ចិនជំទាស់តៃវ៉ាន់ចូលរួមក្នុងសន្និបាតសុខាភិបាលពិភពលោករបស់អង្គការ WHO ​

ចិនមិនអនុញ្ញាតឱ្យតៃវ៉ាន់ចូលរួមក្នុងមហាសន្និបាតសុខាភិបាលពិភពលោក (WHA) លើកទី៧៩ របស់អង្គការសុខភាពពិភពលោក (WHO) ដែលនឹងចាប់ផ្តើមឡើងនាសប្តាហ៍ក្រោយទេ ខណៈតៃវ៉ាន់បញ្ជាក់ថា នឹងបញ្ជូនមន្ត្រីរបស់ខ្លួនទៅចូលរួមក្នុងមហាសន្និបាតនេះក្រៅផ្លូវការ បើទោះជាចិនមិនអនុញ្ញាតក៏ដោយ ។

សារព័ត៌មាន Reuters បានរាយការណ៍ពីទីក្រុងប៉េកាំង ប្រទេសចិន កាលពីថ្ងៃទី១១ ខែឧសភា ឆ្នាំ២០២៦ ថា ចិនបានជំទាស់វត្តមានតៃវ៉ាន់ក្នុងមហាសន្និបាតសុខាភិបាលពិភពលោក (WHA) របស់អង្គការសុខភាពពិភពលោក (WHO) ដោយសារចិនចាត់ទុកតៃវ៉ាន់គឺជាទឹកដីស្ថិតក្រោមការគ្រប់គ្រងរបស់ខ្លួន ។

តៃវ៉ាន់ ធ្លាប់បានចូលរួមក្នុងមហាសន្និបាតសុខាភិបាលពិភពលោក (WHA) របស់អង្គការសុខភាពពិភពលោក (WHO) ក្នុងឋានៈជាអ្នកសង្កេតការណ៍ ចាប់ពីឆ្នាំ២០០៩ ដល់ឆ្នាំ២០១៦ ក្នុងអាណត្តិប្រធានាធិបតី Ma Ying-Jeou ដែលមានទំនាក់ទំនងល្អជាមួយចិន ។ ប៉ុន្តែក្រោយមក នៅឆ្នាំ២០១៧ រដ្ឋាភិបាលចិនក៏ចាប់ផ្តើមជំទាស់មិនឱ្យតៃវ៉ាន់ចូលរួម បន្ទាប់ពីប្រធានាធិបតីតៃវ៉ាន់ លោកស្រី Tsai Ing-wen ឡើងកាន់តំណែងពេលនោះ បដិសេធមិនគាំទ្រឱ្យចិនបញ្ចូលតៃវ៉ាន់ជាប្រទេសតែមួយ ។ រីឯប្រធានាធិបតីតៃវ៉ាន់បច្ចុប្បន្ន លោក Lai Ching-te នៅតែប្រកាន់តាមគោលជំរបស់របស់លោកស្រី Tsai Ing-wen រហូតមក ។

មន្ត្រីនាំពាក្យក្រសួងការបរទេសចិន លោក Guo Jiakun ឱ្យដឹងថា រដ្ឋាភិបាលចិន គឺជារដ្ឋាភិបាលស្របច្បាប់ដឹកនាំប្រទេសទាំងមូលដោយប្រកាន់ភ្ជាប់នូវគោលការណ៍ចិនតែមួយ និងមានអំណាចក្នុងដំណោះស្រាយពាក់ព័ន្ធនឹងកិច្ចប្រជុំអង្គការសហប្រជាជាតិ ក៏ដូចជាកិច្ចប្រជុំរបស់អង្គការ WHO ។ ហេតុនេះ ចិនសម្រេចចិត្តជំទាស់ការចូលរួមរបស់តៃវ៉ាន់ក្នុងមហាសន្និបាតសុខាភិបាលពិភពលោក (WHA) លើកនេះ ។

ចំណែករដ្ឋមន្ត្រីក្រសួងសុខាភិបាលតៃវ៉ាន់ លោក Shih Chung-liang សោកស្តាយយ៉ាងខ្លាំងចំពោះការជំទាស់នេះ ស្របពេលពិភពលោក កំពុងប្រឈមនឹងបញ្ហាសុខភាព តៃវ៉ាន់មិនគួរត្រូវបានហាមឃាត់ក្នុងកិច្ចពិភាក្សាសំខាន់ៗទេ ការជំទាស់នេះមិនសមហេតុផល ។ ទោះជាចិនជំទាស់ក៏ដោយ ក៏តៃវ៉ាន់នៅតែបញ្ជូនមន្ត្រីរបស់ខ្លួនទៅចូលរួមមហាសន្និបាតសុខាភិបាលពិភពលោក (WHA) នៅទីក្រុងហ្សឺណែវ ប្រទេសស្វីស ដើម្បីជួបពិភាក្សាជាមួយអ្នកជំនាញសុខភាព ។

គួរបញ្ជាក់ថា តៃវ៉ាន់ ត្រូវបានស្ថាប័នអន្តរជាតិធំៗរារាំង ចាប់តាំងពីអង្គការសហប្រជាជាតិអនុម័តសេចក្តីសម្រេចក្នុងឆ្នាំ១៩៧១ ទទួលស្គាល់សាធារណរដ្ឋប្រជាមានិតចិនជាតំណាងស្របច្បាប់តែមួយគត់ ។ តាំងពីពេលនោះមក ចិនបានប្រើសេចក្តីសម្រេចនេះអះអាងថា តៃវ៉ាន់គ្មានសិទ្ធិចូលរួមក្នុងស្ថាប័ននានារបស់អង្គការសហប្រជាជាតិ ក្នុងនាមជាសមាជិកឡើយ ៕