ថ្មីៗនេះបន្ទាប់ពីបេក្ខភាព Miss Planet International 2025 ថតឈុតតំណាងជាតិនៅប្រាសាទអង្គរវត្តរូបភាពរបស់ Miss Planet India បានបង្កឱ្យមានការចាប់អារម្មណ៍យ៉ាងខ្លាំងដោយសារតែគ្រងមកុដអប្សរា។ នេះបានជំរុញឱ្យអ្នកលេងបណ្តាញសង្គមថៃឌឺដងមកកាន់កម្ពុជា ប៉ុន្តែការពិតត្រូវបានលាតត្រដាង។
នៅលើគណនី Instagram Miss Planet India បានបង្ហោះពីបវរកញ្ញា Snehashree Gowda បានចូលរួមលេងត្រេនក្នុងឈុតតំណាងជាតិរបស់ខ្លួននៅឯប្រាសាទអង្គរវត្ត។ សំណេរនៅលើវីដេអូនោះបានបញ្ជាក់យ៉ាងច្បាស់លាស់ថា រស់នៅក្នុងក្តីស្រមៃនៅប្រាសាទអង្គរវត្តដ៏អស្ចារ្យ ជាវិមានសាសនាដ៏ធំបំផុតរបស់ពិភពលោក និងជាតំបន់បេតិកភណ្ឌពិភពលោករបស់អង្គការយូណេស្កូ»។
មិនត្រឹមតែប៉ុណ្ណោះ ស្ថាប័ន Miss Planet India បានបញ្ជាក់ថាបវរកញ្ញារូបនេះស្លៀកពាក់សម្លៀកបំពាក់ឥណ្ឌាជាមួយនឹងមកុដបំផុសគំនិតដោយកម្ពុជា ធ្វើឱ្យបវរកញ្ញារូបនេះឱបក្រសោបសម្រស់នៃវប្បធម៌ សន្តិភាព និងបេតិកភណ្ឌនៅក្នុងបរិបទដ៏អមតៈនេះ។ ក្រៅពីនេះ Miss Planet India ក៏បានចែករំលែកឈុតស្បៃខ្មែរដ៏ស្រស់ស្អាតបង្ហាញទៅកាន់អ្នកគាំទ្ររបស់ខ្លួនផងដែរ។ 
នៅពេលស្ថាប័ន Miss Planet បានបង្ហោះរូបភាពរបស់បេក្ខភាពនៅក្នុងការប្រកួតមានអ្នកលេងបណ្តាញសង្គមថៃមួយចំនួនចូលមកបញ្ចេញមតិយោបល់បែបឌឺដងចំពោះការពាក់មកុដអប្សរារបស់ Miss Planet India។ យ៉ាងណាមិញ ខាងឥណ្ឌាក៏បានបញ្ជាក់នៅលើបណ្តាញសង្គមដែរ។
គួរបញ្ជាក់ផងដែរ ការប្រកួតឈុតតំណាងជាតិនិងប្រកួតបឋមនៃកម្មវិធី Miss Planet International 2025 នឹងប្រព្រឹត្តទៅនៅថ្ងៃទី១៣ ខែមីនា ខណៈថ្ងៃផ្តាច់ព្រ័ត្រនឹងប្រព្រឹត្តទៅនៅថ្ងៃទី១៥ ខែមីនា ឆ្នាំ២០២៦៕
