បវរកញ្ញា លីវ ជីលី បានរងនូវមតិប្រតិកម្មយ៉ាងច្រើនពីអ្នកលេងបណ្តាញសង្គមក្នុងនោះក៏មានព្រះសង្ឃដោយចាត់ទុកថាសកម្មភាពរបស់នាងមិនសមរម្យ អត្តចរិតមិនសមជានារីខ្មែរ បន្ទាប់ពីបង្ហោះវីដេអូក្នុងក្លិបកម្សាន្តមួយកន្លែងហើយស្ទាបដើមទ្រូងប្រុសៗ។
លីវ ជីលី បានបង្ហោះវីដេអូមួយកាលពីពេលថ្មីៗនេះដោយបានដាក់ចំណងជើងថា «អត់ពីបងតើឱ្យអូនរស់មិចទៅ»។ មុននឹងការបង្ហោះវីដេអូនេះ លីវ ជីលី បានបង្កើតមាតិកាជាច្រើនជាមួយនឹងលោក ឡៃ ថៃចាន់ ដោយបវរកញ្ញារូបនេះថែមទាំងសុំស្នេហ៍ទៀតផងប៉ុន្តែត្រូវបានខាងប្រុសបដិសេធដោយចាត់ទុកជាប្អូនស្រីប៉ុណ្ណោះ។
តភ្ជាប់ជាមួយនឹងការសុំស្នេហ៍បរាជ័យ លីវ ជីលី បានចូលក្លិបកម្សាន្តដើម្បីបញ្ឈឺទៅកាន់ លោក ឡៃ ថៃចាន់ ព្រមទាំងបានស្ទាបដើមទ្រូងប្រុសៗនោះទៀតផង។ ទោះបីនេះគឺជាការធ្វើមាតិកាក្តីប៉ុន្តែវីដេអូមួយនេះបានទាញមតិប្រតិកម្មពីអ្នកលេងបណ្តាញសង្គមជាច្រើន។ ពួកគេបានរិះគន់ Miss supranational Cambodia 2023 ថាមិនសមជានារីខ្មែរ និងមិនគួរបង្ហោះវីដេអូបែបនេះជាសាធារណៈ។
មិនត្រឹមតែសាធារណជនទូទៅដែលបញ្ចេញមតិរិះគន់ លីវ ជីលី ប៉ុណ្ណោះទេប៉ុន្តែគេក៏ឃើញគណនីបណ្តាញសង្គមព្រះសង្ឃចូលមកបញ្ចេញមតិយោបល់ដូចគ្នា។ មតិខ្លះក៏បានជំរុញឱ្យ លីវ ជីលី លុបវីដេអូនេះពីព្រោះការបង្ហោះបែបនេះវាមិនសមភ្នែកឡើយ៕
