ដូចទស្សនិកជនជ្រាបមកហើយថាតារាចម្រៀង ជី ដេវីត និងទេព បូព្រឹក្ស ទទួលបានភាពជោគជ័យយ៉ាងខ្លាំងនៅក្នុងការសម្តែងនៅលើឆាកអន្តរជាតិកាលពីពេលថ្មីៗនេះ ខណៈ ទេព បូព្រឹក្ស ក៏ធ្លាប់បានបង្ហើបដែរថានឹងមានការសម្តែងម្តងទៀតនៅឯប្រទេសហ្វីលីពីន។ ទោះយ៉ាងណា ការបញ្ចេញមតិនិងការឆ្លើយតបរបស់ ជី ដេវីត ទៅកាន់អ្នកគាំទ្រម្នាក់ព្រួយបារម្ភទាក់ទងនឹងគម្រោង Tour concert ផ្ទាល់ខ្លួននៅហ្វីលីពីនធ្វើឱ្យមានការចាប់អារម្មណ៍ជាពិសេស។
តាមការចែករំលែករបស់ផេកអ្នកគាំទ្ររបស់តារាចម្រៀង ជី ដេវីត នាពេលថ្មីៗនេះបានបង្ហាញពីការសន្ទនារបស់អ្នកគាំទ្រម្នាក់និងតារាចម្រៀងរូបនេះផ្ទាល់ទាក់ទងនឹងគម្រោងការប្រគំតន្រ្តីនៅក្រៅប្រទេស។ គណនីនោះបានបញ្ចេញមតិថា «ជាហ្វេនបង ខ្ញុំសូមមានមតិយោបល់បន្តិចចំពោះបងមានគម្រោង ទៅធ្វើ tour នៅ Philippines បើទៅក្នុងនាមជា Artist គេអញ្ជើញចូល Festival អ្វីមួយបងទៅជារឿងល្អ ប៉ុន្តែបើចង់ទៅធ្វើ Tour concertផ្ទាល់ខ្លួន សូមបងគិតម្តងទៀតបានទេ? បើទៅមានហ្វេនច្រើន Credit បងកាន់តែកើនឡើង ប៉ុន្តែបើទៅមិនសូវមាន ហ្វេន Credit បងអាចនឹងធ្លាក់ ហើយ Hater ក៏ចាំជាន់បងមួយតង់ ទៀត ខ្ញុំសង្ឃឹមថាបងនឹងបានអានបន្តិច ហើយនឹងគិតវាម្តងទៀត»។
ការបញ្ចេញមតិរបស់អ្នកគាំទ្រក្នុងន័យព្រួយបារម្ភនេះ តារាចម្រៀង ជី ដេវីត បានឆ្លើយតបដោយសេចក្តីអំណរនិងមុះមុតថា «មិនថាជោគជ័យ ឬមិនជោគជ័យ តើមានម្តងណាដែលថាគេមិនមានបំណងជាន់ ឬចង់ លុបបំបាត់ខ្ញុំ? សូមអរគុណចំពោះបំណងល្អ តែបញ្ហាខ្លះដេក មួយកន្លែងមិនអាចបង្កើតមេឃបានទេដោយក្តីស្រលាញ់ជូនពរសុខភាពល្អ»។
ការឆ្លើយតបរបស់ ជី ដេវីត ត្រូវបានអ្នកគាំទ្រជាច្រើនពេញចិត្តពីព្រោះអ្វីដែលតារារ៉េបរូបនេះធ្វើមិនដែលធ្វើឱ្យអ្នកគាំទ្រខកចិត្តឡើយទោះបីជាប្រឈមនឹងការរិះគន់ជាន់ពន្លិចយ៉ាងណាក៏ដោយ ជី ដេវីត និងទេព បូព្រឹក្ស មិនដែលចុះចាញ់នោះទេ។ ពួកគេថែមទាំងអះអាងទៀតថាប្រសិនជាអ្នកទាំងពីរចុះចាញ់ទៅតាមសម្តីអ្នកស្អប់នោះម្ល៉េះអ្នកទាំងពីរមិនអាចឈានដល់ចំណុចមួយដែលខ្ពស់ដូចបច្ចុប្បន្ននេះនោះទេ។ ក្រុមអ្នកគាំទ្រក៏បង្ហាញដែរថាមិនថា ជី ដេវីត សម្រេចចិត្តបែបណានោះទេពួកគេនៅតែគាំទ្រជានិច្ច៕
