្អចេញរៀងរាល់ឆ្នាំដោយទុកតាមប្រព័ន្ធ ១-៣-៦-១៨ (ដើម១ – មែកធំ៣-ខ្នែងធំ៦ និងខ្នែងត្រួយ១៨) បើអាចធ្វើបានជាការល្អ
– នៅពេលផ្លែគូលែនមានទំហំប៉ុនមេដៃ យើងត្រូវបាញ់ថ្នាំសម្លាប់សត្វល្អិត (ណាតូ) ទៅលើផ្លែ ដើម្បីការពារដង្កូវស៊ីផ្លែនៅពេលវាទុំ។
៦. ការប្រមូលផល ៖
– មិនត្រូវបេះផ្លែគូលែនទម្លាក់លើដីទេ
– ត្រូវបេះផ្លែគូលែនឱ្យមានជាប់ទងជាការប្រសើរ ៕