អូស្ត្រាលីប្រើប្រាស់ដ្រូនតាមដានត្រីឆ្លាមនៅឆ្នេរសមុទ្រ បន្ទាប់ពីខាំភ្ញៀវទេសចរម្នាក់រងរបួ.សធ្ងន់ធ្ងរ

អាជ្ញាធរអូស្ត្រាលីបានចាត់វិធានការភ្លាមៗកាលពីថ្ងៃទី១៣ ខែមិថុនា ឆ្នាំ២០២៦ ដោយអនុញ្ញាតឱ្យមានការបង្ហោះដ្រូន (Drone) ដើម្បីតាមដានត្រីឆ្លាមនៅឆ្នេរសមុទ្រឃូជី (Coogee Beach) ស្ថិតក្នុងរដ្ឋ New South Wales បន្ទាប់ពីត្រីឆ្លាមមួយក្បាលខាំស្ត្រីម្នាក់បណ្តាលឱ្យរងរបួ.សធ្ងន់ធ្ងរ បង្កការភ័យតក់ស្លុតយ៉ាងខ្លាំងដល់អ្នកឃើញហេតុការណ៍ផ្ទាល់ភ្នែក។ ក្រៅពីនេះ អាជ្ញាធរក៏បានប្រើប្រាស់ម៉ូតូទឹក (Jet Skis) និងឧបករណ៍ចាប់សញ្ញាដ៏ឆ្លាតវៃ (Smart Drumlines) ផងដែរ ដើម្បីបន្លាចត្រីឆ្លាមកុំឱ្យចូលក្បែរឆ្នេរ។

តាមការចុះផ្សាយរបស់សារព័ត៌មានបរទេស ស្ត្រីរូបនេះបានទៅហែលទឹកនៅឆ្នេរឃូជី ក្នុងតំបន់សុវត្ថិភាពមានដោតទង់សម្គាល់ ឆ្ងាយពីច្រាំងត្រឹមតែ៣០ម៉ែត្រប៉ុណ្ណោះ ដែលជាកន្លែងគ្រប់គ្នាគិតថា មានសុវត្ថិភាពបំផុត បណ្តាលឱ្យរងរបួសធ្ងន់ធ្ងរកាលពីថ្ងៃទី១៣ ខែមិថុនា ហើយត្រូវបានឆ្នាំសមុទ្របញ្ជូនទៅកាន់មន្ទីរពេទ្យភ្លាមៗ។ ហេតុការណ៍នេះធ្វើឱ្យភ្ញៀវទេសចរ ក៏ដូចជាពលរដ្ឋភ័យតក់ស្លុត ស្រឡាំងកាំង និងហួសចិត្តយ៉ាងខ្លាំង ពីព្រោះទីតាំងកើតហេតុ មានដោតទង់សម្គាល់បញ្ជាក់ពីតំបន់សុវត្ថិភាព។

នារីរងគ្រោះរងរបួសធ្ងន់ធ្ងរនៅត្រង់ដៃ និងជើងខាងឆ្វេង បើតាមរូបភាពថតបានដោយអ្នកឃើញហេតុការណ៍បង្ហាញថា វាជាត្រីឆ្លាមពណ៌សដ៏ធំ មានប្រវែងប្រហែលពី៣ ទៅ៤ម៉ែត្រ ហើយទីតាំងកើតហេតុស្ថិតនៅក្បែរមាត់ច្រាំង។

តាមការលើកឡើងរបស់លោកស្រី Tara Moriarty រដ្ឋមន្ត្រីក្រសួងកសិកម្មរដ្ឋ New South Wales នៅរដូវក្តៅវនេះ ត្រីឆ្លាមបានខំមនុស្សជាច្រើនលើកនៅទីក្រុងស៊ីដនី ទើបរដ្ឋាភិបាលអូស្ត្រាលីយកចិត្តទុកដាក់ក្នុងការដោះស្រាយបញ្ហា។ រដ្ឋាភិបាលបានពិចារណាជាមួយមន្ត្រីទេសចរណ៍ ដើម្បីបង្ហោះដ្រូនស្វែងរកត្រីឆ្លាមមួយក្បាលនេះ និងពិភាក្សាពីការអនុវត្តវិធានការថ្មីៗទៀតដើម្បីការពារសុវត្ថិភាពអ្នកហែលទឹកកុំឱ្យត្រីឆ្លាមខាំ។

សូមរំឭកដែរថា កាលពីមុន អូស្ត្រាលីបានហាមឃាត់មិនឱ្យប្រើប្រាស់ដ្រូនឃ្លាំមើលនៅឆ្នេរសមុទ្រឃូជី នោះទេ ដោយសារឆ្នេរនេះស្ថិតនៅក្បែរផ្លូវហោះហើររបស់អាកាសយានដ្ឋានស៊ីដនី (Sydney Airport) ប៉ុន្តែពេលនេះ ភ្នាក់ងារសុវត្ថិភាពអាកាសចរណ៍ស៊ីវិល (CASA) បានសម្រេចអនុញ្ញាតឱ្យមានការប្រើប្រាស់ដ្រូនបណ្តោះអាសន្នសម្រាប់តាមដានត្រីឆ្លាមខាំមនុស្ស ដោយប្រកាសបិទឆ្នេរសមុទ្រនេះ និងឆ្នេរក្បែរនោះរយៈពេល២៤ម៉ោងដើម្បីធានាសុវត្ថិភាព៕