ក្រុមយុវទូតនិស្សិតនៃសាកលវិទ្យាល័យអន្តរជាតិ ផារ៉ាហ្គន នាពេលថ្មីៗនេះបានប្រកាសអំពីដំណើរការគម្រោង «ជំនាញខ្ញុំ៖ ការយល់ដឹងអំពីសាកលវិទ្យាល័យ (M5: I2U)» នៅខេត្តបាត់ដំបងនាដើមខែមិថុនានេះ។ 
សិក្ខាសាលានេះ មានគោលបំណងចែករំលែកចំណេះដឹង និងបទពិសោធន៍ពីការសិក្សានៅសាកលវិទ្យាល័យ ដល់សិស្សានុសិស្សក្នុងកម្រិតវិទ្យាល័យមុននឹងឈានជើងបន្តការសិក្សាកម្រិតបរិញ្ញាបត្រ។ សិក្ខាសាលាជំនាញខ្ញុំ នឹងប្រព្រឹត្តឡើងនៅថ្ងៃទី១ ដល់ថ្ងៃទី៣ ខែមិថុនា ឆ្នាំ២០២៦ នៅវិទ្យាល័យចំនួន ៤ ក្នុងខេត្តបាត់ដំបង។
ចាប់តាំងពីការបង្កើតឡើងដំបូងក្នុងឆ្នាំ២០២៣ គម្រោង «ជំនាញខ្ញុំ» បានប្តេជ្ញាចិត្តយ៉ាងមុតមាំក្នុងការ តម្រង់ទិសអប់រំសម្រាប់សិស្សានុសិស្ស នៅតាមបណ្តាខេត្ត និងតំបន់ដែលបានជួបប្រទះនូវវិសមភាពក្នុងការទទួលបានព័ត៌មានពីសាកលវិទ្យាល័យ ការជ្រើសរើសជំនាញសិក្សា និងវិធីសាស្ត្រក្នុងការទទួលបានអាហារូបករណ៍ផងដែរ។
សម្រាប់ឆ្នាំនេះ ផ្តោតលើប្រធានបទ «ជំនាញខ្ញុំ៖ ការយល់ដឹងអំពីសាកលវិទ្យាល័យ (M5: I2U)» ដែលនឹងប្រព្រឹត្តទៅចាប់ពីថ្ងៃទី១ ដល់ថ្ងៃទី៣ ខែមិថុនា ឆ្នាំ២០២៦ នៅក្នុងខេត្តបាត់ដំបង ដែលមានការចូលរួម ពីសំណាក់សិស្សានុសិស្សនៃវិទ្យាល័យព្រះមុនីវង្ស វិទ្យាល័យនេតយ៉ង់ វិទ្យាល័យសម្តេចឪ និងសាលាអន្តរជាតិយូអេសអេ (USA International School) សាខាខេត្តបាត់ដំបង។ 
សិស្សានុសិស្សដែលចូលរួមក្នុងសិក្ខាសាលានេះ នឹងយល់ដឹងបន្ថែមអំពីជំនាញសិក្សា ការចែករំលែកបទពិសោធន៍ក្នុងការស្វែងរកអាហារូបករណ៍ ការត្រៀមខ្លួនប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)ការតេស្តសមត្ថភាពតាមរយៈ សំណួរ-ចម្លើយ ការពិភាក្សាអំពីជីវិតជានិស្សិតសាកលវិទ្យាល័យ និងឱកាសទទួលបានប័ណ្ណចូលរួមការប្រឡងយកអាហារូបករណ៍ដោយឥតគិតថ្លៃ។.jpg)
ក្នុងកម្មវិធីនេះ សិស្សានុសិស្សនឹងមានឱកាសផ្សារភ្ជាប់ទំនាក់ទំនងជាមួយនិស្សិតសាកលវិទ្យាល័យមកពីមុខជំនាញផ្សេងៗដែលនឹងមកចែករំលែកបទពិសោធន៍បញ្ហាប្រឈមនិងដំណោះស្រាយ នានាដើម្បីជាការបំផុសគំនិតដល់សិស្សានុសិស្សក្នុងការរៀបចំផែនការសម្រាប់ផ្លូវជីវិតនាពេលអនាគត។.jpg)
សិក្ខាសាលានេះអាចបន្តធ្វើឡើងបានដោយមានការគាំទ្រពីដៃគូឧបត្ថម្ភផ្សេងៗដែលរួមមាន សាកលវិទ្យាល័យអន្តរជាតិ ផារ៉ាហ្គន ជាអ្នកឧបត្ថម្ភធំ ខណៈមានការសហការឧបត្ថម្ភដោយ Hi-Tech និង Indomie Cambodia រួមជាមួយនឹងអ្នកឧបត្ថម្ភផ្សេងទៀតជាច្រើនរួមមានដៃគូប្រព័ន្ធផ្សព្វផ្សាយផងដែរ។
តាមរយៈសិក្ខាសាលា «ជំនាញខ្ញុំ៖ការយល់ដឹងពីសាកលវិទ្យាល័យ» ក្រុមយុវទូតនិស្សិតនៃសាកលវិទ្យាល័យអន្តរជាតិ ផារ៉ាហ្គន សង្ឃឹមយ៉ាងម៉ុតមាំថានឹងអាចចូលរួមចំណែកជួយដល់ សិស្សានុសិស្សកម្រិតវិទ្យាល័យលើវិថីនៃការអប់រំរបស់ពួកគេនាពេលអនាគត៕
