ពលរដ្ឋខ្មែរប្រតិកម្មខ្លាំងៗ ក្រោយថៃបង្ហើបថាចង់បញ្ជូនទូតឲ្យមកជានានឹងកម្ពុជាវិញដូចដើម

គិតថាកម្ពុជាជាសួនសាធារណៈមែនទេទើបចង់ចេញ-ចូលស្រេចតែចិត្តបែបនេះ? ក្រោយដកទូតទៅអស់ជាច្រើនខែ ពេលនេះសុខៗថៃក៏នឹកឃើញចង់បញ្ជូនទូតខ្លួនត្រឡប់វិញដូចគ្មានរឿងអ្វី ដែលធ្វើឲ្យបងបងប្អូនប្រជាពលរដ្ឋខ្មែរលឺហើយទប់អារម្មណ៍មិនខឹ.ងមិនបាន នាំគ្នាបញ្ចេញមតិរិះគ.ន់ព្រោងព្រាត និងផ្ដាំថាដាច់ខាតមិនស្វាគមន៍ទូតថៃត្រឡប់មកវិញនោះទេ។

យោងតាមការចុះផ្សាយរបស់ទីភ្នាក់ងារសារព័ត៌មានថៃ នៅថ្ងៃសុក្រ ទី៨ ខែឧសភា ឆ្នាំ២០២៦ បានចេញផ្សាយអំពីពាក្យសម្ដីរបស់លោក Sihasak Phuangketkeow រដ្ឋមន្ត្រីការបរទេសថៃ ដែលបាននិយាយថា ឆាប់ៗខាងមុខនេះ គណៈរដ្ឋមន្រ្តីថៃនឹងធ្វើការពិភាក្សា ក៏ដូចជាពិនិត្យទៅលើលទ្ធភាព ក្នុងការបញ្ជូនមន្រ្តីទូតថៃត្រឡប់មកធ្វើការងារនៅស្ថានទូតថៃប្រចាំនៅទីក្រុងភ្នំពេញ ដើម្បីឈានដល់បើកបណ្តាញទំនាក់ទំនងឡើងវិញផ្លូវការជាមួយកម្ពុជា»។

រដ្ឋាភិបាលថៃបានចាត់ទុកផែនការនេះថា ជាយុទ្ធសាស្ត្រ “ដើរមួយជំហានម្ដង” តាមរយៈការស្ដារឡើងវិញនូវកិច្ចសន្ទនាផ្នែកការទូត ដើម្បីយកមកធ្វើជាមូលដ្ឋានក្នុងការជជែកដោះស្រាយបញ្ហាសន្តិសុខព្រំដែនដ៏ស្មុគស្មាញ ព្រោះថៃយល់ឃើញថា បើគ្មានអ្នកតំណាងទូតនៅនឹងកន្លែងទេ ការដោះស្រាយបញ្ហាការយល់ច្រឡំនៅតាមព្រំដែននឹងកាន់តែពិបាក។

ដោយឡែកងាកមកខាងកម្ពុជា ប្រជាជនខ្មែរភាគច្រើនហាក់មិនពេញចិត្តចំពោះការប្រកាសរបស់រដ្ឋមន្រ្តីថៃដូចខាងលើនេះឡើយ ដោយមតិយោបល់របស់បងប្អូននៅក្នុងបណ្ដាញសង្គមសឹងតែ ៩៩% បានអះអាងថា ពួកគាត់មិនស្វាគមន៍ទូតថៃត្រឡប់មកវិញជាដាច់ខាត ដរាបណាជម្លោះ និងដីរបស់កម្ពុជាដែលបានបាត់បង់ទៅមិនទាន់ត្រូវបានដោះស្រាយ។

យោងតាមមតិមួយនៅក្នុងចំណោមមតិជាច្រើនដែលបងប្អូនខ្មែរបានខម្មិននៅខាថក្រោមអត្ថបទដែលមានចំណងជើងថា «ថៃមានគម្រោងបញ្ជូនឯកអគ្គរាជទូតខ្លួនមកកាន់តំណែងនៅកម្ពុជាវិញក្នុងពេលឆាប់ៗ» របស់សារព័ត៌មាន KBN News បានលើកឡើងថា «បើចង់ដាក់ទូតនៅខ្មែរវិញ ថៃត្រូវដកទ័ពនិងសងថ្លៃខូចខាតឲ្យខ្មែរជាមុនសិន» រីឯមតិមួយទៀតបានលើកឡើងថា «អស់ផ្លូវហើយមែនទេបានជាវិលមករកប្រទេសអ្នកក្រដែលពួកឯងមើលងាយ? ពួកឯងនេះថោ.កតាំងពីរក្រោមដល់លើមែន! ចង្រៃដូចពួកឯងនេះគ្មានអ្នកណាចង់នៅជិតទេពួកអាកំពូ.ជចោ.រ»។ ក្រៅពីនេះនៅមានមតិរាប់ពាន់ខម្មិនផ្សេងទៀតដែលបង្ហាញការយល់ឃើញដូចៗគ្នាថា ប្រជាជនកម្ពុជាមិនពេញចំពោះការវិលមកវិញរបស់ទូតថៃឡើយ ហើយក៏មិនចង់ស្ដារទំនាក់ទំនងអ្នកជិតខាងល្អអ្វីដែរ បើថៃនៅតែប្រកាន់គំនិតឈ្លានពានកម្ពុជា។

តែទោះជាយ៉ាងណា ក៏មានមតិមួយចំនួនដែលបង្ហាញពីការយល់ឃើញវិជ្ជមានចំពោះការស្តារទំនាក់ទំនងនេះផងដែរ ព្រោះក្នុងនាមជាប្រទេសដែលនៅជាប់ព្រំទល់គ្នាមិនយូរមិនឆាប់គង់តែត្រូវការការប្រាស្រ័យទាក់ទំនង ជាជាងការបង្កជម្លោះដែលនាំឲ្យខាតបង់រៀងៗខ្លួន។ យ៉ាងណាក៏ដោយ ការសម្រេចចិត្តចុងក្រោយថាព្រមឬមិនព្រម ឲ្យថៃបញ្ជូនទូតត្រឡប់វិញគឺជាស្ថិតនៅក្រោមការត្រួតពិនិត្យរបស់ប្រមុខរាជរដ្ឋាភិបាលកម្ពុជា។ ដូច្នេះក្នុងនាមជាប្រជាពលរដ្ឋ យើងត្រូវជឿទុកចិត្តលើការដឹកនាំរបស់រាជរដ្ឋាភិបាលក្នុងការការពារបូរណភាពទឹកដី និងសុខសុវត្ថិភាពជូនប្រជាជនកម្ពុជា៕