តារាចម្រៀង មាស សុខសោភា និងគូស្នេហ៍ថ្មីនៅតែមានប្រធានបទនៅលើបណ្តាញសង្គមជាមួយនឹងមតិវែកញែកជាច្រើនបន្ទាប់ពីអ្នកទាំងពីរលែងនៅស្ងៀមដូចមុននិងបានចេញមកតបតនឹងពាក្យរិះគន់ទាំងនោះវិញ។ នាពេលថ្មីៗនេះសិល្បការិនីរូបនេះក៏បានបង្ហើបពីមូលហេតុនៃការជ្រើសរើសគូស្នេហ៍ថ្មីដែលខុសចិត្តរបស់មហាជនដែលចង់ឱ្យនាងជ្រើសរើសបុរសល្អ អ្នកមាន ស្អាតសមគ្នា។
នៅក្នុងការ live កាលពីថ្ងៃទី១៨ ខែឧសភា តារាចម្រៀង មាស សុខសោភា បានថ្លែងអំណរគុណទៅកាន់អ្នកគាំទ្រដែលព្រួយបារម្ភនិងចង់ឱ្យខ្លួនបានគ្រួសារជាអ្នកមាន ស្អាតសមគ្នា ហើយនាងពិតជាចង់បានដូចអ្វីដែលអ្នកគាំទ្ររំពឹងដែរ ប៉ុន្តែអ្វីដែលសំខាន់គឺការនិយាយស្តីលែងយល់ពីគ្នា។ ត្រង់ចំណុចនេះ មាស សុខសោភា បានពន្យល់ថានៅពេលនាងយល់ពីសច្ចធម៌ខាងក្នុងខ្លួនឯងហើយនឹងឃើញពីសច្ចធម៌នៅក្នុងខ្លួនរបស់មនុស្សម្នាក់ទៀត។.png)
តារាចម្រៀងរូបនេះថាអ្នកខ្លះស្អាតរូបរាងល្អ សង្ហា មានធនធានណាស់ប៉ុន្តែបុរសនោះមិនយល់ពីសច្ចធម៌នៅខាងក្នុង ធ្វើឱ្យការយល់ឃើញមិនដូចគ្នានិងមិនអាចរួមរស់ជាមួយគ្នាឡើយ។ មាស សុខសោភា បានសារភាពថាបន្ទាប់ពីបែកបាក់គ្រួសារមុនរូបនាងក៏ព្យាយាមសាកល្បងសេពគប់អ្នកដែលល្អស្អាតជាងលោកឪដែរ ប៉ុន្តែមិនអាចរកបាន។ តារាចម្រៀងរូបនេះលើកឡើងទៀតថា នៅពេលជជែកជាមួយអ្នកយល់ពីសច្ចធម៌នឹងមានសេចក្តីសុខមិនចាំបាច់ដល់ថ្នាក់ស្រលាញ់គ្នានោះទេ។
មាស សុខសោភា បន្តទៀតថាមុននឹងឈានដល់ដំណាក់កាលនេះគឺសុទ្ធតែមានរឿងអាថ៌កំបាំងនៅខាងក្នុង ប៉ុន្តែនាងមិនចង់បកស្រាយជាសាធារណៈនោះទេនាំឱ្យមានការវែកញែកមិនចប់មិនហើយនៅពេលមហាជនមិនយល់ពីផ្នែកខាងក្នុងរបស់នាង។
តាមការពន្យល់របស់គូស្នេហ៍របស់តារាចម្រៀង មាស សុខសោភា ពាក្យថា «សច្ចធម៌» គឺជាសភាវធម៌មួយដែលកើតចេញពីការបដិបត្តិដំណើរធម្មជាតិរបស់ខ្លួនទាំង៧ប្រកបដោយភាពបរិសុទ្ធទាំងព្រម ឆ្លុះបង្ហាញអំពីភាពពិតប្រាកដ មិនក្លែងក្លាយ មិនបន្លំទៀងត្រង់ មិនភូតភរ មិនមានល្បិចកិច្ចកលទាំងទង្វើខាងក្រៅនិងខាងក្នុង គឺឆ្លុះបង្ហាញតែអ្វីដែលពិតប្រាកដជាក់ស្តែងពិតប្រាកដមិនលំអៀង។
ទោះបីជាមានការបកស្រាយជាច្រើនលើកច្រើនសារពីសំណាក់ មាស សុខសោភា និងគូស្នេហ៍ ប៉ុន្តែមតិរបស់មហាជននៅតែមានការរិះគន់ចំពោះអ្នកទាំងពីរ៕
