អាវរបស់ Jimin ដាក់ដេញថ្លៃបានខ្ពស់ជាងគេរហូតដល់១១ម៉ឺនដុល្លារ

អាវរបស់ Jimin របស់សមាជិក BTS បានក្លាយជាវត្ថុដេញថ្លៃដែលទទួលបានតម្លៃខ្ពស់ជាងគេក្នុងចំណោមរបស់របរជាច្រើនទៀតដែលបានដាក់ដេញថ្លៃបន្ទាប់ពីការសម្តែងនៅឯសម្រាកពាក់កណ្តាលម៉ោងវគ្គផ្តាច់ព្រ័ត្រ World Cup ឆ្នាំ២០២៦។ មានការចែករំលែកថាអ្នកដែលដេញថ្លៃអាវរបស់ Jimin ក្នុងទំហំទឹកប្រាក់១១ម៉ឺនដុល្លារគឺអ្នកគាំទ្រវៀតណាម។

យោងតាមលទ្ធផលចុងក្រោយនៃការដេញថ្លៃ អាវដែល Jimin បានពាក់ក្នុងអំឡុងពេលសម្តែងសម្រាកពាក់កណ្តាលម៉ោងនៅវគ្គផ្តាច់ព្រ័ត្រ World Cup ឆ្នាំ២០២៦ មានតម្លៃ ១១០,០០០ ដុល្លារ ដែលបានក្លាយជាវត្ថុមានតម្លៃថ្លៃបំផុតក្នុងចំណោមវត្ថុទាំង ២៧ ពីកីឡាករ និងសិល្បករដែលចូលរួមក្នុងព្រឹត្តិការណ៍នេះ។ មិនត្រឹមតែប៉ុណ្ណោះ ក៏មានព័ត៌មានបន្ថែមថាអ្នកគាំទ្រវៀតណាបានឈ្នះសម្រាប់ការដេញថ្លៃនេះ ហើយថែមទាំងឈ្នះសម្រាប់ការដេញថ្លៃស្បែកជើងរបស់ RM ក្នុងតម្លៃ ១៩,៨០០ដុល្លារ ដែលធ្វើឱ្យសហគមន៍អ្នកគាំទ្រ BTS ទូទាំងពិភពលោកមានការភ្ញាក់ផ្អើល។

គួរកត់សម្គាល់ថា គោលបំណងរបស់អ្នកគាំទ្រវៀតណាមរូបនេះមិនមែនគ្រាន់តែប្រមូលសម្លៀកបំពាក់ និងស្បែកជើងរបស់តារាល្បីៗរបស់ពួកគេនោះទេ។ បន្ទាប់ពីឈ្នះការដេញថ្លៃ អ្នកគាំទ្ររូបនេះបាននិយាយថាដោយសារតែរូបគេស្រឡាញ់ Jimin ហើយចង់គាំទ្រដល់សប្បុរសធម៌ក៏បានសម្រេចចិត្តដាក់ដេញថ្លៃស្បែកជើងរបស់ RM ផងដែរ។ មនុស្សជាច្រើនជឿថានេះគឺជាប្រតិបត្តិការមួយដែលបង្ហាញពីសេចក្តីស្រឡាញ់ចំពោះ BTS និងរួមចំណែកដល់ការផ្សព្វផ្សាយតម្លៃមនុស្សធម៌ ព្រោះប្រាក់ចំណូលទាំងអស់ពីការដេញថ្លៃនឹងត្រូវប្រើប្រាស់សម្រាប់សកម្មភាពកាត់បន្ថយភាពក្រីក្រតាមរយៈ Global Citizen។

តាមពិតទៅ ចាប់តាំងពីពេលដែលការដេញថ្លៃបានបើកមក ភាពទាក់ទាញនៃទំនិញ BTS បានគ្របដណ្ដប់លើទំនិញដែលនៅសល់ទាំងស្រុង។ តិចជាង ២៤ ម៉ោងបន្ទាប់ពីដាក់ឱ្យដេញថ្លៃ អាវរបស់ Jimin មានតម្លៃ ១៤,០០០ ដុល្លាររួចទៅហើយ ដែលស្ទើរតែបីដងនៃការដេញថ្លៃដំបូង ៥,០០០ ដុល្លារ។ ក្រមារបស់ V ក៏ត្រូវបានលក់ក្នុងតម្លៃ ១៨,០០០ដុល្លារផងដែរ។ ទំនិញរបស់ V និង Jimin លក់បានខ្ពស់ជាងអាវយឺតដែលមានហត្ថលេខារបស់កំពូលតារាបាល់ទាត់អាហ្សង់ទីន Lionel Messi ទៅទៀត។ អាវយឺតរបស់ Messi ត្រូវបានលក់ក្នុងតម្លៃ ១៦,០០០ ដុល្លារ។

នៅពេលដែលការដេញថ្លៃបានបិទ លទ្ធផលកាន់តែគួរឱ្យចាប់អារម្មណ៍ថែមទៀត។ អាវរបស់ Jimin បានបង្កើតកំណត់ត្រាថ្មីមួយជាមួយនឹងតម្លៃ ១១០,០០០ ដុល្លារដែលលើសពីរបស់របរផ្សេងទៀតទាំងអស់។ ក្រមារបស់ V និងអាវធំរបស់ Jungkook ទាំងពីរមានតម្លៃ ៤៦,០០០ ដុល្លារ ខោរបស់ Suga មានតម្លៃ ៣៣,០០០ ដុល្លារ ស្រោមដៃរបស់ J-Hope និងបាល់ដែលមានហត្ថលេខារបស់សមាជិក BTS ទាំង ៧ នាក់មានតម្លៃ ២៨,០០០ដុល្លារ ខណៈដែលស្បែកជើងរបស់ RM ក៏ត្រូវបានដេញថ្លៃដោយជោគជ័យក្នុងតម្លៃ ១៩,៨០០ ដុល្លារនិងខ្សែក្រវ៉ាត់របស់ Jin តម្លៃ ១៦,០០០ ដុល្លារ៕