ភ្នំពេញ ៖ នៅក្នុងពិធីប្រគល់សញ្ញាបត្រដល់និស្សិតប៊ែលធី នៅព្រឹកថ្ងៃទី០២ ខែតុលា ឆ្នាំ ២០១៩ ម្សិលមិញ សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា កម្ពុជា មានមាស៣០តោន ដែលតម្កល់ទុកនៅធនាគារប្រទេសស្វីស និង អង់គ្លេស។
សម្ដេចតេជោ ហ៊ុន សែន បានបញ្ជាក់ថា មាសទាំង៣០តោន គឺមាន១២តោន ផ្ញើទុកនៅប្រទេសស្វីស មាស១៥តោន ផ្ញើទុកនៅប្រទេសអង់គ្លេស និងមាស៣តោនទៀតតម្កល់ទុកនៅធនាគារជាតិកម្ពុជា ។ បើសិនជាមានករណីបញ្ហាសេដ្ឋកិច្ចកើតឡើង កម្ពុជាអាចមានលទ្ធផលដោះស្រាយបញ្ហាប្រាក់ខែជូនមន្ត្រីរាជការ និងកងកម្លាំងប្រដាប់អាវុធគ្រប់ប្រភេទបាន ។ មូលហេតុដែលប្រមុខរាជរដ្ឋាភិបាល ហ៊ានអះអាងបែបនេះ ដោយសារសំអាងទៅលើការប្រមូលពន្ធគយ និង សារពើពន្ធផ្សេងៗ ។
សម្ដេច ហ៊ុន សែន សង្កត់ធ្ងន់ថា រយៈពេល ៩ ខែឆ្នាំនេះ ចំណូលពីគយ សម្រេចបាន ១០៥ ភាគរយគឺទទួល បានចំណូលលើសការគ្រោងទុកប្រមាណ ៨០០ លានដុល្លារ និង ពន្ធដារផ្ទៃក្នុងបានជាង ៩៥ ភាគរយ ។ ក្នុងមួយខែកម្ពុជា ទទួលបានចំណូលប្រមាណជា ៥០០ លានដុល្លារ ហើយចាយទៅវិញប្រមាណ៣០០លានដុល្លារ៕
