រ៉ាប៊ី ជាប់រហ័សនាមតារាស្រីធ្វើម្ហូបប្លែកៗរហូតទស្សនិកជនសួរថា «ធ្វើហើយហូបឬអត់?»

ម្តងហើយម្តងទៀតតារាចម្រៀង រ៉ាប៊ី បានធ្វើឱ្យអ្នកលេងបណ្តាញសង្គមបញ្ចេញមតិជាហូរហែបន្ទាប់ពីបញ្ចេញថ្វីដៃធ្វើម្ហូប ជាពិសេសថែមទាំងឱ្យស្វាមីដែលជាកីឡាករ Nick Taylor ភ្លក្សទៀត។ រាល់ពេលដែលធ្វើម្ហូប រ៉ាប៊ី បានធ្វើឱ្យមានមតិចម្រុះអ្នកមួយចំនួនក៏រិះគន់ អ្នកមួយចំនួនគិតថាជាវីដេអូសប្បាយៗ ចំណែកអ្នកខ្លះទៀតគិតថាម្ហូបដែល រ៉ាប៊ី ធ្វើគឺមិនយកមកហូបនោះទេ។

នៅថ្ងៃទី២៥ ខែមិថុនា រ៉ាប៊ី បានបង្ហោះវីដេអូមួយដោយបញ្ចេញថ្វីដៃបំពេញតួនាទីជាស្រ្តីមេផ្ទះ ជាភរិយា ធ្វើម្ហូបឱ្យ Nick Taylor ញុំា។ រ៉ាប៊ី បានដាក់ចំណងជើងថា «បាតដៃទេពរសជាតិសាច់មាន់ សម្រាប់ប្ដីជាពិសេស»។ រ៉ាប៊ី បានយកសាច់មាន់ចិញ្ច្រាំលាយជាមួយគ្រឿងទេស ហើយយកទៅច្រកនៅក្នុងស្រោមដៃ រួចយកទៅស្ងោរនៅក្នុងទឹកពុះ។

វីដេអូមួយនេះបានទាក់ទាញចំណាប់អារម្មណ៍អ្នកលេងបណ្តាញសង្គមភ្លាមៗជាពិសេសក៏មានមតិរិះគន់ទៅកាន់តារាចម្រៀងរូបនេះដែលយកស្រោមដៃទៅស្ងោរបែបនេះវានឹងធ្វើឱ្យប៉ះពាល់សុខភាព។ មតិមួយចំនួនទៀតជឿថានេះគ្រាន់តែជាការធ្វើវីដេអូ រកអ្វីដែលប្លែកៗប៉ុណ្ណោះការពិតជាក់ស្តែងម្ហូបនេះនាងនិង Nick Taylor មិនញុំានោះទេ។ អ្នកខ្លះក៏ព្រួយបារម្ភខ្លាចវីដេអូរបស់ រ៉ាប៊ី អាចជះឥទ្ធិពលទៅកាន់អ្នកផ្សេងឱ្យធ្វើតា្រប់បាន។ប្រិយមិត្តផ្សេងទៀតក៏ផ្ទុះសំណើច និងសរសើរទៅកាន់ រ៉ាប៊ី ដែលពូកែរកនឹកឃើញធ្វើអ្វីដែលប្លែកៗ។

កន្លងមកនេះ រ៉ាប៊ី បានបង្ហោះវីដេអូធ្វើម្ហូបជាច្រើនមានទាំងមុខម្ហូបធម្មតានិងមុខម្ហូបមិនធម្មតា។ ការដែលមិនធម្មតា រ៉ាប៊ី មានភាពខុសប្លែកពីគេដោយមុខម្ហូបខ្លះនាងធ្វើជារូបសត្វកណ្តុរ ធ្វើភីហ្សាជើងមាន់ស្ងោរជាមួយម៉ាត់ឆា និងមុខម្ហូបប្លែកៗជាច្រើន។

គួរបញ្ជាក់ផងដែរថា រ៉ាប៊ី បានខកខានក្នុងការចេញបទចម្រៀងថ្មីជាច្រើនខែមកហើយចាប់តាំងពីចេញបទ «ពូកែគ្រលាស់»។ ទោះយ៉ាងណាដ្បិតមិនសូវចេញបទញឹកញាប់ប៉ុន្តែរាល់ពេលដែលតារាចម្រៀងរូបនេះចេញបទថ្មីតែងតែទទួលបានការចាប់អារម្មណ៍ពីទស្សនិកជន។ មិនចេញបទថ្មី ពុំសូវបង្ហាញខ្លួនតាមកម្មវិធីញឹកញាប់ដូចមុន ប៉ុន្តែ រ៉ាប៊ី កាក់កបនឹងការផ្សព្វផ្សាយផលិតផលផ្សេងៗ៕