ជា វណ្ណារិទ្ធ ធ្វើឱ្យអ្នកគាំទ្រសរសើរក្រោយបញ្ចេញសកម្មភាពបែបនេះដាក់ភរិយា

ពិធីករ ជា វណ្ណារិទ្ធ ទទួលបាននូវមតិសរសើរជាច្រើនបន្ទាប់ពីរង់ចាំប្រពន្ធបើកទ្វារឱ្យយូរយ៉ាងណាក៏ដោយ ក៏មិនខឹងសម្បារ។ អ្វីដែលធ្វើឱ្យអ្នកទស្សនារំភើបចិត្តភរិយារបស់លោកបញ្ជាក់ថា ១៦ឆ្នាំហើយបុរសម្នាក់នេះនៅតែមិនប្រែ។

នៅយប់ថ្ងៃទី៨ ខែសីហា អ្នកនាង សុភាព ម៉ូល្យ៉ា ហៅ Bella ដែលទស្សនិកបានស្គាល់ថាជាភរិយារបស់ ពិធីករ ជា វណ្ណារិទ្ធ បានចែករំលែករឿងមួយទាក់ទងនឹងស្វាមីដែលរយៈពេល១៦ឆ្នាំហើយមិនប្រែ ខណៈប្រសិនជាខ្លួននាងជាអ្នកជួបប្រទះវិញប្រាកដជាខឹងប្តីខ្លាំងមិនខាន។

ក្នុងការបង្ហោះនោះ ភរិយា ជា វណ្ណារិទ្ធ បានសរសេរថា «រាល់ដងទោះប្តីមានសោរឬអត់ក៏ខ្ញុំសួរ តែថ្ងៃនេះរវល់ក៏ភ្លេចសួរ ចៃដន្យទូរស័ព្ទ Silent ទាំងអស់ គាត់ឈរមុខផ្ទះចាំឡើងយូរ មានអារម្មណ៍ខុសខ្លាំង តែពេលបើកទ្វារភ្លាមគាត់ឡើងធម្មតាហើយនិយាយថាអត់អីទេ។ ខ្ញុំអត់ហ៊ានស្រមៃទេថាបើអ្នកចាំក្រៅផ្ទះគឺជាខ្ញុំ បែបខឹង ងរ ប្តីលួងមិនបាត់ទេ។ មនុស្សអីក៏ល្អយ៉ាងនេះ ១៦ឆ្នាំហើយមិនថាជីវិតជួបអ្វីខ្លះក៏ស៊ូជាមួយគ្នា Thank you so much ជា វណ្ណារិទ្ធ»។

បន្ទាប់ពីទស្សនិកជនបានឃើញការបង្ហោះនេះមានមតិជាច្រើនបានសរសើរសកម្មភាពរបស់ ជា វណ្ណារិទ្ធ ថាជាប្តីល្អ និងប៉ាៗល្អ ដែលជាបុរសមួយរូបមានមនុស្សស្រីជាច្រើនចង់បានការស្រលាញ់មិនប្រែបែបនេះ។
ជាមួយគ្នានេះដែរ នៅពេលឃើញភរិយាសោកស្តាយពីកំហុស និងសរសើរខ្លួន ពិធីករ ជា វណ្ណារិទ្ធ បានបញ្ជាក់ថានៅពេលរង់ចាំប្រពន្ធបើកទ្វារឱ្យលោកក៏បានដើររកទិញមីញុំា ហើយញុំាជិតអស់ប្រពន្ធក៏បើកទ្វារឱ្យល្មម។

សេចក្តីស្រលាញ់ចំពោះគ្រួសាររបស់ពិធីករល្បីឈ្មោះរូបនេះជារឿយៗតែងតែទទួលបាននូវការកោតសរសើរជាច្រើនពីទស្សនិកជន។ ជា វណ្ណារិទ្ធ និងភរិយា បានរៀបអាពាហ៍ពិពាហ៍ កាលពីថ្ងៃទី១៨ ខែមករា ឆ្នាំ២០១៣ ហើយបច្ចុប្បន្នអ្នកទាំងពីរមានកូនប្រុស២នាក់ជាចំណងដៃនៃសេចក្តីស្នេហា៕