ពិតអត់? កម្ពុជាអាចនឹងរងឥទ្ធិពលរញ្ជួយដីកម្រិតមធ្យម ក្នុងពេលប៉ុន្មានថ្ងៃខាងមុខ

ផ្ទុះការភ្ញាក់ផ្អើលក្នុងបណ្តាញសង្គម និងបង្កជាក្តីបារម្ភសម្រាប់ពលរដ្ឋ ក្រោយពីមានការចែករំលែកព័ត៌មាន និងការបង្ហោះសារព្រមា.នពីគ្រោះរញ្ជួយដីកម្រិត ៥.០ ទៅ ៦.២mw ថានឹងអាចជះឥទ្ធិពលគ្របដណ្តប់លើប្រទេសវៀតណាម កម្ពុជា ឡាវ និងថៃ។ តើការព្យាករទុកមុននេះជាការពិតដែរឬទេ?
__________________

ផ្ទុះការភ្ញាក់ផ្អើលក្នុងបណ្តាញសង្គម និងបង្កជាក្តីបារម្ភសម្រាប់ពលរដ្ឋ ក្រោយពីផេក «Earthquake News Everyday» ដែលតែងតែបង្ហោះសារព្យាករណ៍គ្រោះរញ្ជួយដី បានបង្ហោះសារព្រមានពីគ្រោះរញ្ជួយដីកម្រិត ៥.០ ទៅ ៦.២ mw ថានឹងអាចជះឥទ្ធិពលគ្របដណ្តប់លើប្រទេសវៀតណាម កម្ពុជា ឡាវ និងថៃ។ តើការព្យាករទុកមុននេះជាការពិតដែរឬទេ?

យោងតាមការបង្ហោះរបស់ Earthquake News Everyday កាលពីថ្ងៃទី២២ ខែសីហា ឆ្នាំ២០២៦ បានឱ្យដឹងថា ប្រទេសទាំង ៤ ខាងលើកំពុងស្ថិតក្នុងតំបន់ដែលមានហានិភ័យខ្ពស់ខ្លាំង (High-Risk Zone) ហើយអាចនឹងជួបគ្រោះរញ្ជួយដីកម្រិតមធ្យមក្នុងរយៈពេល ៥ ទៅ ៧ ថ្ងៃខាងមុខ។ ការជូនដំណឹងនេះ បានធ្វើឱ្យអ្នកប្រើប្រាស់បណ្តាញសង្គម ក៏ដូចជាប្រជាពលរដ្ឋកម្ពុជាមានការភ្ញាក់ផ្អើល និងព្រួយបារម្ភជាខ្លាំង ជុំវិញសុវត្ថិភាពផ្ទាល់ខ្លួន និងក្រុមគ្រួសារ រហូតមានការចែករំលែកតៗគ្នាយ៉ាងលឿន។

ទោះជាយ៉ាងណាក៏ដោយ ការបង្ហោះខ្លឹមសារអំពីការដឹងមុននៃគ្រោះរញ្ជួយដីខាងលើ មិនទាន់អាចយកជាការបាន ១០០ភាគរយបានឡើយ ត្បិតរហូតមកដល់ពេលនេះ គ្មានឧបករណ៍បច្ចេកវិទ្យា ឬអ្នកវិទ្យាសាស្ត្រណាម្នាក់ អាចទស្សន៍ទាយដឹងមុនពីថ្ងៃ ម៉ោង ឬពេលវេលាច្បាស់លាស់ នៃការកើតឡើងនៃគ្រោះរញ្ជួយដីបានឡើយ។ នេះបើយោងតាម ទីភ្នាក់ងារស្ទង់ភូមិសាស្ត្រអាមេរិក (USGS) ដែលជាស្ថាប័នតាមដានការរញ្ជួយដីកម្រិតពិភពលោក បានបញ្ជាក់។ បន្ថែមពីនេះ ស្ថានភាពភូមិសាស្ត្រកម្ពុជា មិនស្ថិតនៅលើខ្សែបំណែកផ្លាកតិចតូនិកសកម្មនោះទេ ហើយក្រសួងធនធានទឹក និងឧតុនិយមកម្ពុជា ក៏ពុំបានចេញសេចក្តីប្រកាសអាសន្នណាមួយឡើយ ពោលគឺបច្ចុប្បន្នកម្ពុជាគ្រាន់តែមានភ្លៀងធ្លាក់លាយឡំផ្គររន្ទះតាមរដូវកាលធម្មតាប៉ុណ្ណោះ។

សរុបមក សារព្រមានពីរឿងគ្រោះរញ្ជួយដីនៅកម្ពុជា គ្រាន់តែជាការទាយស្មានដែលគ្មានមូលដ្ឋានវិទ្យាសាស្ត្រច្បាស់លាស់ពីផេកក្រៅផ្លូវការតែប៉ុណ្ណោះ។ សាធារណជនមិនគួរមានការភ័យស្លន់ស្លោឡើយ ហើយសូមឈប់ចែករំលែកព័ត៌មានចចាមអារ៉ាមទាំងនេះ ដើម្បីជៀសវាងការបង្កភាពវឹកវរ និងត្រូវងាកមកតាមដានតែព័ត៌មានផ្លូវការពីស្ថាប័នជំនាញរបស់រាជរដ្ឋាភិបាល៕