Cheng Yi ត្រូវហ្វេនងប់ងល់ចាប់ឱបទាំងបង្ខំ

តារាសម្តែង Cheng Yi ត្រូវបានអ្នកគាំទ្រស្រលាញ់ងប់ងល់ (sasaeng fan) ចាប់ឱបទាំងបង្ខំ ខណៈអ្នកខ្លះទៀតបានតាមតារាប្រុសនេះជាប់មិនលែងរហូតដល់បន្ទប់ទឹក។

យោងតាមសារព័ត៌មាន Hong Kong 01 ដែលចុះផ្សាយកាលពីថ្ងៃទី១១ ខែសីហា ថា Cheng Yi កំពុងធ្វើដំណើរទៅកាន់ទីក្រុង គុនសាន (Kunshan) ខេត្តជាំងស៊ូ (Jiangsu) ដើម្បីចូលរួមកម្មវិធីមួយ ប៉ុន្តែដំណើររបស់តារាប្រុសរូបនេះត្រូវបានរាយការណ៍ថាមានអ្នកគាំទ្រដែលមានភាពសាទរខ្លាំងជ្រុលជាច្រើននាក់តាមដានលោក។ក្នុងអំឡុងពេលកើតហេតុ អ្នកគាំទ្រម្នាក់ត្រូវបានចោទថា បានបាត់បង់ការគ្រប់គ្រងអារម្មណ៍ រួចរត់សំដៅទៅរកតារាសម្តែង និងឱប Cheng Yi ដោយបង្ខំ។

អ្នកគាំទ្រ sasaeng មួយចំនួនក៏ត្រូវបានគេរាយការណ៍ថា ត្រូវបានគេឃើញដើរតាម Cheng Yi រហូតដល់ច្រកចូលបន្ទប់ទឹក។ យោងតាមអ្នកប្រើប្រាស់អ៊ីនធឺណិតដែលបានឃើញហេតុការណ៍ផ្ទាល់បានឱ្យដឹងថា អ្នកគាំទ្រម្នាក់បានតាមតារាសម្តែងរូបនេះរហូតដល់តំបន់បន្ទប់ទឹក ហើយបានថតរូប Cheng Yi ។ អ្នកគ្រប់គ្រងរបស់ Cheng Yi ត្រូវបានរាយការណ៍ថា បានប្រទះឃើញអ្នកគាំទ្ររូបនោះ ហើយបានចូលមកអន្តរាគមន៍ភ្លាមៗ។ ដើម្បីការពារឯកជនភាព និងសុវត្ថិភាពរបស់តារាសម្តែង អ្នកគ្រប់គ្រងត្រូវបានគេនិយាយថា បានឃាត់អ្នកគាំទ្ររូបនោះ និងទាមទារឱ្យលុបរូបថតដែលបានថតទាំងអស់។

ហេតុការណ៍នេះបានធ្វើឱ្យមានការរិះគន់ពីសំណាក់អ្នកគាំទ្រ ដោយមនុស្សជាច្រើនបានថ្កោលទោសអ្វីដែលពួកគេចាត់ទុកថា ជាអាកប្បកិរិយាហួសហេតុ និងរំលោភបំពានលើភាពឯកជនរបស់សិល្បករ។

បច្ចុប្បន្ន Cheng Yi កំពុងមានកាលវិភាគមមាញឹក ខណៈកំពុងថតរឿងភាគថ្មីដែលមានចំណងជើងថា «Lies Hunter» នៅទីក្រុងហុងកុង។ បន្ទាប់ពីបញ្ចប់ការថតនៅទីនោះ Cheng Yi ត្រូវបានរាយការណ៍ថាបានធ្វើដំណើរឆ្លងកាត់ទីក្រុងសៀងហៃ មុននឹងបន្តទៅកាន់ទីក្រុង Kunshan ជាកន្លែងដែលគាត់បានបង្ហាញខ្លួនជាភ្ញៀវបិទកម្មវិធីក្នុងពិធីប្រគល់ពានរង្វាន់៕