មិនដឹងខ្លួនខុសកាន់តែផ្គើន កក្កដា សុភ័ណ្ឌ ត្រូវគេលើកឡើងថាធ្វើដើម្បីទាញចំណាប់អារម្មណ៍

មិនទទួលស្គាល់កំហុស មិនទទួលយកការរិះគន់ពីមហាជន មិនចេញមុខសូមទោស ប៉ុន្តែ កក្កដា សុភ័ណ្ឌ កាន់តែផ្គើនលើសដើមដែលសកម្មភាពនេះមនុស្សជាច្រើនជឿថាបុគ្គលរូបនេះធ្វើឡើងដើម្បីទាក់ទាញចំណាប់អារម្មណ៍។

ថ្មីៗនេះនៅលើបណ្តាញសង្គមមានការជជែកវែកញែកទៅលើ កក្កដា សុភ័ណ្ឌ ដែលរស់នៅសហរដ្ឋអាម៉េរិកបានបង្ហោះវីដេអូដែលកំពុងតែហូបមីនិងត្រីខសៀម។ សកម្មភាពនេះបានជំរុញឱ្យមនុស្សជាច្រើនរិះគន់ កក្កដា សុភ័ណ្ឌ ដែលមិនឃើញពីភាពលះបង់ការពលីរបស់កងទ័ពជួរមុខដែលនៅតែប្រើប្រាស់របស់សៀម។ ក្រោយពីមានមតិរិះគន់ កក្កដា សុភ័ណ្ឌ មិនបានទទួលស្គាល់កំហុសរបស់ខ្លួនឬទទួលយកពាក្យរិះគន់របស់បងប្អូនទៅពិចារណាឡើយផ្ទុយមកវិញ កក្កដា សុភ័ណ្ឌ បានចេញវីដេអូផ្គើនពលរដ្ឋខ្មែរលើសដើម។

កក្កដា សុភ័ណ្ឌ Miss Trans Star Cambodia 2025 បានបកស្រាយថាមីនិងត្រីខសៀមរូបគេទិញមកជាយូរមកហើយដោយគ្មានអ្នកណាហូបមីនិងត្រីខជារៀលរាល់ថ្ងៃនោះទេខណៈរាល់ពេលទិញមកម្តងៗគឺច្រើនហើយគ្មានអ្នកណាយកលុយទៅបោះចោលនោះទេ។ កក្កដា សុភ័ណ្ឌ ថែមទាំងបោះពាក្យសម្តីទៅកាន់អ្នករិះគន់ទៀតថារបស់របរជាច្រើនដែលទិញមកពីសៀមគួរតែបោះចោលដែរទៅ ខណៈការហូបនិងការបង្ហោះនេះគឺនៅលើបណ្តាញសង្គមរបស់គេប៉ុណ្ណោះ។ កក្កដា សុភ័ណ្ឌ បន្ថែមថានៅស្រុកអាម៉េរិកនៅម៉ាតអាស៊ីគឺមានផលិតផលសៀមភាគច្រើន ខណៈបុគ្គលនេះថាមានសម្ពាធគ្រាន់តែហូបមីសោះ។

ការឆ្លើយតបរបស់ កក្កដា សុភ័ណ្ឌ ផ្គើននឹងការរិះគន់របស់អ្នកលេងបណ្តាញសង្គម បានជំរុញឱ្យមានមតិជាច្រើនថាបុគ្គលរូបនេះធ្វើដើម្បីតែភាពល្បីល្បាញទាក់ទាញចំណាប់អារម្មណ៍ មិនមែនមិនដឹងថាការបង្ហោះសកម្មភាពហូបរបស់សៀមមានគេខឹងសម្បារ គេរិះគន់ និងជេរនោះទេ៕