តារាសម្តែងជួរមុខប្រចាំប្រទេសកម្ពុជា ស៊ីន យូប៊ីន បានបង្ហើបប្រាប់ដំណឹងមួយយ៉ាងរំភើបក្នុងឱកាសដែលនឹងទៅចូលរួមកម្មវិធីមួយនៅឯម៉ាកាវដោយនឹងបង្ហាញពីសិល្បៈវប្បធម៌ខ្មែរទៅកាន់ទស្សនិកជនអន្តរជាតិ។ ក្នុងនាមជាឯកអគ្គរដ្ឋទូតវប្បធម៌កម្ពុជាសម្រាប់មហោស្រពភាពយន្តសិល្បៈអាស៊ីនៅឆ្នាំនេះ ស៊ីន យូប៊ីន ថានាងមានទាំងមោទនភាពនិងទំនួលខុសត្រូវខ្ពស់។
តាមការប្រកាសរបស់ ស៊ីន យូប៊ីន នៅលើគណនីទិកតុក និង អ៊ីនស្ត្រាក្រាម កាលពីពេលថ្មីៗនេះបានឱ្យដឹងថា នាងពិតជាមានអារម្មណ៍រំភើបដែលត្រូវបានតែងតាំងជាឯកអគ្គរដ្ឋទូតវប្បធម៌កម្ពុជាសម្រាប់មហោស្រពភាពយន្តសិល្បៈអាស៊ីនៅឆ្នាំនេះ។ នាងនឹងយកតួនាទីនេះដោយមោទនភាព ហើយនឹងចែករំលែក ប្រវត្តិសាស្ត្រ និងព្រលឹងនៃវប្បធម៌ខ្មែរជាមួយពិភពលោក។ នៅក្នុងវីដេអូនេះ ស៊ីន យូប៊ីន បានប្រើប្រាស់ជាភាសាអង់គ្លេសដោយមាន Subtitle ជាភាសាខ្មែរនិងចិន។ 
តារាសម្តែងរូបនេះបានរៀបរាប់ពីការធំធាត់ឡើងរបស់ខ្លួននៅក្នុងប្រទេសមួយដែលសម្បូរទៅដោយសម្បត្តិវប្បធម៌ដួងព្រលឹងជាតិ បង្ហាញពីសិល្បៈបុរាណខ្មែរ ប្រាសាទអង្គរវត្ត ធនធានធម្មជាតិជាច្រើនទៀត។ កញ្ញា យូប៊ីន ក៏បានរៀបរាប់ខ្សែភាពយន្តជាច្រើនមានទាំងហូលីវូដដែលបានថតនៅប្រទេសកម្ពុជា។
មិនត្រឹមតែប៉ុណ្ណោះ ស៊ីន យូប៊ីន ក៏មិនភ្លេចអំពាវនាវដល់ក្រុមផលិតភាពយន្តអាចជ្រើសរើសទីតាំងប្រទេសកម្ពុជាសម្រាប់ការថតខ្សែភាពយន្ត ដែលនាងជឿថាវិស័យភាពយន្តគឺជាការភ្ជាប់ទំនាក់ទំនងទស្សនិកជនទូទាំងពិភពលោក។ ក្នុងនាមនាងជាតារាសម្តែងនៅក្នុងប្រទេសកម្ពុជានិងក្នុងនាមឯកអគ្គរដ្ឋទូតវប្បធម៌កម្ពុជាសម្រាប់មហោស្រពភាពយន្តសិល្បៈអាស៊ីនៅឆ្នាំនេះ ស៊ីន យូប៊ីន ថានាងមានមោទនភាពនិងទំនួលខុសត្រូវខ្ពស់ក្នុងការចែករំលែកអត្តសញ្ញាណវប្បធម៌នៃមាតុភូមិរបស់នាងទៅកាន់ទស្សនិកជនអន្តរជាតិ។
កញ្ញា ស៊ីន យូប៊ីន នឹងទៅទីក្រុងម៉ាកាវនាពេលឆាប់ៗខាងមុខនេះប៉ុន្តែរូបនាងពុំទាន់បញ្ជាក់កាលបរិច្ឆេទច្បាស់លាស់ឡើយ។ វត្តមានរបស់ ស៊ីន យូប៊ីន នៅក្នុងឱកាសនេះទស្សនិកជនជឿជាក់ថារូបនាងនឹងមានអ្វីពិសេសដោយមិនភ្លេចពីការបង្ហាញអត្តសញ្ញាណជាតិខ្មែរឡើយ ជាពិសេសសំលៀកបំពាក់នាងចូលរួមនឹងប្រណីតមិនខាន៕
