ផ្ទុះការខឹ.ងសម្បារពេញបណ្ដាញសង្គមចិន ករណីមន្ត្រីសន្តិសុខអាកាសយានដ្ឋានអន្តរជាតិសុវណ្ណភូមិរបស់ថៃម្នាក់ បានប្រើកាយវិការអគតិ «ទាញកន្ទុយភ្នែកខ្លួនឯងឲ្យតឹង» ដើម្បីប្រមា.ថមើលងាយដល់ក្រុមអ្នកទេសចរ និងអ្នកគាំទ្រជនជាតិចិន។ រឿងរ៉ាវនេះបានឆ្លុះបញ្ចាំងពីសីលធម៌វិជ្ជាជីវៈ និងការខ្វះការគ្រប់គ្រងអារម្មណ៍របស់បុគ្គលិកសេវាកម្មជួរមុខ ដែលបានបង្កឱ្យមានការរិះគ.ន់យ៉ាងចាស់ដៃពីមហាជន និងបង្ខំឱ្យអាជ្ញាធរព្រលានយន្តហោះថៃត្រូវចេញមុខសុំទោសជាសាធារណៈទាំងបង្ខំ។
យោងតាមការចុះផ្សាយព័ត៌មានលម្អិត បានឱ្យដឹងថា ហេតុការណ៍នេះបានផ្ដើមចេញពីភាពវឹកវរដែលបង្កឡើងដោយក្រុមអ្នកគាំទ្រជនជាតិចិនប្រមាណ ២០ នាក់ ដែលបានរត់សម្រុកបំពានវិធានការសន្តិសុខ ដើម្បីដេញតាមថតរូបតារាក្នុងដួងចិត្តរបស់ពួកគេនៅក្នុងព្រលានយន្តហោះសុវណ្ណភូមិ ថៃ។ ដោយសារតែទង្វើខុសឆ្គង បំពានច្បាប់សុវត្ថិភាពអាកាសចរណ៍ និងមិនព្រមសហការ ទើបខាងក្រុមហ៊ុនអាកាសចរណ៍សម្រេចចិត្តចាត់វិធានការហាមឃាត់ក្រុមអ្នកគាំទ្រទាំងនោះមិនឱ្យឡើងលើយន្តហោះឡើយ។ ចំណាត់ការទប់ស្កាត់បទល្មើសសន្តិសុខនេះ ត្រូវបានអ្នកលេងបណ្ដាញសង្គមចិនភាគច្រើនយល់ស្រប និងគាំទ្រយ៉ាងពេញទំហឹង ព្រោះពួកគេយល់ថាការបំពានច្បាប់ព្រលានយន្តហោះពិតជាទង្វើដែលមិនត្រឹមត្រូវមែន។
ទោះជាយ៉ាងណាក៏ដោយ អ្វីដែលជាចំណុចរសើប និងបញ្ឆេះកំហឹងប្រជាជនចិនរាប់លាននាក់ឱ្យផ្ទុះឡើងនោះ គឺឥរិយាបថអគតិរបស់មន្ត្រីសន្តិសុខថៃម្នាក់ ដែលបានឆ្លៀតឱកាសប្រើប្រាស់កាយវិការ «ទាញកន្ទុយភ្នែកខ្លួនឯងឲ្យស្លើត» ដាក់ក្រុមជនជាតិចិនទាំងនោះ។ នៅក្នុងក្រសែភ្នែកសហគមន៍អន្តរជាតិ កាយវិការមួយនេះគឺជាការមើលងាយ និងរើសអើងពូជសាសន៍យ៉ាងធ្ងន់ធ្ងរមកលើជនជាតិអាស៊ីខាងកើត ដែលមិនអាចទទួលយកបានជាដាច់ខាត។ ក្រោយពីវីដេអូនេះបានរីករាលដាលពេញអ៊ីនធឺណិត ថ្នាក់ដឹកនាំអាកាសយានដ្ឋានសុវណ្ណភូមិបានចេញសេចក្តីថ្លែងការណ៍ផ្លូវការសុំទោសជាសាធារណៈ ចំពោះកាយវិការមិនសមរម្យរបស់បុគ្គលិកខ្លួន ព្រមទាំងបានអនុវត្តវិធានការវិន័យតឹងរ៉ឹងទៅលើមន្ត្រីបង្កហេតុរូបនោះដើម្បីស្តារមុខមាត់ឡើងវិញ។
ជារួមមក ព្រឹត្តិការណ៍នេះបានផ្ដលជាមេរៀនដ៏ជូរចត់មួយអំពីការបំពេញការងារនៅតាមច្រកទ្វារអន្តរជាតិ។ ខណៈពេលដែលក្រុមអ្នកគាំទ្រត្រូវបានរំលឹកដាស់តឿនឱ្យស្គាល់ព្រំដែន និងគោរពច្បាប់សន្តិសុខអាកាសចរណ៍ មន្ត្រីសន្តិសុខថៃក៏រងការរិះគន់យ៉ាងធ្ងន់ធ្ងរចំពោះការយកអគតិរើសអើងពូជសាសន៍មកឡូឡំនឹងការងារបច្ចេកទេស។ ទោះបីជាមានការចេញមុខសុំទោស និងដាក់វិន័យក៏ដោយ ប៉ុន្តែស្នាមប្រឡាក់នៃការរើសអើងមួយនេះ បានក្លាយជាមេរៀនដ៏សំខាន់សម្រាប់បុគ្គលិកជួរមុខក្នុងការរក្សាសីលធម៌វិជ្ជាជីវៈ និងសេចក្តីថ្លៃថ្នូរ៕
