មេបក្សប្រឆាំងថៃជំរុញឱ្យ Anutin លើកកម្ពស់កិច្ចសហការព្រំដែនជាមួយម៉ាឡេស៊ី ដើម្បីដោះស្រាយវិបត្តិសេដ្ឋកិច្ច

«តើការចាប់ដៃគ្នារវាងម៉ាឡេស៊ី និងថៃ អាចជួយដោះស្រាយវិបត្តិ និងស្រោចស្រង់សេដ្ឋកិច្ចថៃ ដែលកំពុងតែជាប់គាំងបានដែរឬទេ?» នេះជាសំណួរដ៏ក្តៅគគុក បន្ទាប់ពីមេបក្សប្រឆាំងថៃបានចេញមុខជំរុញឱ្យលោកនាយករដ្ឋមន្ត្រី Anutin Charnvirakul ពន្លឿនកិច្ចសហការព្រំដែនជាបន្ទាន់ ពីព្រោះមើលឃើញថា ព្រំដែនជាប់គ្នា ប៉ុន្តែសេដ្ឋកិច្ចថៃបែរជាដើរថយក្រោយ។ ការជំរុញនេះ អាចជាឱកាសចុងក្រោយដើម្បីស្តារសេដ្ឋកិច្ចថៃនៅតំបន់ភាគខាងត្បូង និងជំរុញពាណិជ្ជកម្មទ្វេភាគីឱ្យហក់ឡើងវិញ។

ដំណើរទស្សនកិច្ចផ្លូវការរបស់នាយករដ្ឋមន្ត្រីថៃ លោក Anutin ទៅកាន់ប្រទេសម៉ាឡេស៊ី ចាប់ពីថ្ងៃទី៩ ដល់ថ្ងៃទី១០ ខែកក្កដា ឆ្នាំ២០២៦ គឺជាឱកាសយុទ្ធសាស្ត្រដ៏សំខាន់ ដែលមេដឹកនាំគណបក្សប្រឆាំង លោក Natthaphong Ruengpanyawut បានជំរុញឱ្យរដ្ឋាភិបាលថៃប្រើប្រាស់ដើម្បីលើកកម្ពស់កិច្ចសហការព្រំដែន ព្រមទាំងដោះស្រាយវិបត្តិសេដ្ឋកិច្ច និងសន្តិសុខនៅតាមព្រំដែនប្រទេសទាំងពីរ។

កាលពីថ្ងៃទី៩ ខែកក្កដា លោក Natthaphong ប្រធានគណបក្សប្រជាជន ដែលជាគណបក្សប្រឆាំង បាននិយាយពីដំណើរទស្សនកិច្ចរបស់នាយករដ្ឋមន្ត្រីថៃទៅកាន់ម៉ាឡេស៊ី ថា លោក Anutin គួរប្រើប្រាស់ឱកាសនេះដើម្បីលើកកម្ពស់ទំនាក់ទំនងរវាងម៉ាឡេស៊ី-ថៃឱ្យកាន់តែល្អប្រសើរ រួមទាំងពង្រឹងកិច្ចសហការលើវិស័យជាច្រើន ជាពិសេស កិច្ចសហការព្រំដែន ដែលដើរតួនាទីជាច្រកទ្វារសេដ្ឋកិច្ច និងសន្តិសុខយ៉ាងសំខាន់។

មេបក្សប្រឆាំងជំរុញឱ្យរដ្ឋាភិបាលថៃពិភាក្សាពីការអភិវឌ្ឍច្រកព្រំដែន សាដៅ (SADAO) នៅស្រុកសាដៅ ខេត្តសុងក្លា ដោយផ្តល់ភាពងាយស្រួលដល់ការធ្វើដំណើររបស់ភ្ញៀវទេសចរ, សម្រួលការដឹកជញ្ជូនទំនិញ, ប្រើប្រាស់បច្ចេកវិទ្យាសម្រួលការឆ្លងកាត់ព្រំដែន ដូចជា ត្រួតពិនិត្យអ្នកដំណើរ ត្រួតពិនិត្យទំនិញឆ្លងកាត់ និងបញ្ជូនទិន្នន័យរវាងស្ថាប័ននៃប្រទេសទាំងពីរ ក៏ដូចជាពិភាក្សាពីការលុបបំបាត់អំពើពុករលួយនៅព្រំដែន ដែលជាឧបសគ្គរាំងស្ទះការអភិវឌ្ឍរួម។ ក្រៅពីនេះ រដ្ឋាភិបាលថៃគួរពន្លឿនកិច្ចសហការដោះស្រាយបញ្ហាជួញដូរថ្នាំញៀន ប្រេងឥន្ធនៈ លុបបំបាត់ការនាំទំនិញឆ្លងដែនខុសច្បាប់ និងឧក្រិដ្ឋកម្មឆ្លងដែន។

លោកបន្តថា កសិករថៃជួបការលំបាកយ៉ាងខ្លាំង ដោយសារម៉ាឡេស៊ីផ្អាកនាំចូលបង្គាពីប្រទេសថៃ បើទោះជាខាងថៃប្រកាសថា ម៉ាឡេស៊ីព្រមព្រៀងនាំចូលបង្គាថៃឡើងវិញក្តី ដូច្នេះ លោក Anutin គួរប្រើប្រាស់ឱកាសនេះ ជជែកជាមួយម៉ាឡេស៊ីឱ្យព្រមនាំចូលបង្គាថៃឱ្យបានឆាប់រហ័សដើម្បីដោះស្រាយទុក្ខលំបាករបស់កសិករចិញ្ចឹមបង្គា។ លោកសង្ឃឹមថា ដំណើរទស្សនកិច្ចទៅម៉ាឡេស៊ីលើកនេះ នឹងអាចលើកកម្ពស់គោលនយោបាយការបរទេស ដើម្បីនាំមកនូវផលប្រយោជន៍ច្រើនដល់ពលរដ្ឋ ដោយផ្តោតលើការជំរុញព្រំដែនម៉ាឡេស៊ី-ថៃ ទៅជាតំបន់សេដ្ឋកិច្ច សន្តិសុខ និងទេសចរណ៍។

សូមរំឭកថា គោលបំណងសំខាន់នៃដំណើរទស្សនកិច្ចរបស់លោក Anutin គឺជជែកជាមួយលោកនាយករដ្ឋមន្ត្រី Anwar Ibrahim ពីការដោះស្រាយបញ្ហាម៉ាឡេស៊ីផ្អាកនាំចូលបង្គាថៃ និងស្តារពាណិជ្ជកម្មទ្វេភាគី។ ក្រៅពីនេះ លោក Anutin បានលើកយកបញ្ហាហិង្សា និងអសន្តិសុខនៅព្រំដែនភាគខាងត្បូងមកពិភាក្សា ក៏ដូចជាការបង្កើតតំបន់សេដ្ឋកិច្ចពិសេសតាមព្រំដែនដើម្បីទាក់ទាញការវិនិយោគ និងលើកកម្ពស់ជីវភាពពលរដ្ឋ។ ដំណើរទស្សនកិច្ចនេះ ត្រូវបានគេមើលឃើញថា គឺជាជំហានវិជ្ជមានឈានដើម្បីផ្លាស់ប្តូរទំនាក់ទំនងពីភាពតានតឹង ទៅជាកិច្ចសហការយូរអង្វែងរវាងប្រទេសជិតខាងទាំងពីរ៕