សម្រស់ សុវត្ថិ មុន្នីវណ្ណ ត្រូវអ្នកគាំទ្រលើកឡើងថាស្រដៀង EVAN

តារាចម្រៀង សុវត្ថិ មុន្នីវណ្ណ បានធ្វើឱ្យអ្នកគាំទ្រជាច្រើនចាប់អារម្មណ៍ថាមុខមាត់របស់លោកមានភាពស្រដៀងគ្នាទៅនឹង EVAN ឬ Heeseung អតីតសមាជិកក្រុម Enhypen។ លើសពីនេះទៅទៀតបទថ្មីរបស់ មុន្នីវណ្ណ កំពុងទទួលបាននូវការចាប់អារម្មណ៍យ៉ាងច្រើនទោះបីជាមិនទាន់ចេញពេញក៏ដោយ។

ទស្សនិកជនមួយចំនួនបានដឹងហើយថាតារាចម្រៀង សុវត្ថិ មុន្នីវណ្ណ កូនប្រុសច្បងរបស់ឧកញ៉ា ព្រាប សុវត្ថិ មានរូបសម្បត្តិស្រស់សង្ហាយ៉ាងខ្លាំងជាពិសេសថែមទាំងមានសមត្ថភាពទាំងវិស័យសិល្បៈរួមទាំងចេះទីផ្សារហ៊ុនផងដែរ។ នាពេលថ្មីៗនេះ មុន្នីវណ្ណ បានចេញវីដេអូចម្រៀងខ្លីៗនៃបទថ្មីរបស់ខ្លួនដោយបានទាក់ទាញចំណាប់អារម្មណ៍អ្នកគាំទ្រយ៉ាងឆាប់រហ័ស។

បន្ទាប់ពីរយៈពេលជាង៤ខែនៃបទ «ក្រមុំពេញវ័យ» ថ្មីៗនេះ សុវត្ថិ មុន្នីវណ្ណ បានបង្ហាញពីសញ្ញាវិលត្រឡប់មកវិញជាមួយនឹងបទថ្មីរសជាតិថ្មី ហើយបទដែលមិនទាន់ចេញជាផ្លូវការនេះកំពុងទទួលបាននូវការចាប់អារម្មណ៍យ៉ាងច្រើនពីទស្សនិកជន។ មិនត្រឹមតែបទមានភាពទាក់ទាញប៉ុណ្ណោះទេ ប៉ុន្តែរូបរាងសង្ហារបស់តារាចម្រៀងរូបនេះក៏បានទាក់ទាញអារម្មណ៍ទស្សនិកជនមួយផ្នែកផងដែរ។

មានអ្នកគាំទ្រជាច្រើនបានសរសើរ សុវត្ថិ មុន្នីវណ្ណ ថាស្រស់សង្ហា ជាពិសេសអ្នកមួយចំនួនលើកឡើងថាឃើញតារាចម្រៀងរូបនេះហើយគឺនឹកឃើញទៅដល់តារាចម្រៀង Kpop EVAN តែម្តង។ មតិខ្លះថាមុខមាត់របស់តារាចម្រៀងទាំងពីររូបគឺមានភាពស្រដៀង ថែមទាំងសង្ហាដូចគ្នាទៀត។

សម្រាប់ទស្សនិកជនដែលពុំស្គាល់ EVAN លោកគឺតារាចម្រៀងម្នាក់ដែលពីមុនហៅថា Heeseung អតីតសមាជិកក្រុម Enhypen ដែលជាក្រុម Kpop ដ៏ល្បីល្បាញមួយរបស់ប្រទេសកូរ៉េខាងត្បូង។ ពេលចាកចេញពីក្រុម Heeseung បានសម្រេចចិត្តធ្វើជាសិល្បករឯករាជ្យស្ថិតក្រោមផលិតកម្មដដែលគឺ Belift Lab បុត្រសម្ព័ន្ធរបស់ Hybe ។

គួរបញ្ជាក់ផងដែរថាស្នាដៃលេចធ្លោរបស់ សុវត្ថិ មុន្នីវណ្ណ មានដូចជាបទ«ឃុន នារី» «My Angel» «នាងអើយ» និងបទចុងក្រោយនេះដែលពុំទាន់ចេញជាផ្លូវការ៕