ឡាវផ្អាកនាំចូលរថយន្តប្រេង និងជំរុញឱ្យពលរដ្ឋប្រើប្រាស់រថយន្តអគ្គិសនី

រដ្ឋាភិបាលឡាវបានប្រកាសផ្អាកនាំចូលរថយន្តប្រើប្រាស់ប្រេងឥន្ធនៈ (សាំង និងម៉ាស៊ូត) ចាប់ពីថ្ងៃទី១ ខែមិថុនា រហូតដល់ដំណាច់ឆ្នាំ២០២៦ ដោយជំរុញឱ្យពលរដ្ឋប្រើប្រាស់រថយន្តអគ្គិសនី ដើម្បីកាត់បន្ថយការពឹងផ្អែកលើការនាំចូលប្រេងឥន្ធនៈ និងការពារបរិស្ថាន ស្របពេលបច្ចុប្បន្ន ឡាវប្រឈមនឹងវិបត្តិសេដ្ឋកិច្ចដោយសារតម្លៃប្រេងកើនឡើង ។ បម្រាមនេះមិនអនុវត្តចំពោះរថយន្តគ្រប់ប្រភេទទេ ដោយរដ្ឋនៅតែអនុញ្ញាតឱ្យនាំចូលរថយន្តប្រេងចាំបាច់មួយចំនួន ដូចជា ៖ រថយន្តដឹកអ្នកដំណើរ, រថយន្តប្រើប្រាស់ក្នុងផលិតកម្ម និងរថយន្តសង្គ្រោះបន្ទាន់ ។

រដ្ឋាភិបាលនឹងផ្តល់សិទ្ធិពិសេសសម្រាប់ក្រុមហ៊ុនដែលចំណាយប្រាក់សាងសង់ស្ថានីយសាកថ្មរថយន្តអគ្គិសនីនៅទូទាំងប្រទេស ដោយការផ្តល់ដីធ្លីដើម្បីពន្លឿនការសាងសង់ស្ថានីយសាកថ្មឱ្យកាន់តែច្រើន ព្រមទាំងចាត់វិធានការយ៉ាងតឹងរ៉ឹងទៅលើក្រុមហ៊ុនណាលក់រថយន្តអគ្គិសនីយកប្រាក់ចំណេញខ្ពស់ និងលើកលែងពន្ធអាករពិសេសសម្រាប់រថយន្តអគ្គិសនីតម្លៃក្រោម៥ម៉ឺនដុល្លារ ។

តាមសេចក្តីប្រកាសកាលពីថ្ងៃទី១២ ខែឧសភា ឆ្នាំ២០២៦ ឡាវនឹងផ្អាកការនាំចូលរថយន្តប្រេងជាបណ្តោះអាសន្នរហូតដល់ដំណាច់ឆ្នាំនេះ លើកលែងតែរថយន្តដឹកអ្នកដំណើរ, រថយន្តប្រើប្រាស់ក្នុងផលិតកម្ម និងរថយន្តសង្គ្រោះបន្ទាន់ ហើយមិនអនុញ្ញាតឱ្យក្រុមហ៊ុនលក់រថយន្តអគ្គិសនីក្នុងតម្លៃខ្ពស់នៅពេលតម្រូវការកើនឡើង ប្រសិនបើរកឃើញក្រុមហ៊ុនណាឆ្លៀតឱកាសកេងចំណេញ នឹងត្រូវពិន័យជាប្រាក់យ៉ាងច្រើន ។

នេះជាយុទ្ធសាស្ត្រសេដ្ឋកិច្ចដ៏សំខាន់មួយដើម្បីផ្លាស់ប្តូរប្រព័ន្ធដឹកជញ្ជូនក្នុងប្រទេស និងពង្រឹងស្ថិរភាពរូបិយប័ណ្ណជាតិ ហើយក៏ជាការផ្លាស់ប្តូរពីវិបត្តិទៅជាឱកាស ដោយកាត់បន្ថយការចំណាយលើប្រេងឥន្ធនៈនាំចូលពីក្រៅប្រទេស និងជំរុញការប្រើប្រាស់ថាមពលអគ្គិសនីដែលជាចំណុចខ្លាំងរបស់ខ្លួន, ការពារបរិស្ថាន រួមទាំងកាត់បន្ថយឱនភាពពាណិជ្ជកម្ម ពីព្រោះការទិញរថយន្តប្រេង និងនាំចូលប្រេង តម្រូវឱ្យឡាវទូទាត់ជារូបិយប័ណ្ណបរទេស ។

គួរបញ្ជាក់ថា ពលរដ្ឋឡាវភាគច្រើនពេញចិត្តនឹងការផ្អាកនាំចូលរថយន្តប្រេង ព្រោះតែកង្វះខាតប្រេង ហើយការប្រើប្រាស់រថយន្តអគ្គិសនីជួយកាត់បន្ថយចំណាយប្រចាំថ្ងៃបានច្រើន ។ ប៉ុន្តែអ្នកខ្លះទៀតបារម្ភពីស្ថានីយសាកថ្មមិនគ្រប់គ្រាន់ ជាពិសេស នៅតាមខេត្ត និងខ្លាចមានបញ្ហាតាមផ្លូវ គ្មានកន្លែងជួសជុល ហើយតម្លៃរថយន្តអគ្គិសនីនៅតែខ្ពស់ ខណៈក្រុមហ៊ុនលក់រថយន្តប្រេងបារម្ភពីបាត់បង់ដើមទុនដោយសារបិទអាជីវកម្មភ្លាមៗ ៕