ជម្រើសយុទ្ធសាស្ត្រថ្មី៖ រុស្ស៊ីត្រៀមខ្លួនជួយកម្ពុជាទាំងផ្នែកសព្វាវុធ និងសន្តិសុខថាមពល

មិត្តចាស់តជំនាន់ដែលនៅតែសំខាន់! ចំណងមិត្តភាពប្រពៃណីរវាងកម្ពុជា និងរុស្ស៊ីកាន់តែបង្ហាញភាពរឹងមាំ និងការបើកចំហកាន់តែខ្លាំង ក្រោយពេលភាគីរុស្ស៊ីបានប្រកាសជាផ្លូវការអំពីការត្រៀមខ្លួនជាស្រេចក្នុងការពិនិត្យមើលរាល់លទ្ធភាពជាក់ស្តែង ដើម្បីជួយពង្រឹងវិស័យយោធានិងការការពារជាតិ ប្រសិនបើកម្ពុជាបង្ហាញតម្រូវការ»។ ការនេះមិនត្រឹមតែជាការបញ្ជាក់ពីជំហររឹងមាំរបស់រុស្ស៊ីក្នុងនាមជាមិត្តចាស់តជំនាន់ដ៏សំខាន់ ដែលធ្លាប់រួមសុខរួមទុក្ខជាមួយកម្ពុជាតាំងពីទសវត្សរ៍ឆ្នាំ១៩៨០ ប៉ុណ្ណោះទេ ប៉ុន្តែវាក៏ជាការបើកទ្វារចំហរក្នុងរបត់ភូមិសាស្ត្រនយោបាយថ្មីផងដែរ។

យោងតាមរបាយការណ៍ផ្លូវការពីសេចក្តីថ្លែងការណ៍ការទូត លោក អាណាតូលី បូរ៉ូវីក (Anatoly Borovik) ឯកអគ្គរដ្ឋទូតរុស្ស៊ីប្រចាំនៅកម្ពុជា បានគូសបញ្ជាក់យ៉ាងច្បាស់ថា៖ ប្រទេសរុស្ស៊ីនឹងពិនិត្យមើលរាល់លទ្ធភាពជាក់ស្តែង ក្នុងការពង្រឹងវិស័យយោធា និងសមត្ថភាពការពារជាតិរបស់កម្ពុជា។ យោងតាមប្រភពព័ត៌មានច្បាស់ការណ៍ដដែល យន្តការគាំទ្រនេះអាចរួមបញ្ចូលទាំងការផ្គត់ផ្គង់គ្រឿងសព្វាវុធ បរិក្ខារយោធាទំនើបៗ ការបណ្តុះបណ្តាលធនធានមនុស្សដល់នាយទាហានខ្មែរ ព្រមទាំងការផ្លាស់ប្តូរបទពិសោធន៍ស៊ីជម្រៅលើផ្នែកសន្តិសុខបច្ចេកវិទ្យា (Cybersecurity) ដើម្បីធានាដល់ការការពារអធិបតេយ្យភាព និងបូរណភាពទឹកដីរបស់កម្ពុជា។

ក្រៅពីវិស័យសន្តិសុខយោធា យោងតាមរបាយការណ៍ស្តីពីកិច្ចសហប្រតិបត្តិការតំបន់អាស៊ាន-រុស្ស៊ី វិស័យថាមពលក៏ជាចំណុចគន្លឹះដែលរុស្ស៊ីបើកទ្វារចំហរសម្រាប់កម្ពុជាផងដែរ។ រុស្ស៊ីបានបង្ហាញជំហររឹងមាំក្នុងការត្រៀមលក្ខណៈផ្គត់ផ្គង់ថាមពលស្អាត ឧស្ម័នធម្មជាតិរាវ (LNG) និងប្រេងឥន្ធនៈ ទៅកាន់បណ្តាប្រទេសជាមិត្តនៅក្នុងតំបន់។ សម្រាប់កម្ពុជា ដែលជាប្រទេសកំពុងមានតម្រូវការថាមពលខ្ពស់សម្រាប់ការអភិវឌ្ឍផ្នែកឧស្សាហកម្ម និងសេដ្ឋកិច្ច ការបើកផ្លូវពីរុស្ស៊ីនាពេលនេះ គឺជាការផ្ដល់នូវជម្រើសយុទ្ធសាស្ត្រ (Strategic Options) ដ៏មានតម្លៃ និងជួយធានាដល់ស្ថិរភាពថាមពលជាតិយូរអង្វែង។

ទោះជាយ៉ាងណាក៏ដោយ ជុំវិញជំនួយយោធាអន្តរជាតិ យោងតាមច្បាប់រដ្ឋធម្មនុញ្ញនៃព្រះរាជាណាចក្រកម្ពុជា កម្ពុជានៅតែបន្តរក្សាជំហរអព្យាក្រឹតដាច់ខាត ដោយមិនអនុញ្ញាតឱ្យមានមូលដ្ឋានទ័ពបរទេសនៅលើទឹកដីរបស់ខ្លួនឡើយ។ ប៉ុន្តែកម្ពុជាមានសិទ្ធិពេញលេញក្នុងការទទួលជំនួយ សម្ភារៈបរិក្ខារ ឬធ្វើសមយុទ្ធរួមគ្នាជាមួយបណ្តាប្រទេសជាមិត្តទាំងអស់ រួមទាំងរុស្ស៊ី ក្នុងន័យពង្រឹងសមត្ថភាពការពារជាតិខ្លួនឯង។

សូមបញ្ជាក់ថា សេចក្តីថ្លែងការណ៍របស់ភាគីរុស្ស៊ីនាពេលនេះ មិនត្រឹមតែជាការផ្តល់សន្តិសុខផ្លូវចិត្តដល់កម្ពុជានោះទេ ប៉ុន្តែវាបានសរសេរជំពូកថ្មីមួយទៀតនៃមិត្តភាពដែកថែបតជំនាន់ ដែលឆ្លុះបញ្ចាំងថា រុស្ស៊ីនៅតែជាបង្អែកយុទ្ធសាស្ត្រដ៏គួរឱ្យទុកចិត្តមួយសម្រាប់កម្ពុជាជានិច្ច៕