ខ្មែរមួយជីវិត គាំទ្រឱ្យ ក្មេងខ្មែរ រំសាយក្រុម ខណៈ KingChi លើកឡើងបែបនេះ

ដំណឹងដែលក្រុមចម្រៀង «ក្មេងខ្មែរ» រំសាយក្រុម មិនត្រឹមតែធ្វើឱ្យសាធារណជនបង្ហាញការភ្ញាក់ផ្អើលនិងស្តាយសោកសម្រាប់ការប្រកាសនេះប៉ុណ្ណោះទេប៉ុន្តែក៏ជំរុញឱ្យសិល្បករមួយចំនួនដូចជាតារារ៉េប ខ្មែរមួយជីវិត និង KingChi និយាយចេញមកដូចគ្នា។

កាលពីល្ងាចថ្ងៃទី២៤ ខែកក្កដា ឆ្នាំ២០២៦ ទំព័រផ្លូវការរបស់ «ក្មេងខ្មែរ» ដែលជាក្រុមចម្រៀងមានសមាជិកពីររូបគឺ ជា សុជាតិ និង កៅ ពន្លឺ បានប្រកាសជាសាធារណៈដោយក្រុមនេះមិនអាចបន្តសកម្មភាពបានទៀតឡើយ។ អ្នកគាំទ្របានបង្ហាញការសោកស្តាយចំពោះដំណឹងនេះប៉ុន្តែពួកគេក៏គោរពតាមការសម្រេចចិត្តរបស់អ្នកទាំងពីរ រួមទាំងអរគុណដល់សិល្បករដែលបង្កើតស្នាដៃលេចធ្លោនិងលើកទឹកចិត្តដល់មនុស្សតាមរយៈបទចម្រៀងរបស់ពួកគេ។

ជុំវិញការប្រកាសរំសាយក្រុម ក្មេងខ្មែរ មិនបានផ្តល់មូលហេតុច្បាស់លាស់នោះទេ ខណៈមុននឹងប្រកាសនេះគេបានឃើញ ជា សុជាតិ និង កៅ ពន្លឺ បានបំពេញការងាររៀងៗខ្លួនមួយរយៈមកហើយ។

ទន្ទឹមនឹងការចែកផ្លូវគ្នារបស់ ក្មេងខ្មែរ តារារ៉េប KingChi បានបង្ហោះនៅលើបណ្តាញសង្គមបង្ហាញពីបទចម្រៀងដែលលោកចូលចិត្តរួមមាន «សៀវភៅកំណត់ហេតុស្នេហ៍»,« វង្វេង »។ លោកក៏បានជូនពរអ្នកទាំងពីរជោគជ័យលើវិថីជីវិត គ្រួសារនិងសិល្បៈដោយបន្តដំណើរទៅមុខទៀត។

ងាកមកកាន់តារារ៉េប ខ្មែរមួយជីវិត វិញបានបង្ហោះនៅលើបណ្តាញសង្គមចេញពីសហរដ្ឋអាម៉េរិកថា «ឮថាក្មេងខ្មែរបំបែកក្រុមហើយ ខ្ញុំគាំទ្រ ព្រោះអីប្អូនៗក៏ចាស់ៗអស់ហើយដែរ ចង់ឱ្យគេហៅក្មេងដល់ណាទៀត »។ ទោះបីជាសំណេរនេះលាយឡំនឹងការលេងសើចបន្តិចក្តីប៉ុន្តែ ខ្មែរមួយជីវិត បានជូនពរឱ្យសមាជិកទាំងពីររូបសំណាងល្អសម្រាប់ដំណើរថ្មី។

គួរបញ្ជាក់ផងដែរថា «ក្មេងខ្មែរ» ត្រូវបានបង្កើតឡើងក្នុងឆ្នាំ២០១៦ ហើយមុននឹងបង្កើតក្រុមនេះ ជា សុជាតិ និង កៅ ពន្លឺ ធ្លាប់បានសហការជាមួយគ្នាផងដែរ។ រយៈពេល១ទសវត្សរ៍នៃការសហការគ្នា សិល្បករទាំងពីរបានបំពេអារម្មណ៍មហាជននិងមានស្នាដៃលេចធ្លោជាច្រើន។ ក្រុម «ក្មេងខ្មែរ» ក៏ធ្លាប់ជ្រកក្នុងទ្រនំបារមីផងដែរ៕