អង្គការបវរកញ្ញាចក្រវាលគាំទ្រ Fatima ជុំវិញពាក្យបណ្តឹងរបស់តាណាវ៉ាត់

MU West ដែលជាដៃគូស្មើគ្នាមួយក្នុងចំណោមដៃគូពីរនៅក្នុងអង្គការ Miss Universe បានគាំទ្រជាសាធារណៈចំពោះ Fátima Bosch Miss Universe 2025 ចំពេលមានជម្លោះផ្លូវច្បាប់ជាមួយ Nawat Itsaragrisil ដោយនិយាយថាស្ត្រីមិនគួរនៅស្ងៀមដើម្បីការពារឱកាស តំណែង ឬក្តីសុបិនរបស់ពួកគេឡើយ។

សេចក្តីថ្លែងការណ៍នេះធ្វើឡើងបន្ទាប់ពី Nawat បាននិយាយនៅលើប្រព័ន្ធផ្សព្វផ្សាយសង្គមថា កិច្ចខិតខំប្រឹងប្រែងកំពុងដំណើរការដើម្បីពន្លឿនដីកាចាប់ខ្លួន Fátima ជនជាតិម៉ិកស៊ិក ទាក់ទងនឹងការចោទប្រកាន់ពីបទបរិហារកេរ្តិ៍ និងការផ្សព្វផ្សាយព័ត៌មានមិនពិត។ Nawat បានបង្ហោះរូបភាពនៃអ្វីដែលហាក់ដូចជាឯកសាររបស់ប៉ូលិសសៀមទាក់ទងនឹងករណីនេះ។

អង្គការបវរកញ្ញាចក្រវាលបាននិយាយថា «អំពើហិង្សា ការបំភិតបំភ័យ ការអាម៉ាស់ ការមិនគោរព និងការប្រព្រឹត្តអាក្រក់លើស្ត្រីក្នុងទម្រង់ណាមួយគឺមិនអាចទទួលយកបានទេ។គ្មានស្ត្រីណាម្នាក់គួរមានអារម្មណ៍ថានាងត្រូវតែនៅស្ងៀមដើម្បីការពារឱកាស ជំហរផ្លូវច្បាប់ ឬក្តីសុបិននោះទេ»។

អង្គការនេះបាននិយាយថា Fátima បាននិយាយការពារសេចក្តីថ្លៃថ្នូររបស់នាងចំពោះរបៀបដែលនាងត្រូវបាន Nawat ប្រព្រឹត្តចំពោះនាង ដោយបន្ថែមថាសកម្មភាពរបស់នាងបានបញ្ជូនសារដ៏ទូលំទូលាយសម្រាប់ស្ត្រី។ «នៅពេលដែល Fátima Bosch បានលើកសំឡេងរបស់នាងដើម្បីការពារសេចក្តីថ្លៃថ្នូររបស់នាងបន្ទាប់ពីការប្រព្រឹត្តដែលនាងទទួលបានពីលោក Nawat នាងបានរំលឹកស្ត្រីគ្រប់ទីកន្លែងអំពីសច្ចភាពជាមូលដ្ឋានមួយការគោរពមិនមែនជាអ្វីដែលយើងរកបានតាមរយៈភាពស្ងៀមស្ងាត់នោះទេ។ វាជាសិទ្ធិ»។

គួរបញ្ជាក់ផងដែរថាជម្លោះផ្លូវច្បាប់នេះមានតាំងពីការប្រឈមមុខដាក់គ្នាយ៉ាងក្តៅគគុកក្នុងអំឡុងពេលសកម្មភាព Miss Universe 2025 នៅទីក្រុងបាងកកនៅថ្ងៃទី៤ ខែវិច្ឆិកា ឆ្នាំ២០២៥ នៅពេលដែល Nawat បានសួរ Bosch ជាសាធារណៈអំពីការចូលរួមរបស់នាងនៅក្នុងព្រឹត្តិការណ៍ដែលទាក់ទងនឹងអ្នកឧបត្ថម្ភ។

ក្រោយមក Fátima បាននិយាយថា Nawat បានហៅនាងថា «ល្ងង់» ហើយបានចោទប្រកាន់ Nawat ថាបានធ្វើឱ្យនាងអាម៉ាស់មុខនៅចំពោះមុខអ្នកចូលរួមប្រកួតផ្សេងទៀត។ វីដេអូនៃការប្រឈមមុខដាក់គ្នាបានផ្ទុះឡើង ហើយបេក្ខនារីជាច្រើននាក់បានដើរចេញដើម្បីគាំទ្រ Fátima។ Nawat បានបដិសេធការលើកឡើងនោះ។ លោកនិយាយថាលោកមិនបានហៅ Fátima ថា «ល្ងង់» ឬ «មនុស្សល្ងង់» នោះទេ ប៉ុន្តែលោកបានប្រើពាក្យថា «ខូចខាត» ជំនួសវិញ ខណៈពេលដែលសំដៅទៅលើផលវិបាកនៃការមិនចូលរួមក្នុងសកម្មភាពដែលបានកំណត់ពេលរបស់នាង។ ក្រោយមកនៅថ្ងៃទី១២ ខែវិច្ឆិកា ឆ្នាំ២០២៥ Nawat បានដាក់ពាក្យបណ្តឹងព្រហ្មទណ្ឌប្រឆាំងនឹង Fátima នៅក្នុងប្រទេសថៃ៕