ទោះបីជារឿងភាគ «Pursuit of Jade» បានប្រឈមនឹងភាពចម្រូងចម្រាសក្តីប៉ុន្តែគេមិនអាចបដិសេធបានទេថារឿងនេះមានប្រជាប្រិយភាពយ៉ាងខ្លាំងដែលធ្វើឱ្យយីអ៊ុនរបស់តួឯកទាំងពីររូបគឺ Zhang Linghe និង Tian Xiwei មានការចាប់អារម្មណ៍កាន់តែច្រើនចំណែកឯតម្លៃខ្លួនរបស់ពួកគេក៏ត្រូវបានគេរាយការណ៍ថាកើនឡើងយ៉ាងខ្លាំងផងដែរ។
នៅពេលសម្តែងរឿងខាងលើនេះតម្លៃខ្លួនរបស់ Zhang Linghe ទទួលបានប្រមាណ៣.៥លានយ័នខណៈដែល Tian Xiwei ទទួលបានប្រាក់ប្រហែល ៣ លានយ័ន។ ទោះជាយ៉ាងណាក៏ដោយ បន្ទាប់ពីខ្សែភាពយន្តនេះបានក្លាយជារឿងដ៏ល្បី ធនធាន និងតម្លៃពាណិជ្ជកម្មរបស់អ្នកទាំងពីរបានកើនឡើងយ៉ាងខ្លាំង ដែលខុសគ្នាឆ្ងាយពីស្ថានភាពមុនរបស់ពួកគេ។
ខណៈពេលដែលកាលពីឆ្នាំមុន ថ្លៃផ្សាយពាណិជ្ជកម្មរបស់ Zhang Linghe ទទួលបានប្រហែល ៨លានយ័ន (ប្រមាណ១.១លានដុល្លារ) តួលេខនោះឥឡូវនេះបានកើនឡើងដល់ ១២ លានយ័ន (ប្រមាណ ១.៧ លានដុល្លារ) សម្រាប់កិច្ចសន្យាធម្មតា។ ចំពោះម៉ាកល្បីៗ ថ្លៃសេវាកាន់តែខ្ពស់ជាងនេះទៅទៀត ពីព្រោះសិល្បករត្រូវតែមានការប្តេជ្ញាចិត្តរយៈពេលវែង ចូលរួមក្នុងព្រឹត្តិការណ៍ជាច្រើន និងរក្សារូបភាពដែលស្របនឹងម៉ាក។
ថ្លៃផ្សព្វផ្សាយរបស់ Zhang Linghe សម្រាប់ម៉ាកល្បីៗដូចជា Lancôme និង Gucci បានឡើងដល់ ៥០លានយ័ន (ប្រមាណ៧.៣លានដុល្លារ) ដែលជាការកើនឡើង៦ដងបើធៀបនឹងឆ្នាំមុន ដែលធ្វើឱ្យលោកស្ថិតក្នុងចំណោមកំពូលតារាជំនាន់ថ្មីនៅក្នុងឧស្សាហកម្មកម្សាន្តចិន។
មិនត្រឹមតែអាជីពសិល្បៈនិងតម្លៃផ្សាយពាណិជ្ជកម្មប៉ុណ្ណោះទេ ប៉ុន្តែជីវិតផ្ទាល់ខ្លួន និងចំណង់ចំណូលចិត្តរបស់ Zhang Linghe ក៏ទទួលបានការចាប់អារម្មណ៍យ៉ាងច្រើនផងដែរ។ នៅក្នុងបទសម្ភាសន៍ថ្មីៗនេះ Zhang Linghe បានទាក់ទាញចំណាប់អារម្មណ៍នៅពេលដែលលោកបានបង្ហាញពីវិធីពិសេសរបស់ខ្លួនក្នុងការបំបាត់ភាពតានតឹង។
តារាសម្ដែងវ័យ២៨ឆ្នាំរូបនេះបាននិយាយថា លោកតែងតែអានសៀវភៅស្ដីពីគោលការណ៍ដើម្បីយល់ពីរចនាសម្ព័ន្ធខាងក្នុងរបស់ម៉ាស៊ីន។ ថ្មីៗនេះ លោកក៏បានបង្កើតចំណង់ចំណូលចិត្តចំពោះការថតរូបផងដែរ ថែមទាំងបានរុះរើកាមេរ៉ាដើម្បីសិក្សាពីគ្រឿងបន្លាស់ និងលក្ខណៈបច្ចេកទេសទៀតផង។ អ្នកលេងអ៊ីនធឺណិតជាច្រើនបានបញ្ចេញមតិលេងសើចថា សូម្បីតែវិធីកម្សាន្តរបស់ Zhang Linghe ក៏ចេះបច្ចេកវិទ្យាដែរ៕
