ខេត្តសៀមរាប៖ អាស្រមមួយខ្នង ត្រូវអគ្គីឆាបឆេះយ៉ាងសន្ធោសន្ធៅ បង្កឲ្យភ្ញាក់ផ្អើលដល់ប្រជាពលដ្ឋ និងសមត្ថកិច្ច កាលពីវេលាម៉ោង៧ និង២០នាទីព្រឹក ថ្ងៃទី១០ ខែកញ្ញា ឆ្នាំ២០១៨ ស្ថិតក្នុងវត្តគោកព្រេច ភូមិវត្តស្វាយ សង្កាត់សាលាកំរើក ក្រុងសៀមរាប។
លោកវរសេនីយ៍ទោ សេន សុវណ្ណនី នាយការិយាល័យនគរបាលបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលខេត្ត បានឱ្យដឹងថា អាស្រមដែលត្រូវអគ្គីឆាបឆេះមានទំហំ៤ម៉ែត្រ គុណនឹង៤ម៉ែត្រ។ អាស្រមនេះមានព្រះសង្ឃមួយអង្គគង់នៅ មានព្រះនាម ពេជ្រ មានព្រះជន្ម៤០ព្រះវស្សា។
លោកនាយការិយាល័យ បានបន្តថា មុនពេលកើតហេតុ ព្រះសង្ឃបានចាក់សោទ្វារកុដិ និងនិមន្តទៅទ្រង់បាត្រអស់។ លុះមកដល់វេលាខាងលើ ស្រាប់តែមានអណ្ដាតភ្លើងឆាបឆេះអាស្រមខាងលើ ទើបប្រជាពលរដ្ឋរាយការណ៍មកសមត្ថកិច្ច។ បន្ទាប់ពីមានសេចក្ដីរាយការណ៍បែបនេះភ្លាម កម្លាំងនគរបាលអន្តរាគមន៍បង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលខេត្ត បានបើករថយន្តពន្លត់អគ្គិភ័យចំនួន៣គ្រឿងទៅជួយបាញ់ទឹកពន្លត់។ ប៉ុន្តែសមត្ថកិច្ចបាញ់ទឹកអស់តែមួយរថយន្ត ធ្វើឲ្យភ្លើងរលត់អស់ទៅវិញ។
លោកនាយការិយាល័យបានបន្តថា នៅក្នុងហេតុការណ៍អគ្គិភ័យ បណ្តាលឲ្យខូចខាត អាស្រមធ្វើអំពីឈើប្រក់សង្ក័សីមួយខ្នង សំភារប្រើប្រាស់មួយចំនួន ប្រាក់ខ្មែរចំនួនជិត១លានរៀល ស្បង់ចីវរ សៀវភៅធម៌ និងទូរសព្ទ័ដៃចំនួន១គ្រឿង។ ទោះជាយ៉ាងណា នៅក្នុងហេតុការណ៍នេះ មិនបានបណ្តាលឱ្យមានគ្រោះថ្នាក់ដល់មនុស្សណាម្នាក់ឡើយ៕