បទរបស់ Jennie និង Tame Impala កំពុងទទួលបានការចាប់អារម្មណ៍យ៉ាងខ្លាំង

បទ «Dracula» remix បានឡើងដល់លេខ ១០នៅលើ Billboard Hot 100 ដែលជាបទចម្រៀងដំបូងរបស់ Jennie និង Tame Impala ដែលចូលទៅក្នុងកំពូលទាំង១០នៃតារាងតន្រ្តីសហរដ្ឋអាម៉េរិក។សមិទ្ធផលថ្មីនេះធ្វើឱ្យ Jennie ក្លាយជាសមាជិក Blackpink ទីពីរដែលឈានដល់កំពូលទាំង ១០ នៃ Billboard Hot 100 ក្នុងនាមជាតារាចម្រៀងទោល។ ពីមុន Rosé បានឈានដល់លេខ ៣ ជាមួយនឹងបទ «APT» ដែលសហការជាមួយ Bruno Mars ។

ជាមួយនឹងព្រឹត្តិការណ៍ដ៏សំខាន់នេះ Blackpink ក៏ក្លាយជាក្រុមចម្រៀងនារីទី៥ក្នុងប្រវត្តិសាស្ត្រដែលមានសមាជិកយ៉ាងហោចណាស់ពីរនាក់ ជាមួយនឹងបទចម្រៀងទោលដែលឈានដល់កំពូលទាំង ១០ នៃ Billboard Hot 100។ មិនត្រឹមតែបទ «Dracula»ទទួលបានការចាប់អារម្មណ៍នៅលើ Billboard Hot 100 ប៉ុណ្ណោះទេ ប៉ុន្តែវាក៏បានឈរនៅកំពូលតារាងធំៗពីរក្នុងពេលតែមួយនៅសប្តាហ៍នេះផងដែរ គឺ Hot Dance/Electronic Songs និង Hot Rock & Alternative Songs។ នេះត្រូវបានគេមើលឃើញថាជាសញ្ញានៃភាពទាក់ទាញយ៉ាងខ្លាំងរបស់បទចម្រៀងនេះនៅទូទាំងប្រភេទតន្ត្រីផ្សេងៗ។

លើសពីនេះបទនេះបានបន្តកែលម្អការសម្តែងចាក់ផ្សាយតាមវិទ្យុរបស់ខ្លួននៅសហរដ្ឋអាមេរិក។ បទចម្រៀងនេះបានឡើងដល់លេខ ១៨នៅលើតារាង Pop Airplay – តារាងនៃភាពញឹកញាប់នៃការចាក់ផ្សាយនៅលើស្ថានីយ៍វិទ្យុកំពូលទាំង ៤០ នៅសហរដ្ឋអាម៉េរិក។ ក្នុងពេលជាមួយគ្នានេះ បទចម្រៀងនេះក៏បានឡើងដល់លេខ ២៣នៅលើតារាង Radio Songs ដែលជាតារាងដែលប្រមូលផ្តុំការចាក់ផ្សាយតាមវិទ្យុនៅទូទាំងប្រភេទតន្ត្រីទាំងអស់។
អ្នកជំនាញជឿជាក់ថា ភាពជោគជ័យនៃបទ «Dracula» បង្ហាញពីភាពទាក់ទាញកាន់តែខ្លាំងឡើងរបស់ Jennie ក្នុងនាមជាសិល្បករទោលនៅលើឆាកអន្តរជាតិ។ បន្ទាប់ពីធ្វើការជាមួយ Blackpink អស់រយៈពេលជាច្រើនឆ្នាំ តារារូបនេះកំពុងបង្កើតស្នាដៃផ្ទាល់ខ្លួនរបស់នាងបន្តិចម្តងៗនៅលើទីផ្សារតន្ត្រីសកលជាមួយនឹងផលិតផលប្លែកៗ និងការសហការចម្រុះជាមួយសិល្បករអន្តរជាតិ។

ថ្មីៗនេះ Jennie ត្រូវបានគេរាយការណ៍ថាទទួលបានប្រាក់ចំណូលចំនួន១៦លានដុល្លារ តាមរយៈក្រុមហ៊ុនកម្សាន្តដែលនាងបានបង្កើតដោយខ្លួនឯងក្នុងរយៈពេលត្រឹមតែពីរឆ្នាំប៉ុណ្ណោះ៕