តារាចម្រៀង សួស វីសា បានធ្វើឱ្យអ្នកលេងបណ្តាញសង្គមមានការភ្ញាក់ផ្អើលយ៉ាងខ្លាំងបន្ទាប់ពីបង្ហោះសារចង់ក្លាយជាស្រ្តីមេម៉ាយវិញដោយលើកហេតុផលថា «មានប្តីដូចអត់ប្តី»។ មិនត្រឹមតែប៉ុណ្ណោះលោក ថមមី ដែលជាស្វាមីរបស់តារាចម្រៀងរូបនេះក៏បានបង្ហោះសារចង់ដោះលែង និងស្វែងរកផ្លូវព្រះធម៌មកដាក់ខ្លួនទើបអាចស្ងាត់ចិត្តបាន។
ទស្សនិកជនប្រាកដជាបានស្គាល់ប្តីប្រពន្ធអ្នកសិល្បៈមួយគូដែលចាប់ដៃគ្នាកសាងសុភមង្គលក្នុងគ្រួសារបង្កើតមុខរបររីកដុះដាលយ៉ាងខ្លាំងនោះគឺលោក ថមមី និងអ្នកនាង សួស វីសា។ អ្នកទាំងពីរបានចាប់ដៃគ្នា Live លក់ផលិតផលដោយថមមីតែងខ្លួនធ្វើជាស្រីដែលគ្រានោះធ្វើឱ្យមានភាពល្បីល្បាញយ៉ាងខ្លាំង។ ប្តីប្រពន្ធមួយគូនេះក៏បានសម្តែងកំប្លែងវីដេអូខ្លីៗ រួមទាំងបង្កើតកម្មវិធីចាក់ផ្សាយនៅលើផេកផ្ទាល់ខ្លួនផងដែរ។ 
ងាកមកកាន់តារាចម្រៀង សួស វីសា វិញបានរយាលពីការងារសិល្បៈជាច្រើនខែមកហើយដោយសារតែពរពោះកូនទីពីរ និងចង់បំពេញតួនាទីជាម្តាយខណៈការប្រែប្រួលរូបរាងក៏ធ្វើឱ្យនាងមិនទាន់ចង់វិលត្រឡប់មកកាន់ឆាកតន្រ្តីវិញដូចគ្នា។ ទោះយ៉ាងណា អ្វីដែលធ្វើឱ្យទស្សនិកជនមានការភ្ញាក់ផ្អើលនោះតារាចម្រៀងប្រចាំផលិតកម្មរស្មីហង្សមាសរូបនេះបែរជាប្រកាសត្រៀមចិត្តនឹងក្លាយជាស្រ្តីមេម៉ាយក្នុងខែថ្មី។
នៅយប់ថ្ងៃទី១០ ខែឧសភា អ្នកនាង សួស វីសា បានបង្ហោះសំណេរថា «ខែថ្មីនេះខ្ញុំកំពុងតែត្រៀមខ្លួនក្លាយជាមេម៉ាយហើយ ព្រោះហត់នឿយនិងជីវិតមានប្តីដូចអត់ប្តីណាស់»។ 
សំណេរនេះបានជំរុញឱ្យមានប្រតិកម្មយ៉ាងឆាប់រហ័សដោយអ្នកខ្លះគិតថាអ្វីដែលនាងនិយាយអាចជាបទចម្រៀងថ្មី រីឯមតិខ្លះទៀតបានរិះគន់ សួស វីសា ថាសម្តែងពីព្រោះតែចង់បានទាមទារចំណាប់អារម្មណ៍លក់ផលិតផលឱ្យដាច់។ អ្នកគាំទ្រជាច្រើនទៀតបានណែនាំឱ្យតារាចម្រៀង សួស វីសា ត្រជាក់ចិត្តបញ្ហាបែបនេះមិនគួរបង្ហោះនៅលើបណ្តាញសង្គមនោះទេគួរតែព្យាយាមដោះសា្រយបញ្ហាជាមួយនឹង ថមមី ពីព្រោះវាអាចនឹងល្អប្រសើរ។
ងាកទៅកាន់លោក ថមមី វិញបានបញ្ចេញសំណេរសោកសៅនៅលើបណ្តាញសង្គមរបស់ខ្លួនកាលពីយប់ថ្ងៃទី៩ ខែឧសភា ថា«សម្តីមួយម៉ាត់ៗ វាអាចចាក់ទំលុះ បេះដូងចិត្តឱ្យខ្ទិចខ្ទី ជីវិតនៅមានដង្ហើម គ្រប់យ៉ាងក៏អាចមានផ្លូវចេញ ដូច្នេះមានតែការដោះលែង ទំលាក់ចោល»។ បន្ទាប់ពីតារាចម្រៀង សួស វីសា បង្ហោះសំណេរចង់ក្លាយជាមេម៉ាយនោះ លោកថមមី បានបញ្ចេញសំណេរមួយទៀតថា «តាមផ្លូវទៅរកផ្លូវព្រះធម៌ ទើបស្ងប់ចិត្ត សូមជួយណែនាំកន្លែងវិបស្សនា មកកាន់ខ្ញុំមួយបងប្អូន»។
ទោះយ៉ាងណា ការបង្ហោះសំណេររបស់ សួស វីសា បានរីករាលយ៉ាងឆាប់រហ័សដែលនាំឱ្យមានការជជែកវែកញែកយ៉ាងច្រើននោះតារាចម្រៀងរូបនេះបានសម្រេចចិត្តលុបការបង្ហោះខ្លួនវិញដោយសារតែការស្នើសុំរបស់ឪពុកម្តាយនិងមិនចង់ឮពាក្យថាបង្កើតរឿងចង់ល្បី។ ម្ចាស់បទ «ជួបមនុស្សសម្តែង» បានបង្ហោះថា «Ok ខ្ញុំសម្រេចលុប Status ចោលទាំងអស់ពី FB ទុករឿងទាំងអស់ដោះ Offline ចុះព្រោះជាការស្នើសុំរបស់ឪពុកម្តាយ ណាមួយក៏មិនចង់ឮពាក្យថាបង្កើតរឿងចង់ល្បីព្រោះខ្ពើមពាក្យនេះណាស់»៕
