កុំមើលស្រាលឥទ្ធិពលរបស់ Gen Z ឱ្យសោះ! ផ្អើលពិភពលោក ចលនាមហាជនដឹកនាំដោយយុវជន និងនិស្សិតរាប់សែននាក់ ក្រោមស្លាកឈ្មោះចម្លែក «គណបក្សកន្លាត» ឬ CJP ដើម្បីប្រឆាំងនឹងរឿងអាស្រូវលេចធ្លាយវិញ្ញាសាប្រឡងថ្នាក់ជាតិនៅក្នុងប្រទេសឥណ្ឌា បានបង្កើតជាប្រវត្តិសាស្ត្រថ្មី បង្ខំឱ្យរដ្ឋមន្ត្រីក្រសួងអប់រំដួលរលំធ្លាក់ពីតំណែង និងរុញច្រានឱ្យមានការកែទម្រង់ប្រព័ន្ធនយោបាយ និងការអប់រំទូទាំងប្រទេសយ៉ាងបន្ទាន់បំផុត!
យោងតាមការលាតត្រដាងពីសារព័ត៌មាន The Guardian វិបត្តិបាតុកម្មដ៏ធំនេះបានផ្ទុះឡើងជាហិង្សាយ៉ាងខ្លាំង កាលពីថ្ងៃទី២០ ខែកក្កដា នៅពេលដែលហ្វូងមនុស្សដ៏ច្រើនសន្ធឹកសន្ធាប់ដែលដឹកនាំដោយ «គណបក្សកន្លាត» បានព្យាយាមហែក្បួនឆ្ពោះទៅកាន់វិមានសភា ចេញពីទីតាំងបាតុកម្ម Jantar Mantar ដើម្បីប្រឆាំងនឹងភាពមិនប្រក្រតីនៃការប្រឡងជាតិ។ ទោះបីជាមានការបង្ក្រាបយ៉ាងចាស់ដៃពីសំណាក់កងកម្លាំងប៉ូលិស តាមរយៈការបាញ់ឧស្ម័នបង្ហូរទឹកភ្នែក ប្រើដំបងកៅស៊ូវាយដំ និងការចាប់ខ្លួននិស្សិតអស់ជាង ១០០ នាក់ក៏ដោយ ក៏ចលនាដឹកនាំដោយយុវជនមួយនេះនៅតែមិនព្រមថយក្រោយ ។ ពួកគែបានបង្កើតមូលនិធិផ្លូវច្បាប់ដើម្បីជួយគ្នាទៅវិញទៅមក ព្រមទាំងទទួលបានការគាំទ្រយ៉ាងពេញទំហឹងពីតុលាការកំពូលឥណ្ឌា ដែលបានចេញមុខមកធានា «សិទ្ធិធ្វើបាតុកម្មដោយសន្តិវិធី និងស្របច្បាប់» ក្រោមរដ្ឋធម្មនុញ្ញ ព្រមទាំងបង្គាប់ឱ្យមានការស៊ើបអង្កេតឯករាជ្យលើអំពើឃោរឃៅរបស់ប៉ូលិសថែមទៀតផង។
ចលនាមហាជនរបស់យុវជន Gen Z នេះ បានបង្កើតឱ្យមានការប្រែប្រួលនយោបាយជាប្រវត្តិសាស្ត្រដែលមិនធ្លាប់មានក្នុងរយៈពេល ១២ ឆ្នាំ នៃរដ្ឋាភិបាលរបស់លោកនាយករដ្ឋមន្ត្រី ណារិនដ្រា ម៉ូឌី ដោយបានបង្ខំឱ្យរដ្ឋមន្ត្រីក្រសួងអប់រំ លោក Dharmendra Pradhan ត្រូវដើរចេញពីតំណែងក្រោមសម្ពាធមហាជន។ មិនត្រឹមតែប៉ុណ្ណោះ ឥទ្ធិពលដ៏រឹងមាំរបស់ពួកគេបានបង្ខំឱ្យរដ្ឋាភិបាលឥណ្ឌាត្រូវតែឱនក្បាលទទួលយកការកែទម្រង់ ដោយប្រកាសបង្កើតគណៈកម្មការពិសេសមួយដើម្បីរុះរើប្រព័ន្ធប្រឡងទូទាំងប្រទេសឡើងវិញ។ អាជ្ញាធរក៏បានដាក់ចេញនូវវិធានការច្បាប់ថ្មីទៅកាន់សភាភ្លាមៗ ដើម្បីបង្កើនទណ្ឌកម្មទោសទណ្ឌឱ្យកាន់តែធ្ងន់ធ្ងរបំផុតចំពោះជនណាដែលហ៊ានលួចទម្លាយវិញ្ញាសាប្រឡង ដែលនេះសបញ្ជាក់ឱ្យឃើញថា យុវជនជំនាន់ក្រោយមានសមត្ថភាពពេញលេញក្នុងការរុះរើប្រព័ន្ធដឹកនាំដ៏រឹងមាំ។
.jpg)
ជារួមមក ជ័យជម្នះរបស់ចលនានិស្សិតនៅក្នុងប្រទេសឥណ្ឌា គឺជាភស្តុតាងជាក់ស្តែងមួយដែលបង្ហាញពីអំណាច និងឥទ្ធិពលដ៏មហិមារបស់យុវជន Gen Z ក្នុងការផ្លាស់ប្ដូរប្រព័ន្ធនយោបាយ និងយុត្តិធម៌សង្គមនៅក្នុងប្រទេសរបស់ខ្លួន។ ពីការតវ៉ាតាមបណ្ដាញសង្គមរហូតដល់ការរុញច្រាននៅលើដី យុវជនជំនាន់ក្រោយបានបង្ហាញឱ្យពិភពលោកឃើញថា នៅពេលដែលពួកគេរួមសាមគ្គីគ្នា ប្រឆាំងនឹងការពុករលួយ និងភាពអយុត្តិធម៌ ទោះបីជារដ្ឋាភិបាលមានអំណាចបុណ្យស័ក្តិធំប៉ុនណាក៏ដោយ ក៏ត្រូវតែព្រមស្តាប់ និងធ្វើការផ្លាស់ប្តូរទៅតាមការទាមទារដ៏ស្របច្បាប់របស់ប្រជាពលរដ្ឋដែរ៕
