ភ្នំពេញ៖ បុរសជនជាតិវៀតណាមម្នាក់ ចូលចិត្តប្រើនូវអំពើហិង្សា វាយតប់ប្រពន្ធ រហូតនាងអត់ទ្រាំលែងបានក៏ចុះចោល ស្រាប់តែបែកគំនិតអាក្រក់ ទិញទឹកអាស៊ីដតាមជះលើប្រពន្ធចំនួន២ដង តែមិនបានសម្រេច ក៏ត្រូវសមត្ថកិច្ចឃាត់ខ្លួន កាលពីវេលាម៉ោង១ និង៣០នាទីរំលងអធ្រាត្រ ឈានចូលថ្ងៃ១៩ ខែកញ្ញា ឆ្នាំ២០១៨នេះ នៅមុខហាងខារ៉ាអូខេ «យេស» ផ្លូវលេខ១០៩ ស្ថិតក្នុងសង្កាត់វាលវង់ ខណ្ឌ៧មករា។
ស្រ្ដីរងគ្រោះ បានឱ្យដឹងថា មុនដំបូង នាង និងជនសង័្សយបានស្គាល់ និងរាប់អានគ្នាយូរៗទៅ ក៏ស្រឡាញ់គ្នា ហើយយកគ្នាជាប្ដីប្រពន្ធ ដោយមិនបានរៀបការ ឬចុះអេតាស៊ីវិលស្របតាមច្បាប់នោះទេ ដោយគ្រាន់តែសែនព្រេនបន្ដិចបន្តួចតែប៉ុណ្ណោះ។ ប៉ុន្តែបន្ទាប់ពីបានរួមរស់នៅជាមួយគ្នាជាប្ដីប្រពន្ធនោះមក ប្ដីរបស់នាងតែងតែប្រើនូវអំពើហិង្សាមកលើនាងជាញឹកញាប់ រហូតនាងអត់ទ្រាំលែងបានក៏ចុះចោល អស់រយៈពេលជាង១ឆ្នាំមកហើយ។
ស្រ្ដីរងគ្រោះ បានបន្ដថា ចាប់តាំងពីពេលនោះមក ប្ដីរបស់នាងតែងតែតាមរកនាងរហូត ទើបនាងគេចខ្លួន មិនព្រមជួបមុខ។ លុះមកដល់វេលាម៉ោង៧ និង៣០នាទីយប់ ថ្ងៃទី៤ ខែកញ្ញា ឆ្នាំ២០១៨កន្លងទៅ ប្ដីរបស់នាងបានជិះម៉ូតូ ម៉ាកហុងដាឌ្រីម ពណ៌ខ្មៅ ពាក់ស្លាកលេខភ្នំពេញ 1FQ-7840 ដឹកមិត្តភក្ដិរបស់គ្នាម្នាក់ទៀត តាមរកនាង ហើយជះទឹកអាស៊ីត មកលើរូបនាង នៅក្បែរហាងខារ៉ាអូខេ «យេស» ។ ប៉ុន្តែនៅពេលនោះ នាងបានលោតចេញពីកង់បីទាន់ ហើយទឹកអាស៊ីដបានខ្ទាតទៅប៉ះដំបូលកង់បីឥណ្ឌា បណ្ដាលឲ្យរងនូវការខូចខាត។
ស្រ្ដីរងគ្រោះ បានបន្តថា បន្ទាប់ពីជនសង័្សយបានវាយប្រហារទឹកអាស៊ីដមកលើរូបនាង មិនបានសម្រេចដូចបំណងហើយ ពួកគេបាននាំគ្នាជិះម៉ូតូគេចខ្លួនបាត់អស់។ ប៉ុន្តែនៅពេលនោះនាងបានយកទូរស័ព្ទថតពីចម្ងាយទុកដែរ តែនាងមិនទាន់បានទៅដាក់ពាក្យបណ្ដឹង។ រហូតមកដល់វេលាម៉ោង១ និង៣០នាទីរំលងអធ្រាត្រ ឈានចូលថ្ងៃ១៩ ខែកញ្ញា ឆ្នាំ២០១៨ មានមិត្តភក្តិរបស់នាងម្នាក់ បានចុចទូរស័ព្ទមកប្រាប់នាងថា ឃើញប្ដីរបស់នាង មកអង្គុយរង់ចាំនៅលើម៉ូតូ ងាកមើលឆ្វេងស្ដាំ នៅជិតហាងខារ៉ាអូខេ «យេស»។
ស្រ្ដីរងគ្រោះ បានបន្តថា ដោយសារមានការសង័្សយពីគំនិតអាក្រក់របស់អតីតប្ដីរបស់នាង ទើបមិត្តភក្ដិម្នាក់នោះ បានប្រាប់នាងឲ្យប្រុងប្រយ័ត្ន។ ក្រោយពេលទទួលបាននូវព័ត៌មានបែបនេះ នាងបានចុចទូរស័ព្ទហៅបងប្រុសរបស់នាង ឲ្យជិះមកមើល។ នៅពេលនោះ បងប្រុសរបស់នាងបានជិះមកដល់ ឃើញប្ដីរបស់នាងកំពុងតែអង្គុយនៅក្បែររទេះលក់សាច់គោអាំង ទើបនាងរាយការណ៍ទៅសមត្ថកិច្ច។
មន្ត្រីនគរបាលខណ្ឌ៧មករា បានឲ្យដឹងថា បន្ទាប់ពីមានសេចក្ដីរាយការណ៍ពីជនរងគ្រោះភ្លាម សមត្ថកិច្ចប៉ុស្តិ៍នគរបាលរដ្ឋបាលវាលវង់ បានចុះទៅដល់ទីនោះ រួចហើយក៏សាកសួរជនសង័្សយ និងសុំឆែកឆេរ ក៏រកឃើញមានដបទឹកអាស៊ីដ ទុកនៅលើម៉ូតូ។ ក្រោយពេលមានភ័ស្ដុតាងជាក់ស្ដែងបែបនេះ ទើបសមត្ថកិច្ចឃាត់ខ្លួនជនសង័្សយ នាំទៅកាន់ប៉ុស្ដិ៍នគរបាលរដ្ឋបាល។
មន្ត្រីនគរបាលខណ្ឌ៧មករា បានបន្តថា ជនសង័្សយ ឈ្មោះ ស៊ឺង អាយុ៥១ឆ្នាំ ជនជាតិវៀតណាម មានលំនៅក្នុងរាជធានីភ្នំពេញ។ រីឯជនរងគ្រោះ ជាប្រពន្ធចុង ឈ្មោះ ក ស មុខរបរបុគ្គលិកហាងខារ៉ាអូខេ មានលំនៅក្នុងរាជធានីភ្នំពេញ។
មន្រ្ដីនគរបាលដដែល បានបន្តថា ក្រោយពេលសាកសួរតាមជំនាញរបស់ខ្លួនរួចមក ជនសង្ស័យបានឆ្លើយសារភាពប្រាប់សមត្ថកិច្ចថា ទឹកអាស៊ីដនៅលើម៉ូតូនេះ គឺគេបានទិញពីកន្លែងលក់អាគុយ ដើម្បីយកមកគំរាមប្រពន្ធ។ ឮបែបនេះ សមត្ថកិច្ចបានសួរបន្ដទៀតថា ចុះកាលពីថ្ងៃទី៤ ខែកញ្ញា ឆ្នាំ២០១៨កន្លងទៅ ម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1FQ-7840 តើអ្នកឯងឲ្យនរណាខ្ចីជិះទេ? ជនសង្ស័យបានឆ្លើយតបនឹងសម្ថកិច្ចថា អត់បានឲ្យអ្នកណាជិះទេ។
ជនសង្ស័យបានឆ្លើយប្រាប់សមត្ថកិច្ចបន្តទៀតថា កាលពីវេលាម៉ោង១១ និង៣០នាទីយប់ ថ្ងៃទី១៨ ខែកញ្ញា ២០១៨ រូបគេបានជិះម៉ូតូខាងលើ ចេញពីផ្ទះសំណាក់ Lucky មកចំណុចមុខហាងខារ៉ាអូខេ «យេស» ដើម្បីតាមដានប្រពន្ធរបស់ខ្លួន (ជនរងគ្រោះ) ដោយបានដាក់ទឹកអាស៊ីដ ក្នុងកែវជ័រដាក់តាមម៉ូតូ។ លុះពេលមកដល់ហាង រូបគេបានអង្គុយផឹកស្រាបៀរអស់២-៣កំប៉ុង រហូតដល់ម៉ោង១ និង៣០នាទីរំលងអធ្រាត្រ ឈានចូលថ្ងៃទី១៩ ខែកញ្ញា ឆ្នាំ២០១៨ ស្រាប់តែបងប្រុសរបស់នាង និងសមត្ថកិច្ចចុះមកឃាត់ខ្លួន នាំទៅប៉ុស្តិ៍តែម្ដង។
ក្រោយពេលមានពាក្យបណ្ដឹងពីជនរងគ្រោះ និងផ្អែកលើចម្លើយសារភាពរបស់ជនសង័្សយផង ទើបសមត្ថកិច្ចបានបញ្ជូនជននេះទៅកាន់អធិការដ្ឋាននគរបាលខណ្ឌ៧មករា ដើម្បីចាត់ការតាមច្បាប់៕
