អ្នកគាំទ្រចេញការពារតារាចម្រៀង សុគន្ធ និសា ក្រោយមានមតិថា «ចាស់»

វីដេអូមួយរបស់តារាចម្រៀង សុគន្ធ និសា ស្ថិតនៅប្រាសាទព្រះខ័នបានធ្វើឱ្យអ្នកលេងបណ្តាញសង្គមមួយចំនួនបានបញ្ចេញមតិថាតារាចម្រៀងរូបនេះហាក់ដូចជា «ចាស់» ហើយពេលនេះ។ ឃើញមានមតិមួយចំនួនដែលវែកញែកពីសម្រស់របស់អ្នកនាង សុគន្ធ និសា បានធ្វើឱ្យហ្វេនផេកចេញមុខការពារ សូម្បីតែតារាចម្រៀង ប្រេម៉ា ក៏ប្រតិកម្មជំនួស។

ជឿជាក់ថាទស្សនិកជនប្រាកដជាស្គាល់តារាចម្រៀង សុគន្ធ និសា យ៉ាងទូលំទូលាយជាមួយនឹងទឹកដមសំឡេងដ៏ពីរោះក្រលួច ការតុបតែងខ្លួនបែបស្រគត់ស្រគំនិងជាពិសេសកម្រនឹងមានរឿងអាស្រូវមិនល្អក្នុងសង្គមសិល្បៈណាស់។ សិល្បការិនីរូបនេះត្រូវបានចាត់ទុកថាជារៀមច្បងមួយរូបដែលសិល្បករគួរយកគំរូតាម ខណៈតារាចម្រៀងរូបនេះតែងតែទទួលបានការស្រលាញ់ពីមិត្តរួមវិស័យសិល្បៈជាច្រើន។

ទោះបីជាប្រឡូកអាជីពសិល្បៈអស់រយៈពេលជាច្រើនឆ្នាំមកហើយក្តីប៉ុន្តែកេរ្តិ៍ឈ្មោះនិងភាពល្បីល្បាញរបស់តារាចម្រៀង សុគន្ធ និសា នៅតែដក់ជាប់ក្នុងចិត្តមហាជនចំណែកឯសម្រស់ទៀតសោតក៏មានការទទួលស្គាល់ថាអ្នកនាងនៅតែស្រស់ស្អាត។

យ៉ាងណាមិញ វីដេអូមួយនាពេលថ្មីៗនេះរបស់អ្នកនាង សុគន្ធ និសា ក្នុងស្ថិតសំលៀកបំពាក់ប្រពៃណីនិងលើកសក់ខ្ពស់បានជំរុញឱ្យអ្នកលេងបណ្តាញសង្គមមួយចំនួនបញ្ចេញមតិថាតារាស្រីរូបនេះហាក់ដូចជាចាស់ហើយ។ ឃើញមានការលើកឡើងពីសម្រស់របស់តារាចម្រៀង សុគន្ធ និសា ហ្វេនផេករបស់តារាចម្រៀងរូបនេះបានចេញមុខការពារដោយបញ្ជាក់ថាមនុស្សមនុស្សម្នាក់ៗធ្លាប់នៅក្មេងប៉ុន្តែមិនអាចក្មេងជារៀងរហូតនោះទេ។ ក្នុងនាមជាអ្នកគាំទ្រ ពួកគេមិនកោតសរសើរចំពោះអ្នកនាង សុគន្ធ និសា ដោយសារតែរូបរាងនៅក្មេងនោះទេតែកោតសរសើរចំពោះទេពកោសល្យ ការខិតខំប្រឹងប្រែង បទពិសោធន៍ និងការចងចាំដ៏ស្រស់ស្អាត។ អ្នកគាំទ្រលើកឡើងទៀតថាជំនួសឱ្យការវិនិច្ឆ័យលើអាយុឬមានការប្រៀបធៀបសម្រស់ពីមុន គួរអបអរសាទរគ្រប់ដំណាក់កាលនៃជីវិតរបស់សិល្បការិនីរូបនេះ។

មិនត្រឹមតែអ្នកគាំទ្រប៉ុណ្ណោះទេដែលចេញមុខការពារតារាចម្រៀង សុគន្ធ និសា តារាចម្រៀង ប្រេម៉ា ក៏បានចេញមុខប្រតិកម្មទៅកាន់មតិយោបល់វែកញែកទាំងនោះ។ ប្រេម៉ា បានសរសេរថា «អ្នកដែលថាឱ្យគាត់ហ្នឹង ចាស់ទៅអត់បានស្អាតដូចគាត់ទេ»។

គួរឱ្យដឹងថាបច្ចុប្បន្ននេះអ្នកនាង សុគន្ធ និសា មានអាយុ ៤៣ឆ្នាំហើយដូច្នេះបើសម្រស់របស់តារាចម្រៀងរូបនេះមានការប្រែប្រួលវាមិនមែនជារឿងចម្លែកនោះទេ៕