ឈុតឆាកសម្តែងរបស់ Cha Eun Woo មិនត្រូវបានកាត់ចេញពីសាច់រឿងឡើយ

នៅថ្ងៃទី១២ ខែឧសភា តួសម្តែង និងក្រុមផលិតរឿងភាគកូរ៉េ The Wonderfools បានចូលរួមសន្និសីទសារព័ត៌មានមួយនៅទីក្រុងសេអ៊ូល។ អ្នកដឹកនាំរឿង Yoo In Sik បានបង្ហាញខ្លួនជាមួយតួសម្តែងសំខាន់ៗប៉ុន្តែអវត្តមាន Cha Eun Woo ដោយសារតែលោកកំពុងបំពេញកាតព្វកិច្ចយោធា។

ពីមុនរឿងភាគបែបកំប្លែងនេះទទួលបានការចាប់អារម្មណ៍យ៉ាងខ្លាំងដោយសារតែភាពចម្រូងចម្រាសជុំវិញបញ្ហាពន្ធរបស់ Cha Eun Woo។ កាលពីដើម ឆ្នាំ២០២៦ Cha Eun Woo បានសង្ស័យថាបានគេចពន្ធតាមរយៈក្រុមហ៊ុនខ្មោចមួយដែលបង្កើតឡើងដោយម្ដាយរបស់លោក។ បន្ទាប់ពីការស៊ើបអង្កេតដោយសេវាពន្ធជាតិកូរ៉េ Cha Eun Woo បានទទួលស្គាល់កំហុសរបស់ខ្លួនសូមទោសជាសាធារណៈ និងបានបញ្ចប់ការបង់ពន្ធបន្ថែមចំនួន ១៣ ពាន់លានវ៉ុនកាលពីខែមេសា។ ទោះបីជាពន្ធត្រូវបានបង់រួចរាល់ហើយក៏ដោយ ក៏មតិសាធារណៈនៅតែមានការបែកបាក់គ្នា។

នៅក្នុងព្រឹត្តិការណ៍នោះ អ្នកដឹកនាំរឿង Yoo បានពិពណ៌នាអំពីតួនាទីរបស់ Cha Eun Woo ជា«តួអង្គអាថ៌កំបាំង»។ អ្នកដឹកនាំរឿងរូបនេះបានបង្ហាញថា «Cha Eun Woo គឺជាមនុស្សម្នាក់ដែលមានសមត្ថភាពផ្លូវចិត្ត និងមានអំណាចក្នុងការគ្រប់គ្រងវត្ថុដោយប្រើចិត្តរបស់គាត់ ប៉ុន្តែគាត់រស់នៅក្នុងស្ថានភាពលាក់ខ្លួន។ បន្ទាប់មកគាត់ត្រូវបានទាក់ទាញចូលទៅក្នុងក្រុមនេះ ហើយត្រូវបានបង្ខំឱ្យឆ្លងកាត់ដំណើរការសង្គមភាវូបនីយកម្មដោយមិនស្ម័គ្រចិត្ត»។

នៅពេលសួរអំពីភាពចម្រូងចម្រាសជុំវិញ Cha Eun Woo អ្នកដឹកនាំរឿង Yoo បានចែករំលែកថា «យើងបានឃើញព័ត៌មាននោះតែបន្ទាប់ពីដំណើរការផលិត និងកាត់តត្រូវបានបញ្ចប់។ នេះជាគម្រោងដែលខ្ញុំបានធ្វើការអស់រយៈពេលជាយូរមកហើយ ហើយអ្នកពាក់ព័ន្ធទាំងអស់បានខិតខំធ្វើការយ៉ាងខ្លាំងលើគ្រប់ឈុតឆាកនីមួយៗ។ ខ្ញុំផ្តោតទាំងស្រុងលើគុណភាពចុងក្រោយនៃខ្សែភាពយន្តនេះ»។ តាមរយៈនេះ អ្នកដឹកនាំរឿងបានបញ្ជាក់ថា ឈុតឆាករបស់ Cha Eun Woo នៅក្នុងខ្សែភាពយន្តនេះមិនត្រូវបានកាត់ផ្តាច់ទេ។

ក្នុងពេលជាមួយគ្នានេះ លោកក៏បានសរសើរការលះបង់របស់ Cha Eun Woo ផងដែរថា «ការសម្តែងដ៏រំជួលចិត្ត និងជម្រៅនៃការបង្ហាញតួអង្គនេះលើសពីការរំពឹងទុករបស់ខ្ញុំ»។មិនត្រឹមតែ Cha Eun Woo ទេ ប៉ុន្តែតារាសម្តែងទាំងអស់បាននាំមកនូវស្ទីលសម្ដែងថ្មីស្រឡាង។ Eun Woo បានធ្វើការដោយភាពរីករាយដូចអ្នកដទៃដែរ ហើយខ្ញុំពិតជាពេញចិត្តនឹងផលិតផលចុងក្រោយ»។ គួរបញ្ជាក់ថា រឿង «The Wonderfools» នឹងចេញផ្សាយនៅលើ Netflix នៅថ្ងៃទី១៥ ខែឧសភា៕