ជប៉ុនប្រមូលប្រេងឆាប្រើប្រាស់រួចក្នុងផ្ទះបាយ យកទៅកែច្នៃជាប្រេងឥន្ធនៈសម្រាប់យន្តហោះ

រដ្ឋាភិបាលជប៉ុនបានចាប់ផ្តើមយុទ្ធនាការ «Fry to Fly Project» ទ្រង់ទ្រាយធំ និងសកម្មបំផុតចាប់តាំងពីឆ្នាំ២០២៤មក ហើយកំពុងបង្កើនសកម្មភាពយ៉ាងខ្លាំងនៅឆ្នាំ២០២៦ ដើម្បីប្រមូលប្រេងឆាប្រើប្រាស់រួចក្នុងផ្ទះបាយ ភោជនីយដ្ឋាន និងអាជីវកម្ម យកទៅកែច្នៃជាប្រេងឥន្ធនៈយន្តហោះប្រកបដោយចីរភាព ឬហៅហាត់ថា SAF (Sustainable Aviation Fuel)។ រដ្ឋាភិបាលជប៉ុនកំណត់គោលដៅនៅត្រឹមឆ្នាំ២០៣០ យន្តហោះទាំងអស់ត្រូវតែប្រើប្រាស់ប្រេងឥន្ធនៈ SAF ឱ្យបាន១០% នៃប្រេងសរុប ដើម្បីកាត់បន្ថយការបំភាយឧស្ម័នផ្ទះកញ្ចក់ទៅលើបរិយាកាសឱ្យបាន៨០%។

ការប្រមូលប្រេងឆាប្រើប្រាស់រួចក្នុងផ្ទះបាយ ភោជនីយដ្ឋាន និងអាជីវកម្មនៅទូទាំងប្រទេស ដើម្បីយកទៅកែច្នៃជាប្រេងឥន្ធនៈ SAF គឺស្ថិតក្រោមកិច្ចសហការរវាងរដ្ឋាភិបាលជប៉ុនជាមួយក្រុមហ៊ុនឯកជន ហើយបច្ចុប្បន្ន មានទីតាំងទទួលប្រេងឆាប្រើប្រាស់រួចហើយរហូតដល់រាប់រយកន្លែង។ ពលរដ្ឋអាចរក្សាទុកប្រេងឆាចាស់ៗដាក់ក្នុងដបផ្លាស្ទិក រួចយកទៅដាក់នៅតាមទីតាំងប្រមូលផ្តុំ ដូចជា ផ្សារទំនើប ឬទីសាធារណៈ។

បើទោះជារដ្ឋាភិបាលជប៉ុនបានកំណត់គោលដៅផលិតប្រេងឥន្ធនៈ SAF ឱ្យបានចំនួន១លាន ៧សែនលីត្រ នៅឆ្នាំ២០៣០ សម្រាប់ការប្រើប្រាស់របស់យន្តហោះក្តី ប៉ុន្តែសមត្ថភាពផលិតនាពេលបច្ចុប្បន្ន ស្មើប្រមាណតែ ៣០,០០០លីត្រប៉ុណ្ណោះ ឬត្រឹម០.៣% នៃការប្រើប្រាស់ប្រេងឥន្ធនៈយន្តហោះសរុប។ ការផលិតប្រេងឥន្ធនៈប្រភេទនេះត្រូវចំណាយដើមទុនខ្ពស់ ដោយត្រូវឆ្លងកាត់ដំណាក់កាលផលិតដ៏ស្មុគស្មាញ តាំងពីការប្រមូលវត្ថុធាតុដើម រហូតដល់ការចម្រោះ។

ហេតុនេះ រដ្ឋាភិបាលជប៉ុន និងវិស័យឯកជន បានបង្កើនការយល់ដឹងបន្ថែមទៀតទៅកាន់ពលរដ្ឋ និងអាជីវកម្មនានា ដើម្បីលើកទឹកចិត្តឱ្យចូលរួមកាន់តែច្រើនជាងមុនក្នុងការផ្តល់ប្រេងឆាប្រើប្រាស់ទៅឱ្យទីតាំងប្រមូលផ្តុំដើម្បីបញ្ជូនទៅកែច្នៃជាប្រេងឥន្ធនៈ SAF ជាពិសេស លើកទឹកចិត្តពលរដ្ឋរស់នៅទីក្រុងតូក្យូ ស្មើជាង៧លាន ៨សែនគ្រួសារ។

បើតាមការប៉ាន់ស្មានរបស់ក្រុមឧស្សាហកម្មកែច្នៃប្រេងឥន្ធនៈជប៉ុន គឺទោះជាអាចប្រមូលប្រេងឆាប្រើប្រាស់រួចនៅទូទាំងប្រទេសក៏ដោយ ក៏សមត្ថភាពផលិតប្រេងឥន្ធនៈ SAF ស្មើត្រឹមតែ ៥៥០,០០០លីត្រប៉ុណ្ណោះ ឬស្មើ១ភាគ៤ នៃតម្រូវការប្រើប្រាស់ទាំងអស់នៅឆ្នាំ២០៣០។ នេះបង្ហាញថា ជប៉ុនត្រូវតែស្វែងរកវត្ថុធាតុដើមបន្ថែមទៀត និងបង្កើនសមត្ថភាពផលិតឱ្យខ្លាំងជាងមុន ប្រសិនបើចង់សម្រេចបាននូវគោលដៅកាត់បន្ថយកាបូនក្នុងវិស័យអាកាសចរណ៍៕