ខេត្តរតនគិរីៈ បុរសល្មោភកាមម្នាក់ បានចាប់កូនដើមរំលោភសេពសន្ថវៈបានសម្រេចម្ដង មិនឃើញមានការប្ដឹងផ្ដល់ក៏ញ៉ាម ហើយគេចង់សាកម្ដងទៀត តែត្រូវសមត្ថកិច្ចឃាត់ខ្លួន កាលពីម៉ោង១ និង២០នាទីរសៀល ថ្ងៃទី២០ ខែកញ្ញា ឆ្នាំ២០១៨ នៅក្នុងរោងចាំចំការដាច់ស្រយាលមួយ ស្ថិតក្នុងឃុំត្រពាំងច្រេស ស្រុកកូនមុំ។
មន្រ្ដីនគរបាលស្រុកកូនមុំ បានឲ្យដឹងថា ជនសង័្សយជាប់ពាក់ព័ន្ធនឹងករណីចាប់រំលោភកូនស្រីប្ដីដើម ហើយត្រូវសមត្ថកិច្ចឃាត់ខ្លួននោះ ឈ្មោះ ស៊ន សាញ់ អាយុ៣៨ឆ្នាំ មុខរបរជាកសិករ ស្នាក់នៅភូមិ-ឃុំកើតហេតុខាងលើ។ រីឯក្មេងស្រីរងគ្រោះ ឈ្មោះ ក ស អាយុ១៦ឆ្នាំ ជារបរជាកសិករដូចគ្នា។
ក្មេងស្រីរងគ្រោះ បានឲ្យដឹងថា មុនពេលកើតហេតុ ឪពុកចុងរបស់នាងបាននាំនាង រួមទាំងអ្នកភូមិ២ទៅ៣នាក់ទៀត នាចេញពីផ្ទះទៅចម្ការ ដែលមានចម្ងាយពីភូមិប្រហែលជា៥ទៅ៦គីឡូម៉ែត្រ។ លុះពេលទៅដល់ទីនោះ ទាំងឪពុកចុង និងរូបនាងបាននាំគ្នាដាំដំឡូងមី និងសណ្ដែកតាមធម្មតា រហូតមកដល់វេលាម៉ោង១១ថ្ងៃព្រឹក ឪពុកចុង និងអ្នកភូមិបាននាំគ្នាសម្រាកបាយថ្ងៃត្រង់ នៅក្នុងរោងចាំចម្ការនោះ។
ក្មេងស្រីរងគ្រោះ បានបន្តថា បន្ទាប់ពីហូបបាយថ្ងៃត្រង់រួចហើយ អ្នកភូមិបានដើរចេញទៅសម្រាក នៅក្នុងរោងចាំចម្ការរបស់ពួកគេអស់ទៅ នៅសល់តែឪពុកចុង និងរូបនាង។ ស្របពេលឃើញឱកាសស្ងាត់ល្អបែបនេះ ស្រាប់តែឪពុកចុងរបស់នាង បានចាប់នាងរំលោភ តែមិនសម្រេច ដោយនាងសំពះអង្វរខ្លាំងពេក ទើបគាត់ឈប់ទៅវិញ។
ក្មេងស្រីរងគ្រោះ បានបន្តថា តាមពិតទៅ ឪពុកចុងរូបនេះធ្លាប់ចាប់នាងរំលោភម្ដង នៅក្បែរមាត់អូរជិតរោងចាំចម្ការខាងលើ សម្រេចម្ដងរួចមកហើយ កាលពីឆ្នាំ២០១៧ កន្លងទៅ។ ប៉ុន្តែនៅពេលនោះនាងមិនហ៊ានប្រាប់ម្ដាយនាង ដោយសារឪពុកចុងរបស់នាងគំរាមសម្លាប់ បើសិនបើនាងហ៊ានយករឿងហ្នឹងទៅប្រាប់ម្ដាយរបស់នាង ឬអ្នកដទៃ។ ចាប់តាំងពីពេលនោះមក ឪពុកចុងរបស់នាងតែងតែព្យាយាម ចាប់នាងរំលោភជាញឹកញាប់ណាស់ តែមិនសម្រេច។
ក្រោយពេលឃាត់ខ្លួន សមត្ថកិច្ចបាននាំខ្លួនជនសង័្សយទៅកាន់អធិការដ្ឋាននគរបាលស្រុកកូនមុំ ដើម្បីសាកសួរ និងកសាងសំណុំរឿង បញ្ជូនទៅកាន់សាលាដំបូងខេត្ត ចាត់ការតាមច្បាប់៕