ឮតែគេនិយាយមិនល្អពី ពេជ្រ វត្តីសារ៉ាវឌ្ឍី តែពេលបានជួប ប៊ី សុធារី ថាផ្ទុយទាំងស្រុង

ពាក្យចចាមអារ៉ាមមិនល្អទាក់ទងនឹងអាកប្បកិរិយារបស់ ពេជ្រ វត្តីសារ៉ាវឌ្ឍី រងការសង្ស័យពីមហាជនអស់រយៈពេលជាយូរមកហើយប៉ុន្តែពេលនេះត្រូវបានលាតត្រដាងដោយ ប៊ី សុធារី ។ ធ្លាប់តែឮពីមាត់មួយទៅមាត់មួយតែពេលបានជួបនិងរាប់អានផ្ទាល់ ប៊ី សុធារី ថា ពេជ្រ វត្តីសារ៉ាវឌ្ឍី មិនដូចជាពាក្យគេនិយាយឡើយ។

នៅក្នុងការ Live របស់ ប៊ី សុធារី កាលពីពេលថ្មីៗនេះបានបង្ហាញថា ចន សុទីម៉ា ពេជ្រ វត្តីសារ៉ាវឌ្ឍី និង ហុក សារិតុលា គឺជាមិត្តភក្តិដែលនៅពីក្រោយ ស្រលាញ់នាងចង់ឱ្យនាងជោគជ័យក្នុងជីវិតទាញនាងឡើងឱ្យទៅជាមួយគ្នា។ បវរកញ្ញារូបនេះបានបង្ហាញថាសំលៀកបំពាក់មួយចំនួននៅក្នុងការប្រកួតគឺជារបស់ ពេជ្រ វត្តីសារ៉ាវឌ្ឍី ខណៈកន្លងមកនាងធ្លាប់បានឮអ្នកផ្សេងនិយាយអាក្រក់ថា វត្តី ជាមនុស្សអាត្មានិយម ចង់ឈ្នះ មិនគួរឱ្យនៅជិតតែនៅពេលនាងបាននៅជិតមិនដូច្នេះឡើយ។

ប៊ី សុធារី ថា ពេជ្រ វត្តីសារ៉ាវឌ្ឍី គឺជាមនុស្សម្នាក់ដែលជំរុញលើកទឹកចិត្តនាងខ្លាំង ដោយសំលៀកបំពាក់របស់នាងកាលពីប្រកួតដំបូងភាគច្រើនគឺជារបស់ ពេជ្រ វត្តីសារ៉ាវឌ្ឍី ដោយសារតែការដាក់ពាក្យរបស់នាងប្រញាប់ប្រញាល់មិនបានរៀបចំច្រើនឡើយ។ អតីតបវរកញ្ញាចក្រវាលកម្ពុជាឆ្នាំ២០១៧ថា ពេជ្រ វត្តីសារ៉ាវឌ្ឍី គឺជាមនុស្សម្នាក់ដែលធ្វើឱ្យសាធារណជននឹកស្មានមិនដល់ ព្រោះនាងធ្លាប់តែឃើញនៅលើបណ្តាញសង្គមឬនៅខាងក្រៅនិយាយមិនល្អពីនាងច្រើនតែពេលបានជួបនិងរាប់អានផ្ទាល់ វត្តី គឺជាមនុស្សម្នាក់ដែលកក់ក្តៅ។

ការដែលធ្វើឱ្យអ្នកទាំងពីរមានភាពជិតស្និទ្ធដោយសារតែនាងនិង ពេជ្រ វត្តីសារ៉ាវឌ្ឍី គឺមានភាពកក់ក្តៅដូចគ្នា មានពេលវេលាយកចិត្តទុកដាក់ចំពោះនាងដែលជាក្តីសុខដោយមិនចាំបាច់ទាមទារឡើយ។ ប៊ី សុធារី បានហៅវាថាជាក្តីស្រលាញ់ពិតប្រាកដពួកគេណែនាំគ្នាទៅវិញទៅមកខណៈ វត្តីចង់ឃើញនាងជោគជ័យក្នុងជីវិត។

ការលាតត្រដាងរបស់ ប៊ី សុធារី ពី ពេជ្រ វត្តីសារ៉ាវឌ្ឍី បានធ្វើឱ្យអ្នកតាមដានវិស័យបវរកញ្ញាមានការចាប់អារម្មណ៍យ៉ាងច្រើនជាពិសេសគឺកោតសរសើរចំពោះការរាប់អាននិងមិត្តភាពមួយនេះ។ លើសពីនេះភាពអវិជ្ជមានកន្លងមករបស់ ពេជ្រ វត្តីសារ៉ាវឌ្ឍី ក៏បានធ្វើឱ្យអ្នកមួយចំនួនចាប់ផ្តើមកែប្រែការពិតរបស់ពួកគេផងដែរ៕