ភ្នំពេញ៖ បន្ទាប់ពីជាប់ឃុំនៅក្នុងពន្ធនាគារត្រពាំងថ្លុង ខេត្តត្បូងឃ្មុំ អស់រយៈពេលជាង១ឆ្នាំនោះមក លោក កឹម សុខា អតីតប្រធានអតីតគណបក្សសង្គ្រោះជាតិ ត្រូវបានតុលាការដោះលែងឲ្យនៅក្រៅឃុំជាបណ្ដោះអាសន្ន កាលពីវេលាទៀបភ្លឺ ថ្ងៃទី១០ ខែកញ្ញា ឆ្នាំ២០១៨។
យោងតាមដីកាបង្គាប់ឲ្យដោះលែងរបស់សាលាដំបូងរាជធានីភ្នំពេញ បានមានខ្លឹមសារថា «បង្គាប់ឲ្យប្រធានមណ្ឌលអប់រំកែប្រែទី៣(ម៣) ដោះលែងជនត្រូវចោទឈ្មោះ កឹម សុខា ភេទប្រុស អាយុ៦៤ឆ្នាំ ត្រូវបានតំណាងអយ្យការ ដាក់ឲ្យស្ថិតនៅក្រោមការពិនិត្យពីបទ សន្និដ្ឋិភាពជាមួយបរទេស ដែលប្រព្រឹត្តនៅក្នុងប្រទេសកម្ពុជា និងទីកន្លែងផ្សេងទៀត កាលពីអំឡុងឆ្នាំ១៩៩៣ ដល់ថ្ងៃទី០៣ ខែកញ្ញា ឆ្នាំ២០១៧។ បទល្មើសព្រហ្មទណ្ឌដែលមានចែង នឹងឲ្យផ្តន្ទាទោសតាមបញ្ញត្តិមាត្រា៤៤៣ ក្រមព្រហ្មទណ្ឌនៃព្រះរាជាណាចក្រកម្ពុជា។
ការដោះលែងលោក កឹម សុខា ត្រូវបានប្រភពព័ត៌មានខ្លះលើកឡើងថា ដោយសារបញ្ហាសុខភាពរបស់លោក កឹម សុខា ផងដែរ។ លោក កឹម សុខា បានទៅដល់ផ្ទះរបស់លោកនៅខណ្ឌទួលគោក នៅវេលាម៉ោងប្រហែល៣ទៀបភ្លឺ ថ្ងៃទី១០ ខែកញ្ញា ឆ្នាំ២០១៨។
លោក ផៃ ស៊ីផាន អ្នកនាំពាក្យ នៃទីស្ដីការគណៈរដ្ឋមន្រ្ដី បានសរសេរនៅលើគណនីហ្វេសប៊ុករបស់លោក នាព្រឹក ថ្ងៃទី១០ ខែកញ្ញា ឆ្នាំ២០១៨ នេះថា «លោក កឹម សុខា បានត្រូវតុលាការដោះលែងឲ្យនៅក្រៅឃុំជាបណ្ដោះអាសន្ន»។
អ្នកនាំពាក្យសាលាដំបូងរាជធានីភ្នំពេញ នៅព្រឹកថ្ងៃទី១០ ខែកញ្ញា ឆ្នាំ២០១៨នេះ បានចេញលិខិតប្រកាសជូនសាធារណជនថា ថ្វីបើលោក កឹម សុខា ត្រូវបានចៅក្រមស៊ើបសួរ ដោះលែងឱ្យនៅក្រៅឃុំជាបណ្តោះអាសន្ន ដោយសារសុខភាពរបស់គាត់ក្ដី ប៉ុន្តែលោក កឹម សុខា មិនអាចរត់គេចខ្លួនពីនីតិវិធីរបស់តុលាការបានឡើយ ពីព្រោះចំណាត់ការរបស់ចៅក្រមស៊ើបសួរកំពុងបន្តអនុវត្តនីតិវិធីរបស់ខ្លួននៅឡើយ។
អ្នកនាំពាក្យសាលាដំបូងរាជធានីភ្នំពេញ បានបញ្ជាក់បន្ថែមទៀតថា «ជនត្រូវចោទឈ្មោះ កឹម សុខា ត្រូវបានចោទប្រកាន់ពីបទ “សន្ទិដ្ឋិភាពជាមួយបរទេស” តាមបញ្ញត្តិ មាត្រា៤៤៣ នៃក្រមព្រហ្មទណ្ឌ នៃព្រះរាជាណាចក្រកម្ពុជា។ សំណុំរឿងនេះកំពុងស្ថិតនៅក្នុងចំណាត់ការរបស់ចៅក្រមស៊ើបសួរ ដែលកំពុងបន្តអនុវត្តនីតិវិធីរបស់ខ្លួន ស្របតាមច្បាប់ជាធរមាន»។
សូមបញ្ជាក់ថា លោក កឹម សុខា ត្រូវបានសមត្ថកិច្ចចាប់ខ្លួន កាលពីរំលងអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧ ដោយសារជាប់ពាក់ព័ន្ធនឹងការប្រព្រឹត្តអំពើ «ក្បត់ជាតិ»។ លោក កឹម សុខា ត្រូវបានតុលាការបញ្ជូនទៅឃុំខ្លួន នៅក្នុងពន្ធនាគារត្រពាំងផ្លុង ខេត្តត្បូងឃ្មុំ ក្រោមការចោទប្រកាន់ពីបទ “សន្ទិដ្ឋិភាពជាមួយបរទេស” តាមមាត្រា ៤៤៣នៃក្រមព្រហ្មទណ្ឌ។
បើតាមក្រមព្រហ្មទណ្ឌកម្ពុជា សន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូសរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ឆ្នាំដល់៣០ឆ្នាំ។
ការចាប់ខ្លួន លោក កឹម សុខា បានធ្វើឡើង បន្ទាប់ពីមានការបែកធ្លាយនូវវីដេអូរបស់លោក ដែលសារភាពអំពីការឃុបឃិតគ្នាជាប្រព័ន្ធជាមួយបរទេស ដើម្បីផ្តួលរំលំរាជរដ្ឋាភិបាលស្របច្បាប់របស់កម្ពុជា ដោយយកលំនាំតាមប្រទេសស៊ែបប៊ី និងយូហ្គោស្លាវី ដែលរាជរដ្ឋាភិបាលចាត់ទុកថា ជាអំពើក្បត់ជាតិ៕
