ថ្ងៃទី២៤ ខែកក្កដា ឆ្នាំ២០២៦ វាមានរយៈពេល១ឆ្នាំហើយដែលយោធាថៃបើកការឈ្លានពានមកលើទឹកដីកម្ពុជាដែលធ្វើឱ្យទាហានត្រូវពលី ប្រាង្គប្រាសាទពីដូនតាបែកបាក់ខ្ទេចខ្ទី ពលរដ្ឋស្លូតត្រង់បាត់បង់គ្រួសារ ផ្ទះសម្បែងនិងការឈឺចាប់ដែលមិនអាចបំភ្លេចបាន។ ខួប១ឆ្នាំនេះគេក៏បានឃើញតារាសម្តែងហូលីវូដលោកស្រី Angelina Jolie បានបញ្ចេញសារដ៏ស្មោះស្ម័គ្រមួយដោយសង្ឃឹមថាជនភៀសសឹកដែលនៅសល់នឹងអាចត្រឡប់ទៅផ្ទះវិញ។
នៅលើគណនីអ៊ីនស្រ្តាក្រាមរបស់លោកស្រី Angelina Jolie បានបង្ហោះរូបពីរសន្លឹករបស់ជនភៀសសឹក ព្រមទាំងឆ្លុះបញ្ចាំងពីការស្រលាញ់ដែលប្រជាជនកម្ពុជាមានភាពអន់ធន់រឹងមាំ ដោយសង្ឃឹមថាពួកគេនឹងអាចត្រឡប់ទៅលំនៅដ្ឋានរបស់ខ្លួនវិញ។ លោកស្រីបានរម្លឹកថា «កាលពីមួយឆ្នាំមុន ជម្លោះបានផ្ទុះឡើងតាមបណ្តោយព្រំដែនកម្ពុជា ដែលបានបំផ្លាញសុវត្ថិភាព និងស្ថិរភាពរបស់មនុស្សជាច្រើន។ ឥឡូវនេះមនុស្សជិត ៣០,០០០នាក់នៅតែត្រូវបានផ្លាស់ទីលំនៅក្នុងស្រុក និងមិនអាចវិលត្រឡប់មកផ្ទះវិញបានទេ»។
តារាហូលីវូដ រូបនេះបន្ថែមទៀតថាប្រទេសកម្ពុជាតែងតែជាប្រទេសពិសេសមួយសម្រាប់ខ្លួននិងក្រុមគ្រួសាររបស់លោកស្រីខណៈក៏ជាប្រទេសកំណើតរបស់កូនប្រុសរបស់លោកស្រីដែរ។ លោកស្រី Angelina Jolie បាននិយាយថា «ផ្ទះរបស់យើងនៅទីនេះ ហើយអស់រយៈពេលជាង ២០ ឆ្នាំមកហើយ យើងបានធ្វើការជាមួយក្រុមការងារដែលដឹកនាំដោយមូលដ្ឋានយ៉ាងពេញលេញលើការអភិរក្ស និងអភិវឌ្ឍន៍សហគមន៍។ មូលនិធិ Maddox មានទីស្នាក់ការកណ្តាលនៅលើព្រំដែនដូចគ្នាដែលជម្លោះថ្មីៗនេះបានកើតឡើង។.png)
ខ្ញុំមានកិត្តិយសក្នុងការក្លាយជាមិត្តភក្តិជិតស្និទ្ធជាមួយអ្នកជិតខាង និងក្រុមមូលនិធិ នៅពេលដែលយើងបានដោះមីន និងអភិវឌ្ឍតំបន់នេះជាមួយគ្នា»។ «នៅពេលដែលការប្រយុទ្ធគ្នាបានផ្ទុះឡើងកាលពីឆ្នាំមុន យើងត្រូវជម្លៀសបុគ្គលិក និងក្រុមគ្រួសាររបស់ពួកគេចេញ វាជាការរំលឹកដ៏ឈឺចាប់អំពីថាតើជម្លោះអាចវិលត្រឡប់មកវិញយ៉ាងឆាប់រហ័សប៉ុណ្ណា»។
លោកស្រី Angelina Jolie បានសង្កត់ធ្ងន់ចុងក្រោយជាភាសាខ្មែរថា «ខ្ញុំស្រឡាញ់ប្រទេសមួយនេះ និងប្រជាជនដែលមានភាពរឹងមាំ ព្រមទាំងពោរពេញដោយភាពកក់ក្តៅ និងរួសរាយរាក់ទាក់។ បេះដូងរបស់ខ្ញុំនៅជាមួយអ្នករាល់គ្នា ដែលនៅតែទន្ទឹងរង់ចាំថ្ងៃដែលអាចវិលត្រឡប់ទៅផ្ទះរបស់ខ្លួនវិញ»។
សារដ៏ស្មោះស្ម័គ្ររបស់កំពូលតារាសម្តែងរូបនេះបានធ្វើឱ្យប្រជាជនកម្ពុជាជ្រួលជ្រាបយ៉ាងខ្លាំងពីទំហំទឹកចិត្តរបស់លោកស្រី Angelina Jolie មានចំពោះប្រទេសកម្ពុជា៕
