Liu Wen បង្កើតប្រវត្តិសាស្ត្រថ្មីលើឆាក Victoria’s Secret

កំពូលតារាបង្ហាញម៉ូតជនជាតិចិន Liu Wen បានបន្តបង្ហាញឥទ្ធិពលរបស់ខ្លួននៅក្នុងវិស័យម៉ូតអន្តរជាតិបន្ទាប់ពីបានបង្ហាញខ្លួននៅលើឆាកដើរម៉ូត Victoria’s Secret Fashion Show 2026 ជាលើកទី១០ ដែលជាសមិទ្ធផលដ៏សំខាន់មួយក្នុងអាជីពបង្ហាញម៉ូតរបស់នាង។

ការបង្ហាញខ្លួនលើកនេះរបស់ Liu Wen គូស្នេហ៍ Jing Boran បានកើតឡើងក្នុងកម្មវិធី Victoria’s Secret Fashion Show ឆ្នាំ២០២៦ ដែលរៀបចំឡើងនៅទីក្រុងឡូសអេនជឺឡេស សហរដ្ឋអាម៉េរិកនៅថ្ងៃទី១៨ ខែតុលា ឆ្នាំ២០២៦ ត្រូវនឹងព្រឹកថ្ងៃទី១៩ ម៉ោងនៅកម្ពុជា។ Liu Wen គឺជាតារាម៉ូដែលជើងចាស់ម្នាក់ក្នុងចំណោមតារាបង្ហាញម៉ូតល្បីៗដែលបានវិលត្រឡប់មកដើរលើឆាកដ៏ល្បីល្បាញនេះជាថ្មី។

អ្វីដែលធ្វើឱ្យការបង្ហាញខ្លួនលើកនេះកាន់តែពិសេសគឺវាបាននាំឱ្យ Liu Wen សម្រេចបានចំនួនការបង្ហាញខ្លួនសរុប ១០ លើកនៅលើឆាក Victoria’s Secret ចាប់តាំងពីនាងបង្ហាញខ្លួនជាលើកដំបូងក្នុងឆ្នាំ២០០៩។

កាលពីឆ្នាំ២០០៩ Liu Wen បានបង្កើតប្រវត្តិសាស្ត្រដោយក្លាយជាតារាម៉ូដែលអាស៊ីដំបូងគេដែលបានដើរលើឆាក Victoria’s Secret Fashion Show។ នៅពេលនោះ ការបង្ហាញខ្លួនរបស់នាងត្រូវបានចាត់ទុកថាជាជំហានដ៏សំខាន់មួយសម្រាប់តារាម៉ូដែលអាស៊ីក្នុងការឈានចូលទៅកាន់ឆាកម៉ូដអន្តរជាតិ និងទទួលបានការទទួលស្គាល់ពីឧស្សាហកម្មម៉ូដពិភពលោក។

ចាប់តាំងពីពេលនោះមក Liu Wen បានបន្តកសាងអាជីពរបស់ខ្លួនយ៉ាងរឹងមាំដោយបានចូលរួមក្នុងកម្មវិធីបង្ហាញម៉ូតរបស់ម៉ាកល្បីៗជាច្រើន និងក្លាយជាមុខសញ្ញាដ៏សំខាន់មួយរបស់ឧស្សាហកម្មម៉ូតអន្តរជាតិ។ នាងក៏ត្រូវបានគេស្គាល់ថាជាតារាម៉ូដែលជនជាតិចិនដំបូងគេដែលបានបង្ហាញខ្លួននៅលើគម្របទស្សនាវដ្តី American Vogue តែម្នាក់ឯង និងជាតារាម៉ូដែលអាស៊ីដំបូងគេដែលបានចូលក្នុងបញ្ជីតារាម៉ូដែលដែលមានប្រាក់ចំណូលខ្ពស់បំផុតរបស់ទស្សនាវដ្តី Forbes។

ទោះបីជាដំណើរអាជីពរបស់នាងនៅលើឆាក Victoria’s Secret មិនបានបន្តជាប់ៗគ្នារៀងរាល់ឆ្នាំក៏ដោយ Liu Wen នៅតែអាចរក្សាទំនាក់ទំនងជាមួយម៉ាកម៉ូដដ៏ល្បីល្បាញនេះ និងទទួលបានឱកាសត្រឡប់មកបង្ហាញខ្លួនជាបន្តបន្ទាប់។ នាងបានចូលរួមក្នុងកម្មវិធីនៅឆ្នាំ២០០៩ ដល់ឆ្នាំ២០១២ មុនពេលត្រឡប់មកវិញនៅឆ្នាំ២០១៦ ដល់ឆ្នាំ២០១៨ ហើយបន្តបង្ហាញខ្លួនក្នុងកម្មវិធីដែលបានវិលត្រឡប់មករៀបចំឡើងវិញនៅឆ្នាំ២០២៤ ឆ្នាំ២០២៥ និងឆ្នាំ២០២៦។

ក្រៅពីសមិទ្ធផលនៅលើឆាក Victoria’s Secret Liu Wen ក៏បានបង្ហាញពីភាពលេចធ្លោរបស់ខ្លួនតាមរយៈការធ្វើការជាមួយផ្ទះម៉ូតល្បីៗលំដាប់ពិភពលោកជាច្រើនទៀត។ សមត្ថភាពក្នុងការសម្របខ្លួនទៅនឹងស្ទីលម៉ូតខុសៗគ្នា និងការរក្សាភាពជាអ្នកជំនាញក្នុងអាជីព បានធ្វើឱ្យនាងក្លាយជាតារាម៉ូដែលដែលមានឥទ្ធិពលក្នុងវិស័យនេះ។

ជាមួយនឹងការបង្ហាញខ្លួនលើកទី១០ នៅឆ្នាំ២០២៦ សមិទ្ធផលរបស់ Liu Wen មិនត្រឹមតែឆ្លុះបញ្ចាំងពីភាពជោគជ័យផ្ទាល់ខ្លួនប៉ុណ្ណោះទេប៉ុន្តែថែមទាំងបង្ហាញពីការរីកចម្រើននៃវត្តមានតារាម៉ូដែលអាស៊ីនៅលើឆាកម៉ូតអន្តរជាតិផងដែរ៕