កម្ពុជាបញ្ជាក់ជំហរមិនជំទាស់ថៃរឿងសាងសង់របងព្រំដែន ប៉ុន្តែទាមទារឲ្យការឯកភាពពី JBC ជាមុនសិន

បើទោះជាកំណាត់ព្រំដែនចន្លោះបង្គោលលេខ ៥២ ដល់ ៥៩ ក្នុងខេត្តបាត់ដំបង ត្រូវបានឯកភាពគ្នារួចរាល់ដោយគ្មានវិវាទក៏ដោយ ប៉ុន្តែសកម្មភាពបន្តធ្វើរបងដោយស្ងាត់ៗរបស់យោធាថៃនៅតែជាទង្វើខុសឆ្គង។ ក្នុងនោះមន្ត្រីជំនាញជាន់ខ្ពស់ផ្នែកកិច្ចការព្រំដែនរបស់កម្ពុជា បានចេញបញ្ជាក់ចំៗថា កម្ពុជាមិនជំទាស់រឿងធ្វើរបងព្រំដែននោះទេ ប្រសិនជាវាត្រឹមត្រូវតាមបច្ចេកទេស ហើយស្ថិតនៅក្នុងទឹកដីរបស់ថៃនោះ។

យោងតាមការបកស្រាយផ្លូវការរបស់ លោក ស្រ៊ឺ បូរ៉ា អគ្គនាយកកិច្ចការបច្ចេកទេសព្រំដែន កាលពីថ្ងៃទី៣០ ខែមិថុនា ឆ្នាំ២០២៦ នៅក្នុងកិច្ចពិភាក្សាតុមូល ស្តីពី «ការធ្វើរបងជាឯកតោភាគីរបស់ថៃ នៅចន្លោះបង្គោលលេខ ៥២ និង៥4 ព្រំប្រទល់រវាងខេត្តបាត់ដំបង (កម្ពុជា) និងខេត្តចាន់បូរី (ថៃ)» បានលាតត្រដាងថា កំណាត់ព្រំដែនត្រង់ចំណុចជាប់ស្រុកកំរៀង ខេត្តបាត់ដំបងនេះ ត្រូវបានភាគីកម្ពុជា និងថៃ សម្រេចឯកភាពគ្នាយ៉ាងច្បាស់លាស់តាំងពីឆ្នាំ២០០៨ មកម៉្លេះ ទាំងលើទីតាំងបង្គោលព្រំដែន គំនូសខ្សែព្រំដែន និងឯកសារទ្វេភាគី ផ្អែកលើច្បាប់ចម្លងផែនទីខ្នាត ១/២០០,០០០។

ឈានមកដល់ឆ្នាំ២០២៥ ក្រុមការងារវាស់វែងចម្រុះនៃប្រទេសទាំងពីរ ក៏បានចុះវាស់វែង និងបោះបង្គោលបណ្ដោះអាសន្នបន្ថែមដែលមានគម្លាតប្រហែល ៥០ ម៉ែត្រពីគ្នា ព្រមទាំងបង្កើតផែនទីរូបថតដើម្បីត្រៀមការខណ្ឌសីមា។ បន្ថែមលើនេះ បន្ទាប់ពីការងារវាស់វែង ភាគីទាំងកម្ពុជានិងថៃក៏បានឯកភាពសាងសង់ផ្លូវល្បាតព្រំដែនរៀងៗខ្លួន ដោយផ្លូវល្បាតទាំងសងខាងមានគម្លាតប្រហែល ៣ម៉ែត្រ ពីខ្សែបន្ទាត់ព្រំដែន ដែលសកម្មភាពទាំងនេះបង្ហាញថាកំណាត់បង្គោលពី ៥២ ដល់ ៥៩ មានភាពច្បាស់លាស់លើដីជាក់ស្ដែង និងមិនមានបញ្ហាវិវាទរវាងភាគីទាំងពីរឡើយ។

គួររំលឹកថា ភាគីថៃបានចាប់ផ្ដើមបើកការដ្ឋានសាងសង់របងព្រំដែននេះ កាលពីថ្ងៃទី២ ខែមេសា ឆ្នាំ២០២៦ ដោយឯកតោភាគី។ តាមទិន្នន័យបច្ចេកទេស គម្រោងទាំងមូលមានប្រវែងសរុប ៨,៣ គីឡូប្រមាណ ដោយក្នុងនោះ ដំណាក់កាលទីមួយ គឺធ្វើឡើងនៅចន្លោះបង្គោលលេខ ៥២ ដល់ ៥៤ មានប្រវែង ១,៣ គីឡូម៉ែត្រ និងសម្រេចបានលទ្ធផល ៤៥% ហើយ ខណៈដែលដំណាក់កាលទី២ នឹងត្រូវពង្រីកបន្តពីបង្គោលទី៥៤ ដល់ ៥៩ ដែលមានប្រវែងប្រមាណជាង ៧ គីឡូម៉ែត្របន្ថែមទៀត។ ទោះជាយ៉ាងណា លោក ស្រ៊ឺ បូរ៉ា បានគូសបញ្ជាក់ថា ក្ដីបារម្ភចម្បងរបស់កម្ពុជា គឺការសម្រុកសាងសង់របងដោយឯកតោភាគីរបស់ថៃ មុនពេលដែលគណៈកម្មាការចម្រុះខណ្ឌសីមាព្រំដែនគោក (JBC) បញ្ចប់ការងារបច្ចេកទេសជាស្ថាពរ។ លោកបានសង្កត់ធ្ងន់ថា កម្ពុជាមិនមានការជំទាស់ចំពោះការសាងសង់របងព្រំដែនឡើយ បើសិនជាការសាងសង់នោះធ្វើឡើងស្របតាមលក្ខណៈបច្ចេកទេស ស្ថិតនៅក្នុងទឹកដីថៃពិតប្រាកដ និងមានការឯកភាពទ្វេភាគីពីគណៈកម្មការ JBC ជាមុន ប៉ុន្តែទង្វើបំពានសាងសង់របងមុនកិច្ចព្រមព្រៀងចុងក្រោយនេះ អាចបង្កជាបញ្ហាស្មុគស្មាញដល់នីតិវិធីខណ្ឌសីមានៅថ្ងៃក្រោយ។

ការលាតត្រដាងបច្ចេកទេស និងទិន្នន័យជាក់លាក់នៃប្រវែងរបង ៨,3 គីឡូម៉ែត្ររបស់ថៃនាពេលនេះ បានបង្ហាញឱ្យឃើញពីជំហរច្បាប់ដ៏រឹងមាំ និងការតាមដានយ៉ាងហ្មត់ចត់របស់កម្ពុជាលើខ្សែបន្ទាត់ព្រំដែន។ វាដល់ពេលហើយដែលគណៈកម្មការព្រំដែនចម្រុះ (JBC) នៃប្រទេសទាំងពីរ ត្រូវតែបើកកិច្ចប្រជុំការទូតបន្ទាន់ ដើម្បីដាក់សម្ពាធឱ្យភាគីថៃផ្អាករាល់សកម្មភាពសាងសង់របងជាឯកតោភាគីទាំងនោះចោលជាបណ្តោះអាសន្ន ដើម្បីរក្សាទុកនូវសភាពដើម និងធានាបាននូវការកសាងទំនុកចិត្តទ្វេភាគី ឆ្ពោះទៅរកការកំណត់សីមាព្រំដែនរួមគ្នាមួយ ប្រកបដោយភាពត្រឹមត្រូវ យុត្តិធម៌ និងមានសន្តិភាពយូរអង្វែងនៅតាមតំបន់ព្រំដែន៕