ព្រះកាយច័ន្ទ លើកឡើងបែបនេះទាក់ទងនឹងការប្រើប្រាស់ AI

«AI អាចជាឧបករណ៍ជួយមនុស្ស ប៉ុន្តែសូមកុំឱ្យឧបករណ៍ក្លាយជាអ្នកជំនួសតម្លៃនៃការខិតខំរបស់មនុស្ស»។ នេះគឺពាក្យសម្តីរបស់កញ្ញា ព្រះកាយច័ន្ទ ដែលបានចែករំលែកទស្សនៈរបស់ខ្លួនពាក់ព័ន្ធនឹងការប្រើប្រាស់បច្ចេកវិទ្យា AI ស្របពេលបច្ចុប្បន្ន AI កំពុងវាយលុកយ៉ាងខ្លាំងមិនថាតែនៅប្រទេសដទៃឬក្នុងប្រទេសកម្ពុជានោះទេ។

តាមរយៈសារដែលបានចែករំលែក ព្រះកាយច័ន្ទ បានបញ្ជាក់ថាខ្លួនមិនមានបំណងប្រឆាំងនឹងការប្រើប្រាស់ AI នោះទេ ប៉ុន្តែចង់ស្នើឱ្យអ្នកប្រើប្រាស់មានកម្រិត និងប្រើប្រាស់បច្ចេកវិទ្យានេះឱ្យបានត្រឹមត្រូវ។ ព្រះកាយច័ន្ទ បានលើកឡើងថា អ្វីដែលគួរឱ្យយកចិត្តទុកដាក់ គឺការមិនភ្លេចផ្តល់តម្លៃដល់ការងារដែលកើតចេញពីគំនិត បញ្ញា ទេពកោសល្យ ការខិតខំប្រឹងប្រែង និងកម្លាំងរបស់មនុស្ស។

ក្នុងនោះសារដែលបានបង្ហោះកាលពីល្ងាចថ្ងៃទី២៦ ខែកញ្ញា ព្រះកាយច័ន្ទ បានបញ្ជាក់ថា នៅពីក្រោយស្នាដៃមួយ មិនមែនមានត្រឹមតែផលិតផលចុងក្រោយដែលមើលឃើញនោះទេ ប៉ុន្តែថែមទាំងមានពេលវេលា ការសិក្សា បទពិសោធន៍ និងការខិតខំប្រឹងប្រែងរបស់មនុស្សម្នាក់នៅពីក្រោយស្នាដៃនោះផងដែរ។ ព្រះកាយច័ន្ទ បានសង្កត់ធ្ងន់ថា «AI អាចជាឧបករណ៍ជួយមនុស្សប៉ុន្តែសូមកុំឱ្យឧបករណ៍ ក្លាយជាអ្នកជំនួសតម្លៃនៃការខិតខំរបស់មនុស្ស»។
សាររបស់ ព្រះកាយច័ន្ទ បានផ្តោតសំខាន់លើការប្រើប្រាស់ AI ជាឧបករណ៍ជំនួយ ខណៈដែលការច្នៃប្រឌិត បទពិសោធន៍ និងការខិតខំរបស់មនុស្សនៅតែជាចំណុចដែលគួរត្រូវបានផ្តល់តម្លៃ។

ពាក្យពេចន៍ដែល ព្រះកាយច័ន្ទ លើកឡើងខាងលើនេះបានធ្វើឱ្យអ្នកគាំទ្រចាប់អារម្មណ៍ជាច្រើនជាពិសេសគឺអ្នកតាមដានវិស័យបវរកញ្ញាតែម្តង។ អ្នកមួយចំនួនថែមទាំងខម្មិនទៀតថាប្រសិនជា ព្រះកាយច័ន្ទ ឡើងឆាកឆ្លើយសំណួរបែបនេះប្រាកដជាអាចនឹងគ្រងមកុដមិនខាន៕