ឡូរីន បញ្ចេញសំណេរមួយខណៈអ្នកគាំទ្រលើកចិត្ត

ឡូរីន បានធ្វើឱ្យអ្នកគាំទ្រជាច្រើនលើកទឹកចិត្តរួមទាំងការពារបន្ទាប់ពីឆ្លងកាត់ការរិះគន់រាប់មិនអស់ចាំតាំងពីផ្តើមស្នេហារហូតដល់បញ្ចប់ស្នេហានៅតែប្រឈមនឹងការវាយប្រហារ។ ជាមួយគ្នានេះ ឡូរីន បានបញ្ចេញសារមួយធ្វើឱ្យទស្សនិកជនចាប់អារម្មណ៍ជាច្រើនស្របពេលអតីតដៃគូបានទម្លាក់បទបង្ហាញពីការឈឺចាប់របស់ខ្លួន។

នៅថ្ងៃទី១១ ខែសីហា ឡូរីន បានបង្ហោះខ្លឹមសារមួយជាភាសាអង់គ្លេសដែលចង់ឆ្លុះបញ្ចាំងពីជីវិតនិងការរស់នៅក្នុងពេលខ្លះរឿងតូចក្លាយជារឿងធំដោយសារតែកិត្តិនាមរបស់ខ្លួន។ ស្រីស្អាត ឡូរីន បានបង្ហាញថា «ជីវិតកំពុងបង្រៀននាងថាមនុស្សអាចនាំមកទាំងសុភមង្គល និងភាពវឹកវរ ប៉ុន្តែការមានកេរ្តិ៍ឈ្មោះល្បីមិនមានន័យថាអ្វីៗដែលអ្នកធ្វើសុទ្ធតែត្រឹមត្រូវនោះទេ។ មនុស្សខ្លះនឹងរង់ចាំមើលការធ្លាក់ចុះរបស់អ្នក ខណៈអ្នកខ្លះទៀតនៅក្បែរអ្នក គ្រាន់តែដើម្បីឆ្លៀតយកប្រយោជន៍»។

ឡូរីន បន្ថែមទៀតថា «ចូរដឹងថាខ្លួនអ្នកជានរណា លើសពីរូបភាពដែលអ្នកបង្ហាញទៅអ្នកដទៃ ហើយចងចាំថាអ្នកជានរណា នៅពេលគ្មាននរណាម្នាក់កំពុងមើល ឬកំពុងចាប់អារម្មណ៍លើអ្នក។ ចូរស្មោះត្រង់ជាមួយខ្លួនឯង និងជាមួយអ្នកដទៃ ហើយទទួលខុសត្រូវចំពោះទង្វើរបស់ខ្លួនឯង។ នៅពេលអ្នកស្ថិតក្រោមពន្លឺនៃការចាប់អារម្មណ៍ សូម្បីតែរឿងតូចតាចបំផុត ក៏អាចក្លាយជារឿងដ៏អស្ចារ្យបានដែរ។ អ្នកក៏មិនអាចវាស់វែងការឈឺចាប់របស់នរណាម្នាក់ តាមរយៈកម្រិតដែលពួកគេជ្រើសរើសបង្ហាញវាបានដែរ។ មនុស្សខ្លះលាក់ទុកការឈឺចាប់របស់ពួកគេយ៉ាងស្ងៀមស្ងាត់ រហូតដល់ថ្ងៃដែលពួកគេលែងអាចនិយាយអំពីវាបានទៀត។ នៅទីបំផុត វាមិនមែនជារឿងថា អ្នកណាឈឺចាប់ខ្លាំងជាងគេ នោះទេ ប៉ុន្តែជាការស្មោះត្រង់គ្រប់គ្រាន់ ដើម្បីយល់ពី ឫសគល់នៃមូលហេតុដែលបង្កឱ្យមានរឿងទាំងនោះតាំងពីដំបូង។ កេរ្តិ៍ឈ្មោះល្បីគឺល្អ ប៉ុន្តែកេរ្តិ៍ឈ្មោះល្បីប្រៀបដូចជាកាំភ្លើង។ កាលណាអ្នកឡើងខ្ពស់កាន់តែច្រើន អ្នកត្រូវប្រុងប្រយ័ត្នក្នុងការកាន់វាកាន់តែខ្លាំង»។

ការលើកឡើងរបស់ ឡូរីន បានធ្វើឱ្យអ្នកគាំទ្របង្ហាញការយល់ចិត្តនិងលើកទឹកចិត្តនាងនិងជំរុញកុំឱ្យសាធារណជនមួយចំនួនបញ្ចេញមតិវែកញែកជុំវិញជីវិតឯកជនរបស់នាង និង វណ្ណដា ពីព្រោះនៅក្នុងទំនាក់ទំនងមានតែពួកគេប៉ុណ្ណោះដែលដឹងច្បាស់ជាងនរណាទាំងអស់។ យ៉ាងណាមិញ មតិមួយចំនួនបានបង្ហាញថា ឡូរីន គឺរងគ្រោះខ្លាំងជាងគេជាមនុស្សស្រីម្នាក់ដែលត្រូវគេរិះគន់តាំងពីដើមមកហើយគ្មាននរណាចេញមុខការពារនាងឡើយ៕